இது சகிப்பதில்லை.

முனைவர் ப.குணசுந்தரி · 18/07/2015

நிரந்தரமற்ற நிலையில்
கலக்கம்
மகிழ்ச்சி
குழப்பம்
இதுவரை சந்தித்தறியாத சூழல்

என் செயல் வழித்தடத்தில்
சிலரின் பார்வைகள்
சோற்றுக்காய் சண்டையிடும்
நாய்களின்
வெறிச்செயலை ஒத்திருக்கிறது.

தோற்றத்தில்தானே
கூழை என்றிருந்தால்
உள்ளமும் அப்படித்தான்
உதடு முணுமுணுக்கும்போதே
கண் வேறொன்றைத் தெரிவிக்கும்
கள்ளத்தனத்தை
முன்பு கண்டதில்லை.

தகுதி இங்கே
பணத்தால் தீர்மானிக்கப்படுகிறது.

என் முன்னோன்
எட்டெனச் சுட்டிய
மெய்ப்பாட்டினும் மிகையே
இவர்களின் பாவம்

இவர்களின் முகங்கள்
சட்டென மாறும் தோற்றத்தில்
வானிலையே
தோற்றுப் போகும்.

நேர்க்கோட்டில் சிலர்

யாராய் இருந்தால் என்ன
என்வேலை எனக்கு
என்றிருப்பவர்கள் சிலர்

ஐயோ இவர்களைப்
பகைத்துக் கொண்டால் இயலாதென
அடிவருடுபவர் சிலர்

தகுதியால் அன்றி
எப்படியாவது தன் சொல் அம்பலம் ஏற
பணத்தைச் செலவழிப்பவர்கள் சிலர்

என் செயலில்
இவர்களில் சிலரை
எப்பொழுதாவது பார்த்தால் சரி
எப்பொழுதுமே என்றால்
சகிக்கவில்லை.