சென்னை-வங்காளதேசம் இடையே கடலோர சரக்கு கப்பல் போக்குவரத்து நிதின் கட்காரி தொடங்கி வைக்கிறார்

சென்னை,

சென்னை-வங்காளதேசம் இடையேயான கடலோர சரக்கு கப்பல்
போக்குவரத்தை மத்திய கப்பல் போக்குவரத்து துறை மந்திரி
நிதின் கட்காரி காணொலி காட்சி மூலம் இன்று தொடங்கி வைக்கிறார்.

இது குறித்து இந்திய பத்திரிகை தகவல் அலுவலகம் வெளியிட்டுள்ள
செய்திக் குறிப்பில் கூறியிருப்பதாவது:-

புதிய உடன்பாடு

பிரதமர் நரேந்திரமோடி கடந்த 2015-ம் ஆண்டு ஜூன் மாதம் வங்காள
தேசத்தில் பயணம் செய்த போது, இந்தியாவுக்கும்,
வங்காளதேசத்துக்கும் இடையே கடலோர கப்பல் போக்குவரத்து
உடன்பாடு ஏற்படுத்தப்பட்டது.

இந்த ஒப்பந்தப்படி இந்திய துறைமுகங்களில் இருந்து வங்காளதேச
துறைமுகங்களுக்கு சரக்கு போக்குவரத்து என்பது கடலோர சரக்கு
போக்குவரத்தாக கருதப்படும்.

கடலோர ரோரோ கப்பல்கள் மூலம் கடலோரத்தில் இயக்கப்படும்
கப்பல்களுக்கு இந்திய துறைமுகங்களில் கப்பல் சார்ந்த மற்றும்
சரக்குகள் சார்ந்த கட்டணங்களில் 80 சதவீதம் சலுகை வழங்கப்படும்.

போக்குவரத்து கட்டணங்களையும் நேரத்தையும் சிக்கனமாக்குவது,
சர்வதேச சந்தைகளில் இந்திய பொருட்களின் போட்டியிடும்
தன்மையை மேம்படுத்துவது ஆகியன இத்திட்டத்தின் இறுதி
நோக்கங்கள் ஆகும்.

185 லாரிகள்

இந்த திட்டத்தின் படி, சென்னை துறைமுகத்தில் இருந்து
வங்காளதேசத்தில் உள்ள மோங்ளா துறைமுகத்துக்கு அசோக்
லைலேன்ட் நிறுவனம் 185 லாரிகளை ‘ரோரோ’ கடலோர
கப்பல்கள் மூலம் இன்று (சனிக்கிழமை) முதல் முறையாக அனுப்ப
உள்ளது.

இதனை கப்பல் போக்குவரத்து துறை மந்திரி நிதின் கட்காரி
டெல்லியில் இருந்து காணொலி காட்சி மூலம் காலை 10.30 மணிக்கு
தொடங்கி வைக்கிறார்.

அசோக் லைலேன்ட் நிறுவனம் இதுவரை லாரிகளை
வங்காளதேசத்துக்கு சாலை வழியாக அனுப்பி வந்தது. இதனை
கடல் வழியாக அனுப்பும்போது பயண நேரம் 15 நாட்கள் முதல்
20 நாட்கள் வரை குறைகிறது.

80 சதவீதம் உயரும்

அசோக் லைலேன்ட் நிறுவனம் தற்போது வங்காளதேசம், இலங்கை
மற்றும் ஆப்பிரிக்க நாடுகளுக்கு சுமார் 12 ஆயிரம் லாரி சேசிஸ்களை
அனுப்புகிறது. வரும் ஆண்டுகளில் வங்காளதேசம், இலங்கை
நாடுகளுக்கு அனுப்பப்படும் லாரிகளின் அளவு 80 சதவீதம் உயரும்
என எதிர்பார்க்கப்படுகிறது.

மேலும் மாதம் ஒன்றுக்கு 500-க்கும் மேற்பட்ட லாரிகள் கடல்
மார்க்கமாக ஏற்றுமதி ஆகும் என எதிர்பார்க்கப்படுகிறது.
இதனால் சாலை போக்குவரத்து நெரிசல் கணிசமாக குறையும்.

இவ்வாறு அதில் கூறப்பட்டுள்ளது.
-
------------------------தினத்தந்தி