அமெரிக்காவை மிரட்டும் புதிய புயல் : நெருக்கடி நிலை அறிவிப்பால் பதற்றம்

வாஷிங்டன்:
அமெரிக்காவில், கடும் பாதிப்பை ஏற்படுத்திய,
'ஹார்வி' புயலை தொடர்ந்து, 'இர்மா- - 3' புயல் தாக்க
தயாராகி வருவதால், தேவையான முன்னெச்சரிக்கை
நடவடிக்கைகள் செய்யப்பட்டுள்ளன.


அமெரிக்காவின் டெக்சாஸ் மாகாணத்தில், ஹார்வி புயல்,
சமீபத்தில் கரையைக் கடந்தது. அப்போது, மணிக்கு, 215 கி.மீ.,
வேகத்தில், பலத்த காற்றுடன், 127 செ.மீ., மழை கொட்டி தீர்த்தது.

கடும் சேதம் : இதனால், 1.30 கோடி பேர் பாதிக்கப்பட்டனர்;
பல்லாயிரம் கோடி ரூபாய் அளவிற்கு இழப்பு ஏற்பட்டுள்ளது.
அங்கு, இயல்பு நிலை திரும்பவில்லை. இந்நிலையில்,
அமெரிக்காவை ஒட்டியுள்ள கரீபியன் கடல் பகுதியில், புதிய
புயல் உருவாகியுள்ளது.

'இர்மா' என பெயரிடப்பட்டுள்ள இந்த புயல், புளோரிடா உட்பட,
தென் மாகாணங்களை தாக்கும் என்றும், கடும் சேதத்தை
ஏற்படுத்தும் என்றும், வானிலை மையம் கூறி உள்ளது.
இதையடுத்து, அமெரிக்க அரசு, புளோரிடா மாகாணத்தில்
நெருக்கடியை நிலையை அறிவித்துஉள்ளது.

நடவடிக்கை : கடலோர பகுதிகளில் வசிக்கும் லட்சக்கணக்கான
மக்கள், பாதுகாப்பான இடங்களில் தங்க வைக்கப்பட்டுள்ளனர்.
மரங்களும், மின் கம்பங்களும் சாயும் வாய்ப்புள்ளதால்,
சம்பந்தப்பட்ட துறையினர் தேவையான நடவடிக்கை எடுத்து
வருகின்றனர்.

கடைகளில், நீண்ட வரிசையில் காத்திருந்து தேவையான உணவு
பொருட்களை, மக்கள் வாங்கி செல்கின்றனர். அமெரிக்கா
அருகே உள்ள மற்ற நாடுகளிலும், புயல் பாதிப்பை ஏற்படுத்த
வாய்ப்புள்ளது.-
------------------------------------
தினமலர்