தென்னங்கீற்று !

1975-ல் வெளிவந்த இந்த திரைப்படம் 25 வயதான பிறகும் பருவமடையாத ஒரு பெண்ணின் வாழ்க்கையை நடைமுறை சிக்கல்களுடன் விவாதிக்கிறது. ஒரு பெண் 25 வயதில் திருமணம் ஆகாமல் இருப்பதே பெரும் சுமையாக நினைக்கும் சமூகம் நம்முடையது. இந்த சூழலில் வயதிற்கு வராமல் இருந்தால் ?

கதாப்பாத்திரங்கள் அதன் போக்கிலேயே இருக்க அனுமதிக்கப்படுகின்றன. யாருக்கும் அதிக முக்கியத்துவம் தரப்படவில்லை. யாரையும் எதிர்மறையாக காட்டவில்லை. சூழல்களைக் கொண்டே கதை நகர்கிறது. நடிகை சுஜாதாவிற்கு பொருத்தமான கதாப்பாத்திரம் (வசுமதி ) . நல்ல நடிப்பு. விஜயகுமார் (சந்தானம் .. சந்தான் , சந்தான் என்றே அழைக்கிறார்கள் ), சலனமில்லாத நடிப்பை வெளிப்படுத்தியுள்ளார். குழந்தைகளுக்கு பெயர் வைக்க நினைப்பவர்கள் இந்த இரண்டு பெயர்களை பரிசீலனை செய்யலாம் வசுமதி , சந்தான்.

இத்திரைப்படத்தில் இடம்பெற்ற சில வசனங்கள்.

"வேற டாபிக் பற்றி பேசுங்க? "

"திமுக பற்றியா ? அதிமுக பற்றியா ?"

"Life is full of unexpected happanings "

"திருமணங்கள் நரகத்தில் தான் நிச்சயிக்கப்படுகின்றன "

நிறைய வசனங்கள் ஆங்கிலத்தில் உள்ளன. மேட்டுக்குடி வாழ்க்கையைப் பற்றி சொல்வதால் இருக்கலாம். இயற்கை என்ற வார்த்தை பல இடங்களில் வருகிறது. மருத்துவ பரிசோதனைகள் தொடர்ந்தாலும் வசுமதி கதாப்பாத்திரத்தை புறக்கணிக்காமல் சமூகத்துடன் இணைந்து இயங்கச் செய்ய முயற்சி செய்கிறார்கள். சரியான புரிதலுடன் திருமணமும் நடக்கிறது. இன்றும் இந்த சூழலைச் சந்திக்கும் பெண்கள் இருக்கிறார்கள். சரியான புரிதல் ஏற்பட்டுள்ளதா என்றால் இல்லை என்றே பதில் கிடைக்கும்.

படத்தின் இயக்குநர் கோவி.மணிசேகரன் என்று பார்த்தபோதே எங்கோ கேள்விப்பட்டாத ஞாபகம். தேடியதில் தெரிந்தது அவர் சாகித்ய அகாடமி விருது பெற்ற எழுத்தாளர் என்று. படத்தின் இறுதிக்காட்சி தான் வேண்டுமென்றே திணிக்கப்பட்டது போல் தோன்றியது. இப்படி தோன்றுவதற்கு நேர்மறையான முடிவை எதிர்பார்க்கும் மனநிலை கூட காரணமாக இருக்கலாம். ஆனால், இந்த திரைப்படம் நேர்மறையாக முடிந்திருந்தால் இன்னும் நன்றாக இருந்திருக்கும்.

பெண்ணிய சிந்தனைகளை , பெண்களின் சிக்கல்களை வைத்து எழுபதுகளில் நிறைய திரைப்படங்கள் வந்திருக்கும் போலவே. இத்திரைப்படமும் கருப்பு - வெள்ளையில் தான் எடுக்கப்பட்டுள்ளது.
கருப்பு -வெள்ளை திரைப்படங்கள் மீதான காதல் கூடிக்கொண்டே தான் போகிறது.

உரையாடல்களை மையமாக வைத்து வெளிநாடுகளில் நிறைய திரைப்படங்கள் எடுக்கப்படுகின்றன. தமிழில் அவ்வாறான முயற்சி குறைந்த அளவிலேயே இருந்துள்ளது. அவள் அப்படித்தான் திரைப்படம் ஒரு சிறந்த உதாரணம் .அடுத்தடுத்த உரையாடல் மூலமே திரைகதை நகரும். இந்த தென்னங்கீற்று படமும் அப்படியே உரையாடல் மூலமே நகர்கிறது.

இப்போதும், பெண்ணிய கருத்துகளை மையமாக வைத்து எடுக்கப்பட்ட ஒரு திரைப்படம் வெற்றிபெற்று விட்டால் அடுத்தடுத்த பெண்ணிய திரைப்படங்களை எதிர்பார்க்கலாம்.

#தென்னங்கீற்று
#கோவிமணிசேகரன்