மயக்க மருந்தாக வி‌ஷ வாயுவை செலுத்தியதால் 14 நோயாளிகள் சாவு?

வாரணாசி,

பிரதமர் நரேந்திர மோடியின் தொகுதியான, உத்தரபிரதேச மாநிலம்,
வாரணாசியில் புகழ்பெற்ற பனாரஸ் இந்து பல்கலைக்கழகம் உள்ளது.
இதனுடன் இணைந்து சர் சுந்தர்லால் மருத்துவமனை செயல்பட்டு
வருகிறது.

கடந்த ஜூன் மாதம் 6–ந் தேதிக்கும், 8–ந் தேதிக்கும் இடையில்
14 அறுவை சிகிச்சை நோயாளிகள், இந்த சுந்தர்லால் மருத்துவமனையில்
உயிரிழந்துள்ளனர். வழக்கத்துக்கு மாறான இந்த சம்பவத்தில்,
அலகாபாத் ஐகோர்ட்டு விசாரணைக்கு உத்தரவிட்டது.
மத்திய, மாநில அரசுகளின் கூட்டு விசாரணைக்குழு அமைக்கப்பட்டது.

உத்தரபிரதேச மாநில உணவு பாதுகாப்பு மற்றும் மருந்து நிர்வாக
அமைப்பின் விசாரணையில், அந்த மருத்துவமனையில் மருத்துவ
ரீதியாக பயன்படுத்த தகுதியற்ற நச்சு வாயுவான நைட்ரஸ் ஆக்சைடு
நோயாளிகளுக்கு (மயக்க மருந்தாக) பயன்படுத்தப்பட்டுள்ளதாக
தெரிய வந்துள்ளது

இது பற்றி அதிகாரிகள் தரப்பில் கூறும்போது, ‘‘அலகாபாத்தை சேர்ந்த
தனியார் நிறுவனமான பேரர்ஹட் இண்டஸ்ட்ரியல் என்டர்பிரைசஸ்
சப்ளை செய்த வாயுதான், அறுவை சிகிச்சை நோயாளிகளின் சாவுக்கு
காரணமா என்பது பற்றி விசாரணை நடந்து வருகிறது’’ என்றனர்.

இதற்கிடையே தகவல் அறியும் உரிமை சட்டத்தின் கீழ் இந்த
விவகாரத்தில் எழுப்பப்பட்ட கேள்விக்கு அலகாபாத் உதவி மருந்து
ஆய்வாளர் கே.ஜி. குப்தா பதில் அளித்துள்ளார்.

அதில் அவர், சம்மந்தப்பட்ட வாயுவை வினியோகித்த நிறுவனம்,
நைட்ரஸ் ஆக்சைடு அல்லது ஆக்சிஜன் உற்பத்தி செய்வதற்கு உரிமம்
பெறவில்லை என்று தெரிவித்துள்ளார்.

இந்த நிறுவனத்தின் இயக்குனர் அசோக் குமார் பாஜ்பாய், அலகாபாத்
வடக்கு தொகுதி பாரதீய ஜனதா எம்.எல்.ஏ., ஹர்சவர்தன் பாஜ்பாயின்
தந்தை ஆவார்.

இந்த விவகாரம் குறித்து அசோக் குமார் பாஜ்பாயிடம் கேட்போது அவர்,
‘‘நைட்ரஸ் ஆக்சைடு உற்பத்தி செய்ய உரிமம் பெறவில்லை என்பது
உண்மைதான். ஆனால் நாங்கள் சப்ளை செய்த வாயுதான்,
சுந்தர்லால் மருத்துவமனையில் அறுவை சிகிச்சை நோயாளிகள் சாவுக்கு
காரணம் என்பதை ஏற்க மாட்டேன்.

இதே வாயுதான் லக்னோ கிங் ஜார்ஜ் மருத்துவ பல்கலைக்கழகத்துக்கும்,
அலகாபாத் மோதிலால் நேரு மருத்துவ கல்லூரிக்கும் சப்ளை
செய்யப்படுகிறது’’ என்றார்.
-
இருப்பினும் இந்த விவகாரம், உத்தரபிரதேசத்தில் பெரும் பரபரப்பை
ஏற்படுத்தி உள்ளது.
----------------------
தினத்தந்தி