வட சென்னை ; நடுக்கடலில் உருவான சூறாவளிக் காற்று - அதிர்ச்சி வீடியோ

சென்னை காசிமேடு அருகே நடுக்கடலில் இன்று காலை திடீரெனெ உருவான சூறாவளிக் காற்றின் வீடியோ வெளியாகியுள்ளது.

சென்னை காசிமேடு அருகே வியாழக்கிழமை காலை நடுக்கடலில் திடீர் சூறாவளி வீசியது. சுமார் 45 நிமிஷம் நீடித்த இந்த சூறாவளியால் பொதுமக்கள் பீதிக்குள்ளாயினர்.
வடகிழக்குப் பருவமழை ஓரிரு நாள்களில் தொடங்கும் என சென்னை வானிலை ஆய்வு மையம் அறிவித்துள்ள நிலையில், வியாழக்கிழமை காலை முதலே தமிழகம் முழுவதும் பரவலாக மழை பெய்து வருகிறது. சென்னையைப் பொருத்தவரை லேசான மழை பெய்தது. இந்நிலையில், வியாழக்கிழமை காலை காசிமேடு மீன்பிடித் துறைமுகம் அருகே நடுக்கடலில் திடீர் சூறாவளி ஏற்பட்டது. சென்னை துறைமுகத்தின் கப்பல் நுழைவு வாயில் பகுதியில் தொடங்கிய இந்தச் சூறாவளி பனைமரம் உயரத்திற்கு விசித்திரமான முறையில் நகர்ந்து சென்றது. மேலும் அங்கும் இங்குமாக நகர்ந்த சூறாவளி, திருவொற்றியூர் பகுதிவரை சென்று படிப்படியாக மறைந்தது. இதுபோன்ற சூறாவளியை இப்பகுதியில் இதுவரை பார்க்கவில்லை என அப்பகுதி மக்கள் தெரிவித்தனர். பயங்கர வேகத்துடன் சூறாவளி வீசிய நிலையில் அப்பகுதியில் படகுகள் ஏதும் செல்லாததால் பாதிப்பு தவிர்க்கப்பட்டது

இரண்டு மேகக்கூட்டங்களுக்கிடையே இடைவெளி ஏற்படும்போது அழுத்தம் ஏற்பட்டு அதன் விசை தரைப்பகுதியை நோக்கி பாயும். இதனால் ஏற்படும் சுழற்சியே சூறாவளியாகும். இரண்டு மேகங்களும் ஒன்றாக இணைந்த பிறகு சூறாவளியும் நின்றுவிடும். கடல் பகுதியில் நீர்த்தாரைகளால் சுழற்சி ஏற்பட்டு இச்சூறாவளி உருவாகி இருக்கக்கூடும். வியாழக்கிழமை மேகமூட்டமாகக் காணப்பட்டதால் இதற்கான வாய்ப்பு அதிகமாகவே இருந்துள்ளது. அமெரிக்க, ஆப்பிரிக்க நாடுகளில் தாக்கும் "டோர்னடா' போன்ற பயங்கர சூறாவளிகள் இந்திய பகுதியில் ஏற்படுவதற்கு வாய்ப்பு இல்லை. தூரத்திலிருந்து பார்க்கும்போது வானாளவிய உயரத்திற்குத் தெரியும். எனினும் அப்போது எடுக்கப்பட்ட விடியோ பதிவுகளை ஆய்வு செய்து வருகிறோம். ரேடார் கருவிகளின் பதிவுகள், கடலில் அமைக்கப்பட்டுள்ள மிதவைகளை ஆய்வு செய்த பிறகுதான் இச்சூறாவளி ஏற்பட்டதற்கான காரணங்கள் தெரியவரும்.
நன்றி
Webdunia