பிறப்பு, இறப்பு சான்றிதழ் பெற 15 மடங்கு கட்டணம் உயர்வு

ஈரோடு, நவ. 2: பிறப்பு, இறப்பு சான்றிதழ் வாங்குவதற்கு முதல் நகல் பெற ரூ.17ம், அதற்கு மேல் ஒவ்வொரு நகல் பெறுவதற்கும் ரூ.5 வீதம் மட்டுமே கட்டணமாக பெறப்பட்டு வந்தது. தற்போது தமிழக அரசு மிகப்பெரிய அளவில் கட்டண உயர்வை அமல்படுத்தியுள்ளது. அதன்படி முதல் நகல் பெற ரூ.200ம், அதற்கு மேல் வாங்கும் ஒவ்வொரு நகலுக்கும் ரூ.200 வீதம் கட்டணத்தை உயர்த்தியுள்ளனர். பிறப்பு, இறப்பு சான்று பெறுவதற்கான கட்டணத்தை உயர்த்தியதற்கு காங்கிரஸ் சார்பில் கடும் கண்டனம் தெரிவிக்கப்பட்டுள்ளது.
இதுகுறித்து ஈரோடு மாநகர் மாவட்ட காங்கிரஸ் தலைவர் ஈ.பி.ரவி கூறியதாவது: பிறப்பு, இறப்பு சான்றிதழ் பெற ரூ.200 கட்டணமாக நிர்ணயம் செய்திருப்பது கடும் கண்டனத்துக்குரியது. இந்த கட்டண உயர்வு கிட்டத்தட்ட 15 மடங்கு கூடுதலாகும். எனவே தமிழக அரசு இக்கட்டண உயர்வை திரும்ப பெற வேண்டும். இல்லாவிட்டால் வரும் 10ம் தேதி ஈரோடு மாநகராட்சி அலுவலகம் முன்பு மாவட்ட காங்கிரஸ் சார்பில் கண்டன ஆர்ப்பாட்டம் நடத்தப்படும்

நன்றி

தினகரன்

-


ஆர்ப்பாட்டம் நியாயமானதுதான்....
-
மேலும் விரிவான செய்தி:
-

வழக்கமாக பிறப்பு அல்லது இறப்பு நடந்த 21 நாட்களுக்குள்
பதிவு செய்ய வேண்டும். அதன்பின்னர் 21 நாட்களுக்கு மேல்
30 நாட்களுக்குள் பதிவு செய்தால் 2 ரூபாய் தாமதக்கட்டணமாக
வசூலிக்கப்பட்டு வந்தது.

இந்தக் கட்டணம் ரூ.100 ஆக, அதாவது 50 மடங்காக கட்டணம்
அதிகரிக்கப்பட்டுள்ளது.

அதேபோல 30 நாட்களுக்கு மேல் ஓராண்டுக்குள் பதிவு செய்ய
வசூலிக்கப்பட்டு வந்த தாமதக்கட்டணம் ரூ.5, தற்போது
ரூ.200ஆக உயர்த்தப்பட்டுள்ளது.

ஓராண்டுக்கு மேல், பதிவு செய்யப்பட்டால் அதற்கு
ரூ.10 வசூலிக்கப்பட்டது. அந்தக் கட்டணம் ரூ.500 ஆக
அதிகரிக்கப்பட்டுள்ளது.

பிறப்பு சான்றிதழில் குழந்தையின் பெயர் சேர்க்க ஓராண்டுக்கு
மேல் விண்ணப்பித்தால் ரூ.5 கட்டணமாக வசூலிக்கப்பட்டது.
அந்தக் கட்டணம் தற்போது ரூ.200 ஆக அதிகரிக்கப்பட்டுள்ளது.

அதைத் தவிர, பிறப்பு மற்றும் இறப்பு சான்றிதழின் நகல்
கேட்டு விண்ணப்பித்தால், ஒவ்வொரு நகலுக்கும் தேடுதல்
கட்டணமாக முதல் ஆண்டுக்கு ரூ.2 வசூலிக்கப்பட்டது.
அது தற்போது ரூ.100 ஆக உயர்த்தப்பட்டுள்ளது.
ஒவ்வொரு கூடுதல் ஆண்டுக்கும் இதுவரை
வசூலிக்கப்பட்டு வந்த ரூ.2 என்பது ரூ.100 ஆக உயர்த்தப்
பட்டுள்ளது.

இதுவரை ரூ.5க்கு வழங்கப்பட்டு வந்த பிறப்பு மற்றும் இறப்பு
சான்றிதழ் நகலைப் பெற இனி ரூ.200 செலுத்த வேண்டும்.
இதுவரை கூடுதல் நகல் பெற கட்டணம் வசூலிக்கப்படாமல்
இருந்தது. தற்போது, ஒவ்வொரு நகலுக்கும் ரூ.200 கொடுக்க
வேண்டும்.

பிறப்பு மற்றும் இறப்பு சான்றிதழ் இல்லை என்ற தகவலை
பெற இதுவரை ரூ.2 வசூலிக்கப்பட்டு வந்தது. அந்தக் கட்டணம்
ரூ.100 ஆக உயர்த்தப்பட்டுள்ளது.

இந்தக் கட்டண உயர்வுக்கான அரசாணையை சுகாதாரத்துறை
செயலாளர் ராதாகிருஷ்ணன் பிறப்பித்துள்ளார்.

பிறப்பு, இறப்பு பதிவாளர் நியமனம்: தமிழக சுகாதாரத் துறை
முதன்மைச் செயலாளர் ராதாகிருஷ்ணன் வெளியிட்ட
அரசாணையில் கூறப்பட்டுள்ளதாவது: ஊரகப்பகுதிகளில் உள்ள
மாவட்ட அரசு தலைமையக ஆஸ்பத்திரிகள், அரசு மருத்துவக்
கல்லூரி ஆஸ்பத்திரிகள், தாலுகா அல்லது தாலுகா நிலை
அல்லாத ஆஸ்பத்திரிகள் ஆகியவற்றுக்கு பல்நோக்கு சுகாதார
கண்காணிப்பாளர்களை (ஆண்கள், முன்னாள் சுகாதார
இன்ஸ்பெக்டர்) பிறப்பு, இறப்பு பதிவாளர்களாக நியமிக்க அரசு
முடிவு செய்துள்ளது.

மேலும் நகர்ப்புற மற்றும் பேரூராட்சி பகுதியில் உள்ள சுகாதார
இன்ஸ்பெக்டர் அல்லது செயல் அதிகாரிகளை அங்குள்ள
மாவட்ட அரசு தலைமையக ஆஸ்பத்திரிகள், அரசு மருத்துவக்
கல்லூரி ஆஸ்பத்திரிகள், தாலுகா அல்லது தாலுகா நிலை அல்லாத
ஆஸ்பத்திரிகள் ஆகியவற்றின் பிறப்பு, இறப்பு பதிவாளர்களாக
நியமிக்க அரசு தீர்மானித்துள்ளது.
-
-----------------------------
தினகரன்