ரூ.100 கோடி சொத்து, குழந்தையை கைவிட்டு துறவறம் செல்லும் தம்பதி

ஜெய்ப்பூர்:
ராஜஸ்தான் மாநிலத்தை சேர்ந்த ஒரு தம்பதி, 100 கோடி ரூபாய்
மதிப்புள்ள சொத்துக்களுடன், மூன்று வயது குழந்தையை கைவிட்டு,
துறவறம் மேற்கொள்ள முடிவு செய்துள்ளனர்.

ராஜஸ்தான் மாநிலத்தில், முதல்வர், வசுந்தரா ராஜே தலைமையில்,
பா.ஜ., ஆட்சி நடக்கிறது. இங்கு, சித்தோர்கர் மாவட்ட,
பா.ஜ., முன்னாள் தலைவர், அசோக் சந்தாலியா. இவரது மகள்
அனாமிகாவுக்கும், ம.பி., மாநிலத்தை சேர்ந்த சுமித் ரத்தோருக்கும்
நான்கு ஆண்டு களுக்கு முன் திருமணம் நடந்தது.
இவர்களுக்கு, மூன்று வயதில் ஒரு பெண் குழந்தை உள்ளது.

பிரிட்டனின் லண்டன் நகரில் ஏற்றுமதி, இறக்குமதி தொடர்பான
பட்டய படிப்பு முடித்த சுமித், அங்கேயே பணிபுரிந்து வந்தார்.
பெற்றோரின் வற்புறுத்தலின் பேரில், சில ஆண்டுகளுக்கு முன்,
நாடு திரும்பி, தந்தையின் தொழிலை கவனித்து வந்தார்.

பொறியியல் பட்டதாரியான அனாமிகா, ஆண்டுக்கு, 10 லட்சம்
ரூபாய் சம்பளத்தில் ஐ.டி., துறையில் பணியாற்றினார். திருமணத்திற்கு
பின், வேலையை துறந்து குடும்பத்தை கவனித்து வந்தார்.
இவர்களுக்கு, 100 கோடி ரூபாய் மதிப்புள்ள சொத்துக்கள் உள்ளன.

இந்நிலையில், ஆத்ம திருப்திக்காக, குழந்தை, குடும்பம் மற்றும்
சொத்துக்களை துறந்து, ஜைன குரு, ராம்லால் மஹாராஜின்
முன்னிலையில், 23ம் தேதி, துறவறம் மேற்கொள்வதாக,
சுமித் ரத்தோர், அனாமிகா அறிவித்துள்ளனர்.
-
இதுகுறித்து அனாமிகாவின் தந்தை கூறுகையில், 'மகள் மற்றும்
மருமகனின் துறவு முடிவை தடுத்து நிறுத்த, இரு தரப்பு குடும்பத்தினரும்
செய்த முயற்சி பலனளிக்கவில்லை; உள்ளுணர்வு உந்துதலால் துறவறம்
மேற்கொள்ள முடிவு செய்துள்ளனர்' என்றார்.
-
----------------------
தினமலர்