நூலகரின் அர்ப்பணிப்பும், வாசகரின் அன்பளிப்பும்!

**krishnaamma** · **krishnaamma** Tue Mar 06, 2018 12:02 pm

நூலகரின் அர்ப்பணிப்பும், வாசகரின் அன்பளிப்பும்!

எங்கள் ஊர், ஒரு தேர்வு நிலை பேரூராட்சி தான்; ஆனால், இங்குள்ள கிளை நுாலகம், பெரு நகர நுாலகத்துக்கு இணையாக அனைத்து வசதிகளோடு, தினமும், 12 மணி நேரம் செயல்படுகிறது. ஒரு மணி நேரத்திற்கு, 10 ரூபாய் கட்டணத்தில் இணையதள சேவை மற்றும் நகல் எடுக்கும் வசதி செய்து தந்திருப்பதுடன், வாசகர்களுக்கு துாய்மையான குடிநீர், கழிப்பறை வசதி மற்றும் போட்டி தேர்வர்களுக்கென புத்தகங்களுடன், வாசிக்க தனி ஹால் உள்ளது. இந்த வளர்ச்சிக்கு காரணம், அர்ப்பணிப்பு உணர்வோடு பணிபுரியும் நுாலகரின் அயராத உழைப்பும், தொடர் முயற்சியும் தான்.

அரசு பணி மற்றும் போட்டி தேர்வுகளுக்கு விண்ணப்பித்த இளைஞர்களும், பெண்களும், தினமும் நுாலகத்துக்கு வந்து குறிப்பெடுத்து செல்வர். ஆறு மாதத்துக்கு முன், இந்த நுாலகத்திற்கு வந்த இளைஞர் ஒருவர், நுாலகத்தின் வசதிகளை பார்த்து, வியந்து பாராட்டி, 'போட்டி தேர்வுக்கு என்னை தயார்படுத்திக்க ஒரு பயிற்சி மையத்தில், சில ஆயிரம் ரூபாய்களை கட்டணமாக செலுத்தி சேர இருந்தேன்; ஆனால், இப்போது, தினமும் இங்கு வந்து குறிப்பெடுத்து தேர்வில் வெற்றியடையலாம் என்ற நம்பிக்கை ஏற்பட்டு விட்டது.

நுாலகத்துக்கு காணிக்கையாக, ஆயிரம் ரூபாயை பெற்றுக் கொள்ளுங்கள்...' என, தந்தார். அந்த இளைஞர், நாள் தவறாமல் நுாலகம் வந்து, கவனமாக படித்து, போட்டி தேர்வில் வென்று, அரசு பணியையும் பெற்றார்.

இந்நிலையில், ஒருநாள், நுாலகத்தில், மகாகவி பாரதியின் பிறந்த நாள் விழா நிகழ்ச்சி நடைபெற்றது. அப்போது, அங்கு வந்த அந்த இளைஞர், 'என்னை வெற்றியாளனாக்கிய இந்த நுாலகத்தின் வளர்ச்சிக்கு, 10 ஆயிரம் ரூபாயை நன்கொடையாக வழங்குகிறேன்...' என்று, பணத்தை நுாலகரிடம் கொடுத்தார். அங்கிருந்த பலரும், அவரை பாராட்டினர்.

எங்கள் ஊர் நுாலகரைப் போன்று, எல்லா நுாலகர்களும் தங்கள் பணியில் முனைப்பு காட்டினால், எண்ணற்ற இளைஞர்களை வெற்றியாளர்களாக உருவாக்க முடியும்!

ராஜா
திருக்கோவிலுார்.

நன்றி வாரமலர்

SK · SK Tue Mar 06, 2018 3:20 pm

நூலகரின் அர்ப்பணிப்பும், வாசகரின் அன்பளிப்பும்!

நூலகரின் அர்ப்பணிப்பும், வாசகரின் அன்பளிப்பும்!

Re: நூலகரின் அர்ப்பணிப்பும், வாசகரின் அன்பளிப்பும்!

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக