அவளுக்கு வயது ஏறாதுங்க! (ஒருபக்கக் கதை)

அவளுக்கு வயது ஏறாதுங்க! (ஒருபக்கக் கதை)

அவள் பெயர் மஞ்சுளா; தேன் ததும்பும் தேனடை! சிக்கென்ற உடல்! எங்கள் வீட்டுக்குக்கு எதிர் வீட்டில் இருந்தாள்! ’பள்ளிப்படிப்பைத் தொடர வேண்டாம்’ என அவர்கள் வீட்டில் நிறுத்திவிட்டார்கள்.

எங்கள் இருவர் பார்வையும் அவ்வப்போது மோதிக்கொண்டன!

ஒருநாள் அதிகாலை ஐந்துமணி!

நான் எங்கள் வீட்டு முகப்பில் உலாவலானேன் ! அவள் அப்போது அவர்கள் வீட்டைப் பெருக்கியதோடு , இருவரிடையே இருந்த ‘ இரசாயனப் பிணைப்பு’ தொடரவேண்டும் என்று அடுத்த வீட்டு வாசலையும் பெருக்கலானாள்!

நான் அப்படியே எங்கள் வீட்டு முகப்புக் கேட்டருகே வந்து நின்றேன்! அவளுக்கும் எனக்கும் கொஞ்ச தூரம்தான் !

நான் சற்றும் எதிர்பாராத வகையில் என்னருகே வந்தாள் ! வந்ததோடு நில்லாது, கேட்டுக் கம்பிக்குள் கையை விட்டு என்னை நோக்கி நீட்டினாள்!

‘காதலானது ஆணுக்குக் கோழைத்தனத்தையும் பெண்ணுக்கு வீரத்தையும் தருகிறது’ – எங்கோ படித்த வரிகள் எனக்கு நினைவுக்கு வந்தது!

நீட்டிய அவளின் கையை நான் பிடித்தேன் ! அவ்வளவுதான் சட்டென்று இழுத்துக்கொண்டு வீட்டுக்குள் போய்விட்டாள்!

எங்கள் பார்வைகள் அப்போது முதல், முறுக்குடன் அவ்வப்போது பின்னிக்கொண்டன!

பிறகு நான் எனது வேலைக்காகப் பெங்களூர் போய்விட்டேன் !

அங்கிருந்து என் நண்பர்களுக்குப் போன் செய்து , ‘அந்தவீட்டார் எப்படி இருக்காங்க? இந்தவீட்டார் எப்படி இருக்காங்க?’ என்று சுத்திச் சுத்தி விசாரிக்க முடிந்ததே தவிர, நான் உள்ளூர விசாரிக்கவேண்டிய என் மஞ்சுளா பற்றிக் கேட்க எனக்கு நாக்கு வரவில்லை!

ஓராண்டு ஓடியது !

ஊரிலிருந்து என்னைப் பார்க்க வந்த என் நண்பன் – அவனாகத்தான் – ஒவ்வொரு வீட்டு நிலையையும் சொல்லிவந்தபோது, ’மஞ்சுளாவுக்குக் கல்யாணம் ஆகிக் கணவன் வீடு போய் விட்டதையும் , போன ஊர் எந்த ஊர் என்று தனக்குத் தெரியாது என்றும் கூறினான்!

நல்ல வேளை நான் மஞ்சுளா மீது பாசப் பிணிப்பில் நான் இருப்பதை அவன் மோப்பம் பிடிக்கவில்ல!

இது நடந்து இருபது ஆண்டுகளுக்கு மேலாகிவிட்டன!

இன்றும் , தினமும் , நான் மஞ்சுளாவை நினைக்காத நேரமில்லை !
அன்று பார்த்த வாளிப்பான அந்த மஞ்சுளாவின் உடல் மட்டும் என் மனத்திரையை விட்டு அகலவே இல்லை!

அது சரி!

இத்தனை ஆண்டுகள் ஆகிவிட்டனவே, இன்றும் அவள் அந்தப் பழைய மேனியுடனா இருப்பாள்?

‘இருக்கமாட்டாள்’ என நீங்கள் சொல்லலாம்! ஆனால் என் மனத் திரையில் ஆடுவது அந்தப் பழைய மஞ்சுளாதானே?

அவளுக்கு வயது ஆகவே ஆகாதே!
***