சினிமாவை வைத்து அரசியலா? சமூக வலைதளத்தில் கண்டனம்

அரசியலை மையமாக வைத்து, சினிமா உருவானது போய்,
சினிமாவை வைத்து, அரசியல் செய்யும் நிலை, தமிழகத்தில்
ஏற்பட்டு உள்ளதாக, சமூக வலைதளத்தில் விமர்சிக்கப்
படுகிறது.

விஜய் நடிப்பில், அட்லி இயக்கிய, மெர்சல் படம், தீபாவளிக்கு
திரைக்கு வந்தது. படத்தில் இடம் பெற்றுள்ள, ஜி.எஸ்.டி.,
மற்றும் மருத்துவ தொழில் தொடர்பான வசனங்கள்,
சர்ச்சையை ஏற்படுத்தி உள்ளன.

தமிழக, பா.ஜ., தலைவர்கள், மெர்சல் படத்திற்கு கண்டனம்
தெரிவித்து உள்ளனர். அதே நேரத்தில், காங்., - தி.மு.க., - பா.ம.க.
, - ம.தி.மு.க., உள்ளிட்ட கட்சிகள், பட வசனத்தை வரவேற்று
உள்ளன.

இதுவரை, மாநில தலைவர்கள் மட்டுமே பேசி வந்த நிலையில்,
காங்., துணைத் தலைவர், ராகுல், மெர்சலுக்கு ஆதரவாக,
'டுவிட்டரில்' கருத்து தெரிவித்துள்ளார்.

அவர், 'தமிழர்களின் ஆழமான கலாசாரத்தையும், மொழியையும்
வெளிப்படுத்தும், மெர்சல் போன்ற சினிமாக்களுக்கு எதிர்ப்பு
தெரிவித்து, தமிழ் மொழியை மதிப்பிழக்க செய்ய முயற்சிக்க
வேண்டாம்' என, கூறியுள்ளார்.

அதே போல், தி.மு.க., செயல் தலைவர், ஸ்டாலினும் மெர்சலுக்கு
ஆதரவாக, குரல் கொடுத்து உள்ளார்.இது தொடர்பாக, ஸ்டாலின்
, 'டுவிட்டரில்', 'விமர்சனங்களை நசுக்க முயலும், பா.ஜ.,வின்
முயற்சி, ஜனநாயகக் கொள்கைகளுக்கு எதிரானது.

தி.மு.க., எப்போதும், கருத்து சுதந்திரத்திற்கும், படைப்பு
சுதந்திரத்திற்கும், ஆதரவாக இருக்கும்' என, குறிப்பிட்டுள்ளார்.

'டெங்கு பாதிப்பு போன்ற பல பிரச்னைகள் இருக்கும் நிலையில்,
சினிமாவை வைத்து, தலைவர்கள், எதற்கு அரசியல் செய்கின்றனர்'
என, சமூக வலைதளங்களில், 'நெட்டிசன்'கள் கேள்வி எழுப்பி
உள்ளனர்.சமூக வலைதள விமர்சனம் வருமாறு:

சாதாரண மனிதன் கூறுவதை விட, பிரபலமானவர்கள் கூறும்
கருத்துக்கு வலு அதிகம். அதை, மெர்சல் நாயகன், விஜய்
நிரூபித்து உள்ளார். ஆனால், நடிகர்கள், படத்தில் பேசும்
வசனத்திற்கும், நிஜத்தில் நடந்து கொள்ளும் விதத்திற்கும்,
நிறைய வித்தியாசம் உண்டு.

விஜயும் அதற்கு விதிவிலக்கல்ல. கைதட்டலுக்காக பேசும்
வசனத்தில், உண்மையும் இருக்க வேண்டும்.இப்போதைக்கு,
மெர்சலால் டெங்கு காணாமல் போய் கொண்டிருக்கிறது.
தமிழக மக்களும், அரசியல் தலைவர்களும், ஆக்கபூர்வமான
விஷயத்தில் கவனத்தை செலுத்த வேண்டும்.
இவ்வாறு அதில் கூறப்பட்டுள்ளது.
-
-------------------------------
- நமது நிருபர் -தினமலர்