கிளின்டனை போல் சிக்கினார் "டைகர் உட்ஸ்"

நியூயார்க்:
கோல்ப் வீரர் டைகர் உட்ஸ் வசமாக சிக்கிக் கொண்டுள்ளார். இவர், அமெரிக்க
முன்னாள் அதிபர் பில் கிளின்டன் போல் பல பெண்களுடன் தொடர்பு வைத்திருந்தது அம்பலமாகியுள்ளது. இதையடுத்து தனது செயலுக்காக மன்னிப்பு கேட்டுள்ளார்.

உலகின் "நம்பர்-1' கோல்ப் வீரர் அமெரிக்காவின் டைகர் உட்ஸ்(33). சமீபத்தில் புளோரிடாவில் உள்ள இவரது வீட்டின் அருகே கார் விபத்தில் சிக்கி, காயமடைந்தார். இவரது மனைவி எலின் நார்டிகிரன் தான் காப்பாற்றினார். ஆனாலும் டைகர் உட்சின் "கேர்ள் பிரண்ட்' ரேச்சல் உகிடெல் தான் பிரச்னைக்கு காரணம் என கூறப்பட்டது. இது தொடர்பான மோதலில் மனைவி எலின் தாக்கியதில் தான் டைகர் உட்ஸ் முகத்தில் ஆங்காங்கே கீறல் உட்பட காயம் ஏற்பட்டதாக வேறுவிதமாக செய்திகள் வெளியாயின.


மன்னிப்பு: இந்த பிரச்னை முடிவதற்குள் "காக்டெயில் வெயிட்ரஸ்'(மது பரிமாறுபவர்) ஆக பணிபுரியும் 24 வயதான ஜெய்மி கிரப்ஸ், டைகர் உட்சுடன் 31 மாதங்கள் தொடர்பு வைத்திருந்தாக கூறினார். இதற்கான ஆதாரங்கள் இருப்பதாக கூற, கதிகலங்கிப் போனார் உட்ஸ். உடனே தனது வெப்தளத்தில் தவறான "உறவுகளை' மறைமுகமாக ஒத்துக் கொண்ட இவர், மன்னிப்பும் கேட்டுள்ளார். அதில் உட்ஸ் கூறியிருப்பதாவது: குடும்ப கட்டுப்பாட்டை மீறி செயல்பட்ட நான் மாபெரும் தவறு செய்து விட்டேன். இதற்காக மனப்பூர்வமாக மன்னிப்பு கேட்டுக் கொள்கிறேன். எனது குடும்பத்துக்கு ஏற்றபடி உண்மையாக நடந்து
கொள்ளவில்லை. நான் குற்றமற்றவன் அல்ல. தவறுகள் செய்துள்ளேன். நல்ல கணவராக, தந்தையாக இருக்க முயற்சிப்பேன். எனது தனிப்பட்ட பாவங்களை
"மீடியாவுக்கு' தெரிவிக்க வேண்டிய அவசியமில்லை. குடும்ப பிரச்னைகளை
பகிரங்கமாக ஒத்துக் கொள்ள வேண்டியதில்லை. எனது நடத்தை தொடர்பான விஷயங்களை குடும்பத்துடன் மட்டும் பகிர்ந்து கொள்கிறேன்,'' என, குறிப்பிட்டுள்ளார்.


மூன்றாவது பெண்: இதற்கிடையே உட்சுடன் தொடர்பு இருப்பதாக மூன்றாவதாக ஒரு பெண் புறப்பட்டுள்ளார். 27 வயதான இவரது பெயர் கலிகா மகியுன். லாஸ்வேகாசில் உள்ள "பாங்க் நைட் கிளப்பில்' மார்கெட்டிங் மானேஜராக பணியாற்றுகிறார். இவரிடம் நெருக்கமாக பழகிய உட்ஸ், "தனது திருமண வாழ்க்கை மகிழ்ச்சியாக இல்லை' என்று புலம்பியுள்ளாராம்.


கிளின்டன் வழியில்: சர்ச்சைக்குரிய கார் விபத்தில் வெறும் அபராதத்துடன் தப்பிய டைகர் உட்ஸ், பெண்கள் பிரச்னையில் முன்னாள் அமெரிக்க அதிபர் பில் கிளின்டனை போல மாட்டிக் கொண்டுள்ளார். ஜெனிபர் பிளவர்ஸ், பாலோ ஜோன்ஸ், காத்லின் வில்லி, ஜுவனிதா பிரடரிக், மோனிகா லெவின்ஸ்கி ஆகியோருடன் கிளின்டன் தொடர்பு வைத்திருந்தார். இதில் மோனிகா லெவின்ஸ்கியுடன் ஏற்பட்ட உறவு தான், இவரது அதிபர் பதவிக்கே ஆபத்து ஏற்படுத்தியது.


விளையாட்டு அரங்கை பொறுத்தவரை கோபி பிரையன்ட்(கூடைப்பந்து), போரிஸ் பெக்கர்(டென்னிஸ்), இயான் போத்தம்(கிரிக்கெட்), டேவிட் பெக்காம்(கால்பந்து), ஷேன் வார்ன்(கிரிக்கெட்) போன்றவர்கள் திருமணத்துக்கு பின் வேறு பெண்களுடன்
தொடர்பு வைத்து சிக்கலில் மாட்டிக் கொண்டனர்.