காதலாவது கத்தரிக்காயாவது ! (ஒருபக்கக் கதை)

காதலாவது கத்தரிக்காயாவது ! (ஒருபக்கக் கதை)

பம்பாயின் வெளிப்புறத்தில் அமைந்திருந்தது அப் பள்ளிக்கூடம். அதில் மிஸ்ரா என்றொரு இந்திப் பண்டிட் புதிதாக வேலைக்குச் சேர்ந்தார். சேர்ந்த புதிதில் வேட்டி சட்டைதான் போட்டிருந்தார்.
சில நாட்களில் அங்கே ஆங்கில ஆசிரியை ஒருத்தி (அவள் பேர் மேரி) புதிதாகச் சேர்ந்தாள் வேலைக்கு. மிஸ்ராவின் அறையிலிருந்து பார்த்தால் மேரி தங்கியிருக்கும் அறை தெரியும். மிஸ்ரா மாலை நேரங்களில் அவரது அறை வாசலில் நிற்க, மேரி அவளது அறை வாசலில் நிற்க இருவர் பார்வைகளும் பொருந்தின!

பார்வைகள் தொடரவே , மிஸ்ரா வேட்டியைக் கடாசிவிட்டு பேண்ட் டி சர்ட் அணிய லானார்; செருப்பு அணிந்த அவரின் கால்கள் வெள்ளை கேன்வாஸ் ஷூ அணிந்தன! கண்களுக்குக் கூலிங் கிளாஸ்! மிஸ்ராவின் நடையில் ஒரு துள்ளல் தெரிந்தது; மேரியின் உடைகளிலும் மாற்றம் ! மெல்ல மிஸ்ரா சக ஆசிரியர்களிடம் தனது காதலை வெளிப்படுத்தினார்!

பள்ளி ஆண்டுத் தேர்வு முடிந்ததும் , மேரியைக் கூப்பிட்டு , “இந்தாம்மா! விடுப்பில் போன சிஸ்டர் வந்துட்டாங்க! அதனால உனது வேலை இந்த மாதத்தோடு முடிகிறது” என்று வீட்டுக்கு அனுப்பிவிட்டார்கள்!

நொந்து போனார் மிஸ்ரா! அவரால் அங்கு வேலைசெய்யப் பிடிக்கவில்லை! வேலையிலிருந்து அவரது கவனம் சிதறலாயிற்று ! பாடம் நடத்துவது, விடைத்தாள் திருத்துவது என்று எல்லாவற்றிலும் தவறு செய்யலானார்! ஆண்டு முடிவில் மிஸ்ராவையும் வெளியேற்றியது நிர்வாகம் ! மிஸ்ரா அவரது தந்தைபார்த்த கத்தரிக்காய்க் கடைக்கே போய்ச் சேர்ந்துவிட்டார் !

காதலர் இருவரும் ஒருவரோடு ஒருவர் போனில் பேசிக்கொண்டார்கள்; அன்புப் பிணைப்பு கூடியது ! மேரி ஒருநாள் மிஸ்ராவைப் பார்த்துக் காதலை நிறைவேற்ற எண்ணம் கொண்டாள் !

மிஸ்ராவின் தந்தை கடையை நெருங்கிய மேரியின் முகம் சுருங்கியது ! கத்தரிக்கய்க் கடையில் , தரையில் சாக்கை விரித்து , அதன் மேல் குவிக்கப்பட்டிருந்த கத்தரிக்காய்க் குவியலிலிருந்து , நிறுத்து நிறுத்துப் போட்டுக்கொண்டிருந்தார் மிஸ்ரா! தலையெல்லாம் கலைந்து , தாடி மீசையுடன் , வெற்றிலைபாக்கு வாயுடன் மிஸ்ராவைப் பார்க்கச் சகிக்கவில்லை மேரிக்கு ! பழைய வெள்ளைக் கேன்வாஸ் ஷோபோட்ட , துள்ளலான மிஸ்ராவை அல்லவா மேரி பார்க்கப் போனாள்?அதற்கு மாறான மிஸ்ராவைச் சற்று தூரத்திலே கண்டதும் ,அதற்குமேல் அவள் கால்கள் மிஸ்ராவை நெருங்க அனுமதிக்கவில்ல!காலுக்குள்ளும் மூளை இருக்கிறதோ?

பேசாமல் திரும்பி வந்தவழியே போய்விட்டாள்!

நமக்காக மிஸ்ராவுக்கு வேலை போனதுபற்றியெல்லாம் அப்போது அவளுக்கு நினைக்கத் தோன்றவில்லை! ‘காதலாவது கத்தரிக்காயாவது’ என்று அவளது மனம் அவளின் கன்னத்தில் விட்ட அறைதான் பெரிதாக வலித்தது அவளுக்கு அப்போது !

மேரியும் மிஸ்ராவும் சேர்வது தவறன்றோ !
...மேரியும் மிஸ்ராவும் வெவ்வேறு மதமன்றோ !
எரியும் கடலும் சேர்ந்திட ஒல்லுமோ ?
...ஏமாந்தது மிஸ்ரா என்பதில் ஐயமோ !
பூரியும் கிழங்கும் சேர்ந்தே சுவைபயக்கும்
....பூரியுடன் சட்னி  சேர்ந்தால் சுவைக்காது !
காரியே துப்பினும் காதலர் திருந்திடார்
...கண்டதும் காதல் எந்நாளும் தீமையே !