பக்கிங்காம் கால்வாயில் குவியும் வெளிநாட்டு பறவைகள் : மரக்காணத்தில் சுற்றுலா பயணிகள் ஆர்வம்

மரக்காணம்:
மரக்காணம் பக்கிங்காம் கால்வாயில் சதுப்பு நிலங்கள்
நிறைந்துள்ளதால் அங்கு வெளிநாட்டு பறவைகள் அதிகளவில்
குவிந்துள்ளது. இதனை காண வெளி மாவட்டம், மாநிலங்களில்
இருந்து பொதுமக்கள் அதிகளவில் வந்து செல்கின்றனர்.

மரக்காணம் பகுதியில் கந்தாடு, வட அகரம், வண்டிப்பாளையம்,
தேவிகுளம், பாலக்காடு, ஆத்திக்குப்பம், அனுமந்தை, கூனிமேடு,
ஊரணி உள்பட 100க்கும் மேற்பட்ட கிராமங்கள் உள்ளது.

இப்பகுதியில் ஏரிகள், குளம் உள்ளிட்ட நீர்நிலைகள் அதிகளவில்
இருக்கிறது. இந்த நீர்நிலைகள் அனைத்தும் பருவ மழையின்
போது நிரம்பிவிடும். இதுபோல் இங்கு சுமார் 15 ஆயிரம் ஏக்கர்
பரப்பளவில் பக்கிங்காம் கால்வாயில் சதுப்பு நிலங்களும்
அமைந்துள்ளது.

இந்த கால்வாயில் ஆண்டு முழுவதும் தண்ணீர் நிரம்பி இருக்கும்.
பருவகால மாற்றத்தின் காரணமாக இலங்கை, சீனா, பாகிஸ்தான்,
ரஷியா போன்ற நாடுகளில் இருந்து ஆண்டுதோறும்
40 ஆயிரத்துக்கும் மேற்பட்ட பல்வேறு இனங்களை சேர்ந்த
பறவைகள் இப்பகுதிக்கு வரும்.

இங்கு வரும் பறவைகள் நீர்நிலைகளில் கிடைக்கும் மீன், நண்டு,
இறால் போன்றவற்றை இரையாக்கி திறந்தவெளியில் சுற்றித்
திரியும். மேலும் இந்த பறவைகள் இப்பகுதியிலேயே கூடுகள்
கட்டி இனப்பெருக்கமும் செய்யும்.

இங்கு ஆயிரக்கணக்கான பறவைகள் திறந்தவெளியில்
சுற்றித்திரிவதை பார்க்க வெளியிடங்களில் இருந்தும் பொதுமக்கள்
அதிகளவில் வந்து செல்கின்றனர்.

இங்கு இனப்பெருக்கம் செய்து சுற்றித்திரியும் வெளிநாட்டு
பறவைகள் கோடை காலத்தில் மீண்டும் தங்களது நாடுகளுக்கே
சென்றுவிடும். இதனால் இப்பகுதியை பறவைகள் சரணாலயமாக
அறிவிக்க வேண்டும் என்று பொதுமக்கள், அரசியல் கட்சியினர்
கோரிக்கை விடுத்து வந்தனர்.

இதனை ஏற்று பறவைகள் சரணாலயம் அமைக்க நடவடிக்கை
எடுக்கப்படும் என்று அரசு அதிகாரிகள் கூறினர். இதனை
தொடர்ந்து பக்கிங்காம் கால்வாய் பகுதியில் கடந்த 4 ஆண்டுக்கு
முன் பல லட்சம் மதிப்பில் வனத்துறை சார்பில் மாங்குரோவ்
செடிகள், கருவேல மரங்களை நட்டனர்.

இந்த மரங்களும் தற்போது காடு போல் வளர்ந்துள்ளது.
நத்தக்குத்தி, கூழக்கடா, செந்நாரை உள்ளிட்ட பல்வேறு இனங்களை
சேர்ந்த வெளிநாட்டு பறவைகள் தற்போது அதிகளவில் வந்து
குவிந்துள்ளது.

இந்த பறவைகள் குறைந்தது 3 மாதங்கள் வரையில் தங்கி இனப்
பெருக்கம் செய்யும். ஆனால் இந்த ஆண்டு பருவமழை போதியளவு
பெய்யவில்லை. இதனால் ஏரிகள் உள்ளிட்ட நீர்நிலைகளில்
குறைந்த அளவில்தான் தண்ணீர் தேங்கி நிற்கிறது.

இந்த 3 மாத காலங்களுக்குள் நீர்நிலைகள் வறண்டு விட்டால்
இந்த பறவைகள் வேடந்தாங்கல் உள்ளிட்ட வேறு இடங்களுக்கு
சென்று விடும்.

இதனை தடுக்க பக்கிங்காம் கால்வாய் உள்ளிட்ட நீர்நிலைகளை
இன்னும் ஆழப்படுத்த அரசு நடவடிக்கை எடுக்க வேண்டும் என்று
சமூக ஆர்வலர்கள் வலியுறுத்தி உள்ளனர்.
-
-------------------------
தினகரன்