கடிதமல்ல… கண்ணீர்!

**ayyasamy ram** · **ayyasamy ram** Mon Aug 07, 2017 8:28 am

-

–
கருவறை விடுத்தபோது எனைத்
தூக்கி அரவணைத்தாள் அன்னை…
வகுப்பறையில் நுழைந்தபோது என் தோளில்
கைப்போட்டு அரவணைத்தாய் நீ!
–
அறிமுகம் செய்தேன் உன்னை…
என் உள்ளத்திற்கும், இல்லத்திற்கும்
ஆருயிர் நண்பன் நீதானென்று!
–
கல்லூரி வாழ்க்கை வந்தது
உடன் காதலும் வந்தது…
எனக்கொரு ஆசை
அவளை பிரிந்திடக் கூடாதென்று…
அவளுக்குமோர் ஆசை
நான் உன்னை
பிரிய வேண்டுமென்று…
பிரிந்தேன்
உன்னிடமிருந்து அல்ல
நம் நட்பை அறியாத
அவளிடமிருந்து!
–
ஒவ்வொரு நாளும்
டீ கடை அரட்டைகள்
சினிமா தியேட்டரில் ரசிகனாய்
நாம் ஆடிய ஆட்டங்கள்…
விளையாட்டில் நாட்டின் வெற்றிக்காக
பட்டாசு வெடித்த கும்மாளம்…
நினைக்க நினைக்க
கண்ணீருடன் இப்போதும் புன்னகைக்கிறேன்!
–
குடும்பச் சுமை தோள்மீது
நம் பாதைகளும் பிரிந்தது…
உன்னை சந்திக்கும் வாய்ப்பும்
குறைந்தது!
–
மனைவி, குழந்தைகள்
என்று பல பந்தங்கள் வந்தாலும்
என்றும் என்மனம் உன்னை
சந்திக்கும் நாளுக்காகத்தான் காத்திருந்தது!
–
இமைகள் திறப்பதற்குள் இத்தனை
ஆண்டுகள் கடந்து விட்டோம்
உன் இடமறிந்து உனைக்காண
ஆவலுடன் புறப்பட்டேன் ஒருநாள்…
வழியில் தலைசுற்றி விழுந்தேன்
மருத்துவமனையில் விழித்தேன்
பின்தான் அறிந்தேன்
வாழ்வின் எல்லையில் உள்ளேனென்று!
–
என் இதயத்தின் பணி
எப்போது முடியுமோ…
இறுதியாய் எனக்குள் இருப்பது
ஓர் ஆசை தான்…
பள்ளிப் பருவத்தில்
என் கண்ணீரை துடைத்து
தோள் கொடுத்த தோழனே…
நாளை என் இறுதி சடங்கில்
என் பாடைக் கம்பிற்கும் தோள் கொடுப்பாயா!
–
————————–
— கி.பாலாஜி, மதுரை.
வாரமலர்

கடிதமல்ல… கண்ணீர்!

கடிதமல்ல… கண்ணீர்!

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக