வானம் வசப்படும்/மானுடம் வெல்லும்

வானம் வசப்படும் /மானுடம் வெல்லும்

ஆனந்தரங்கம் பிள்ளை பிரெஞ்சுக் கிழக்கிந்தியக் கம்பனியின் துபாசாகவும் துய்ப்ளெக்சு என்ற பிரெஞ்சு ஆளுநரின் மொழிபெயர்ப்பாளராகவும் பணியாற்றியவர். பதினெட்டாம் நூற்றாண்டு காலத்திய பிரெஞ்சு அரசு பற்றி அறிய உதவும் சிறந்த வரலாற்றுக் கருவூலமாகவும் ஆவணமாகவும் இலக்கியமாகவும் திகழக்கூடிய நாட்குறிப்புகளைத் தந்தவர். 1736 முதல் 1761 வரை ஏறத்தாழ இருபத்தைந்து ஆண்டுகள் நாட்குறிப்பு எழுதியுள்ளார். இவரது நாட்குறிப்பு அக்காலத்தில் நடந்த சமூக மாற்றங்கள், அரசியல் நிகழ்வுகள் , எளிய மக்களின் அன்றாட வாழ்க்கை போன்றவற்றின் பதிவாகத் திகழ்கிறது. பிரெஞ்சு ஆளுநர் துய்ப்ளெக்சின் அந்தரங்கப் பேச்சாளராகவும் மொழிபெயர்ப்பாளராகவும் பன்மொழிப் புலவராகவும் இருந்தவர் இவர்.

இந்த நாட்குறிப்புகளை அடிப்படையாகக் கொண்டு பிரபஞ்சன் அவர்கள், வானம் வசப்படும் மற்றும் மானுடம் வெல்லும் என்ற இரு நாவல்களை தந்துள்ளார். இவற்றில் வானம் வசப்படும் சாகித்திய அகாதமி விருதையும், மானுடம் வெல்லும் இலக்கிய சிந்தனை விருதையும் வென்றது. இவருடைய சொந்த ஊரும் கதைக்களமான அதே புதுச்சேரி.

இந்த நாவல்களை, மிகச் சுவாரசியமாக ஆக்குவது, எப்போதும் உள்ள ராஜா, ராணிக் கதைகளைத் தாண்டி,சாதாரணப் பொதுமக்களின் அன்றாட வாழ்க்கை முறையை நமக்குத் சொல்வதுதான். நம் முன்னோர்கள் 3/4 நூற்றாண்டுகளுக்கு முன் வாழ்ந்தவிதம் குறித்த தகவல்களை தேடி எடுத்து அதை விறுவிறுப்பான கதையாக ஆக்கி இருக்கிறார். கோழி திருடியவன் எப்படி பிடிபட்டான், அடிமைக்கு என்ன விலை, பாண்டிச்சேரியின் ஃப்ரெஞ்சு கவர்னர் கடலோரமாக உட்கார்ந்துகொண்டு கக்கூஸ் போகக் கூடாது என்று போட்ட சட்டம், தந்தைக்கும் மகனுக்கும் இடையேயான உறவு, கோவில் திருவிழாக்கள், பழக்கவழக்கங்கள், சடங்குகள் எவ்வாறிருந்தன என்று நிறைய வாழ்க்கை முறை தகவல்களை சொல்கிறார்.

நாம் இன்று ஏன் இப்படி இருக்கிறோம் என்று தெரிந்து கொள்ள வேண்டுமானால், நேற்று எப்படி இருந்தோம், என்று தெரிந்து கொள்வது கட்டாயத் தேவை. அந்த வகையில் நம் முன்னோரின் எளிய வாழ்வியல் சித்திரமிது.

இந்த நாவலை எனக்கு மேலும் சுவாரசியமாக்கியது, பிரபஞ்சனின் கீழ்கண்ட முன்னுரைதான்.

"தமிழில் தக்க வரலாற்றுப் புதினம் தோன்றவில்லையே என்கிற வசை என்னால் ஒழிந்தது!

முறுக்கு மீசையும், வஜ்ரம் போல் மேனியும் கொண்ட இளவரசன், கச்சைக்குள் அடங்காப் பெரும் ஸ்தனங்களைக் கொண்ட மஞ்சளழகியைக் கட்டிலில் சேர்த்த வீர சாகசம், இந்த தமிழ் தேசத்தில் வரலாற்றுப் புதினம் என்ற பெயரால் அழைக்கப்படுவது, தமிழர்க்குத் தலைக்குனிவு தரும் செயலேயாகும்."

பிடிக்குமானால் படியுங்கள்.

நேற்றே /www.eegarai.net/t138163-topic#1245855 இதை பதிவு செய்துள்ளீரே?

ரமணியன்