ஜனவரி 1-ந் தேதி முதல் இயக்கப்படுகிறது மும்பையில் ‘குளு குளு’ மின்சார ரெயில்

**ayyasamy ram** · **ayyasamy ram** Thu Oct 26, 2017 5:36 am

மும்பை,

மும்பையில் ஜனவரி 1-ந் தேதி முதல் குளு குளு மின்சார ரெயில் இயக்கப்படும் என்று மத்திய மந்திரி பியூஸ் கோயல் அறிவித்தார்.

நாட்டின் நிதி தலைநகரான மும்பையில் தான் அதிகளவில் மின்சார ரெயில் சேவைகள் இயக்கப்பட்டு வருகின்றன.

குளு குளு மின்சார ரெயில்

மத்திய மற்றும் மேற்கு ரெயில்வேக்கள் சார்பில் இயக்கப்படும் இந்த ரெயில் சேவைகளை தினசரி 75 லட்சம் பயணிகள் பயன்படுத்தி வருகிறார்கள்.

இந்தநிலையில், கடந்த 2012-13-ம் ஆண்டு தாக்கல் செய்யப்பட்ட ரெயில்வே பட்ஜெட்டில் குளு, குளு பயணம் செய்யும் வகையில் மும்பையில் ஏ.சி. மின்சார ரெயில் சேவை அறிமுகப்படுத்தப்படும் என்று அறிவிக்கப்பட்டது. அதன்படி சென்னை ஒருங்கிணைந்த ரெயில் பெட்டி தொழிற்சாலையில் ரூ.54 கோடி செலவில் 12 பெட்டிகள் கொண்ட ஏ.சி. மின்சார ரெயில் தயாரிக்கப்பட்டது. இந்த ஏ.சி. மின்சார ரெயில் கடந்த ஆண்டு மும்பை வந்தடைந்தது.

சோதனை ஓட்டம்

சில்வர் மற்றும் நீல நிறத்தில் அழகான வடிவமைப்புடன் பயணிகளை ஈர்க்கும் வகையில் இருக்கும் இந்த ஏ.சி. மின்சார ரெயிலில் தொழில்நுட்ப மற்றும் மெக்கானிக்கல் சோதனைகள் குர்லா பணிமனையில் வைத்து நடத்தப்பட்டன. சோதனை ஓட்டங்களும் நடந்தன. ஏ.சி. ரெயில் மும்பையை வந்தடைந்து ஒரு ஆண்டு ஆகிவிட்ட போதிலும் இன்னும் சேவை மட்டும் தொடங்கப்படவில்லை.

முதன்முறையாக மும்பையில் ஏ.சி. மின்சார ரெயில் மேற்கு ரெயில்வே வழித்தடத்தில் சர்ச்கேட்- போரிவிலி இடையே இயக்கப்பட உள்ளது. ஏ.சி. மின்சார ரெயிலை இந்த மாதம் பயன்பாட்டிற்கு கொண்டு வருவதாக இருந்தது. ஆனால் சில தொழில்நுட்ப பிரச்சினைகள் காரணமாக அது முடியாமல் போனது.

புத்தாண்டு முதல்...

இந்தநிலையில், நேற்று மத்திய ரெயில்வே மந்திரி பியூஸ் கோயல் டெல்லியில் நிருபர்களுக்கு பேட்டி அளித்தார். அப்போது, மும்பையில் ஏ.சி. மின்சார ரெயில் வரும் ஜனவரி 1-ந்தேதி முதல், அதாவது புத்தாண்டு அன்று ஓடத்தொடங்கும் என்று அறிவித்தார்.

மேலும் அவர் கூறுகையில், ‘மும்பை ரெயில் நிலையங்களில் 370 நகரும் படிக்கட்டுகள் அமைக்க ஏற்கனவே அனுமதி அளிக்கப்பட்டு உள்ளது. பயணிகளின் பாதுகாப்பு கருதி ரெயில் நிலையங்கள் மற்றும் ரெயில்களிலும் கண்காணிப்பு கேமராக்கள் பொருத்தப்பட உள்ளது’ என்றார்.

மும்பையில் இயக்கப்பட உள்ள ஏ.சி. மின்சார ரெயில் கட்டணம் டெல்லி மெட்ரோ ரெயிலில் பயணிகளிடம் வசூலிக்கப்படும் கட்டண தொகைக்கு இணையாக அல்லது தற்போது வசூலிக்கப்படும் மின்சார ரெயிலின் முதல் வகுப்பு கட்டணத்தில் இருந்து 1.5 மடங்கு அதிகமாக இருக்கும் என ரெயில்வே அதிகாரிகள் தெரிவித்தனர்.

ஏ.சி. மின்சார ரெயில் இயக்கப்பட உள்ள மேற்கு ரெயில்வே வழித்தடத்தில் அதன் தலைமை அலுவலகமான சர்ச்கேட் முதல் தகானு வரை 37 புறநகர் மின்சார ரெயில் நிலையங்கள் உள்ளன. தற்போது தினசரி 1,201 மின்சார ரெயில் சேவைகள் இயக்கப்பட்டு வருகின்றன என்பது குறிப்பிடத்தக்கது.

------------------------------------
-தினத்தந்தி

ஜனவரி 1-ந் தேதி முதல் இயக்கப்படுகிறது மும்பையில் ‘குளு குளு’ மின்சார ரெயில்

ஜனவரி 1-ந் தேதி முதல் இயக்கப்படுகிறது மும்பையில் ‘குளு குளு’ மின்சார ரெயில்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக