கல்வியில் சிறக்கச் செய்யும் கண்ணன்

பழமையான ஆலயங்களுள் ஒன்றாகத் திழ்கிறது, 
நன்னிலம் வேணுகோபால சுவாமி கோயில்.

நன்னிலம் தேவாரத் தலம், இங்குள்ள மதுவனேஸ்வரர் 
கோயில் பாடல் பெற்றது. இக்கோயிலுக்கு கிழக்கே
கூப்பிடு தூரத்தில் உள்ளது இந்த வேணுகோபால சுவாமி 
கோயில், 

சமீப காலத்தில் திருப்பணி கண்டு புதுப் பொலிவுடன் 
விளங்கும் கோயில், உள்ளே நுழைந்தால் பெரிய 
மண்டபம், இது பக்தர்கள் வசதிக்காக தற்போது கட்டப்
பட்டதாம்.

ஒரே சுற்றுப் பிராகாரம் ரொம்ப விசாலம். 
முன் மண்டபத்தில் முதலில் தென்படுவது பலிபீடம், 
அடுத்து கருடாழ்வார், கூப்பிய கரத்துடன் மூலவருக்கு 
அஞ்சலி செலுத்துகிறார். 

அவருக்கு நமது அஞ்சலியைத் தெரிவித்து விட்டு, மேலே 
நடந்தால் மகா மண்டபம். இதன் வலது பக்கத்தில் 
ஆஞ்சநேயம் சந்நதி தெற்கு நோக்கி உள்ளது.

அடுத்து அர்த்த மண்டப நுழைவாயில், இடது புறம் 
லட்சுமிநாராயணன், வலது புறம் நாகராஜன் உள்ளனர். 
அதையொட்டி கிருஷ்ணர் - ராதை மரச்சிற்பமாக பெரிய 
வடிவில் விளங்குகின்றனர் அழகிய சிற்பம்.

பெரிய மண்டபக்கூரை மீது கிருஷ்ணர் கோபிகைகள்
 நடனக்காட்சி ஓவியமாக உள்ளது.

கருவறையில் மூலவர் நின்ற கோலத்தில் 
எழுந்தருளியுள்ளார். அவருக்குக் கீழே உற்சவர் குழல் 
ஏந்திய கண்ணனாக, பாமா ௦- ருக்மணியுடன் உள்ளார். 

அழகிய திருக்கோலம். மணப்பேறு, மகப்பேறு அருளும் 
பெரு வரப்பிரசாதி. பிராகாரத்தை வலம் வரும்போது 
தொன்மையான கிணறும், துளசி மாடமும் உள்ளன. 
மார்கழி மாதம் ராதா கல்யாண உற்சவம் இங்கே மிகச் 
சிறப்பாக நடத்தப்படுகிறது.

அதுவும் இன்று, நேற்றல்ல, கடந்த முந்நூறு ஆண்டுகளாகவே 
இந்த ராதா கல்யாண உற்சவம் இக்கோயிலில் தொடர்ந்து 
நடைபெற்று வருகிறதாம். இவ்வூரிலிருந்து வேறுவேறு 
நகரங்களில் சென்று குடியேறி வசிப்பவர்கள் எல்லாம் 
மேற்படி திருவிழாவிற்கு இவ்வூருக்கு வந்து விழாவை 
சிறப்புற நடத்தித் தருகிறார்களாம்.

இங்குள்ள பள்ளி மாணவ, மாணவிகள் எல்லோரும் 
மேற்படி கிருஷ்ணரின் பக்தர்கள். பரீட்சைக்குச் செல்லும் 
போது இவரை வணங்கிச் சென்றால் பாய்ஸ்சும் கேர்ள்சும் 
சாய்ஸ்சில் எந்தக் கேள்வியையும் விடாமல் பதில் எழுதி, 
அதிக மதிப்பெண்கள் பெற்று பாஸ் பண்ணி 
விடுவார்களாம். 

ராம பக்தர்களும் இவரை வந்து வணங்கிச் செல்வதால் 
ஊருக்கு ஒரே ராமர், ஒரே கிருஷ்ணர் இவர்தான்.

எங்கே இருக்கு: 
திருவாரூர் மாவட்டம், நன்னிலம் கீழ அக்ரஹாரத்தில் 
இந்த ஆலயம் உள்ளது.

தரிசன நேரம்: காலை 8-11; மாலை 5-8

--------------------------------
- ஆர்.சி. சம்பத்
நன்றி- குமுதம் பக்தி
தினமலர்-பிற இதழ்கள் பகுதியில் படித்தது