குஜராத் சட்டசபை தேர்தல் டிசம்பர் 9, 14 என 2 கட்டமாக தேர்தல் நடத்தப்படும்

புதுடெல்லி

182 இடங்களைக் கொண்ட குஜராத் சட்டசபையின் பதவிக்
காலம் ஜனவரி 22-ந் தேதி முடிவடைகிறது. இதையடுத்து
அம்மாநில சட்டசபைக்கு தேர்தல் நடத்தப்பட இருக்கிறது.

புது டெல்லியில் நிருபர்களிடம் தலைமை தேர்தல் ஆணையர்
ஏ.கே. ஜோதி கூறியதாவது:-

குஜராத் மாநில சட்டசபையின் பதவிக் காலம் ஜனவரி 22-ந்
தேதி முடிவடைகிறது. குஜராத்தின் 182 தொகுதிகளுக்கும்
2 கட்டங்களாக தேர்தல் நடைபெற உள்ளன. இம்மாநிலத்தில்
மொத்தம் 50,128 வாக்குச் சாவடிகள் அமைக்கப்பட்டுள்ளன.
இதில் 102 அனைத்து மகளிர் வாக்குச் சாவடியாகும்.
தேர்தல் பாதுகாப்புப் பணியில் மத்திய படையினர்
ஈடுபடுத்தப்படுவர்.

குஜராத்தில் தேர்தல் நடத்தை விதிமுறைகள் தற்போது முதல்
அமலுக்கு வருகின்றன. வேட்பாளர்களின் தேர்தல் செலவினங்கள்
பறக்கும்படை மூலம் கண்காணிக்கப்படும். பதற்றமான வாக்குச்
சாவடிகளில் சிசிடிவி காமிராக்கள் பொருத்தப்படும்.

பதட்டமான வாக்கு சாவடிகளில் வாக்குப்பதிவு ஒளிப்பதிவு
செய்யப்படும். வாக்குப்பதிவு மையங்களில் வெப் கேமராக்கள்
பொருத்தப்படும்.

மொத்த வாக்காளர்கள் - 4.33 கோடி பேர்.
ஆண் வாக்காளர்கள் - 2.25 கோடி பேர்,
பெண் வாக்காளர்கள் - 2.08 கோடி பேர்..

20-29 வயதுக்கு உட்பட்டவர்கள் - 1 கோடி பேர், 30-39 வயதுக்கு
உட்பட்டவர்கள் - 1.12 கோடி பேர். முதல் முறை தேர்தலில்
வாக்களிப்பவர்கள் - 11.8 லட்சம் பேர்

ஒரு வேட்பாளர் அதிகபட்சமாக 28 லட்சம் செலவு செய்யலாம்.
செலவு கணக்குகளை வேட்பாளர்கள் தாக்கல் செய்ய வேண்டும்.
குஜராத் மாநிலம் தொடர்பான புதிய அறிவிப்புகள், திட்டங்களை
மத்திய அரசு மேற்கொள்ள கூடாது .

ஒவ்வொரு தொகுதியிலும் பெண்கள் வாக்களிக்க தனி
வாக்குச்சவாடி அமைப்பு. முழுவதும் பெண்களுக்கான, பெண்களே
நிர்வகிக்கும் வாக்குப்பதிவு மையங்கள் அமைக்கப்படும்.

குஜராத் சட்டசபை தேர்தல் முதல் கட்டம் 89 தொகுதிகளுக்கு
டிசம்பர் 9 ந்தேதியும் 2 வது கட்டமாக 93 தொகுதிகளுக்கு
டிசம்பர் 14 தேர்தல் நடத்தப்படும்.

வாக்கு எண்ணிக்கை டிசம்பர் 18 ந்தேதி நடைபெறும்.
இவ்வாறு அவர் கூறினார்.
-
-----------------------------------------------------
தினத்தந்தி