புதிய ஜனாதிபதியாக ராம்நாத் கோவிந்த், 71 இன்று பதவியேற்கிறார்

புதிய ஜனாதிபதியாக ராம்நாத் கோவிந்த், 71 இன்று பதவியேற்கிறார்





புதுடில்லி: நாட்டின் புதிய ஜனாதிபதியாக ராம்நாத் கோவிந்த், 71 இன்று பதவியேற்கிறார். பார்லிமென்ட்
மைய மண்டபத்தில் இன்று நடக்கும் நிகழ்ச்சியில் ராம்நாத் கோவிந்திற்கு சுப்ரீம் கோர்ட் தலைமை நீதிபதி
பதவிப் பிரமாணம் செய்து வைக்கிறார். அடுத்த ஐந்து ஆண்டுகளுக்கு நாட்டின் முதல் குடிமகன் பதவியை
ராம்நாத் கோவிந்த் அலங்கரிப்பார்.

ஜனாதிபதியாக இருந்த பிரணாப் முகர்ஜியின் பதவிக்காலம் முடிவடைவதால் புதிய ஜனாதிபதியை
தேர்ந்தெடுப்பதற்கான தேர்தல் சமீபத்தில் நடந்தது.

இதில் மத்தியில் ஆளும் பா.ஜ., தலைமையிலான தே.ஜ., கூட்டணி சார்பில், ராம்நாத் கோவிந்த் வேட்பாளராக களமிறக்கப்பட்டார். அவருக்கு போட்டியாக காங்., தலைமையிலான எதிர்க்கட்சிகள் கூட்டணி சார்பில் லோக்சபா
முன்னாள் சபாநாயகர் மீரா குமார் நிறுத்தப்பட்டார்.

பிரமாண்ட விழா
இந்த தேர்தலில் ராம்நாத் கோவிந்த் 65 சதவீத ஓட்டுகளை பெற்று அமோக வெற்றி பெற்றார். இதற்கிடையே
ஜனாதிபதி பிரணாப் முகர்ஜியின் பதவிக்காலம் நேற்றுடன் முடிவடைந்தது. இதையடுத்து பார்லிமென்டின் மைய
மண்டபத்தில் இன்று நடக்கும் விழாவில்நாட்டின் 14வது ஜனாதிபதியாக ராம்நாத் கோவிந்த் பதவியேற்க உள்ளார்.
அவருக்கு சுப்ரீம் கோர்ட் தலைமை நீதிபதி ஜே.எஸ்.கேஹர் பதவிப் பிரமாணம் செய்து வைக்கிறார்.
இந்நிகழ்ச்சியில் ஆளுங்கட்சி மற்றும் எதிர்க்கட்சிகளைச் சேர்ந்த தலைவர்கள், அமைச்சர்கள் உள்ளிட்டோர் பங்கேற்க
உள்ளனர். புதிய ஜனாதிபதியாக ராம்நாத் கோவிந்த் பதவியேற்பதையொட்டி ஜனாதிபதி மாளிகையில் பிரமாண்ட
விழாவுக்கு ஏற்பாடுகள் செய்யப்பட்டு உள்ளன.

பதவியேற்பு இப்படித்தான்!
புதிய ஜனாதிபதியாக பதவியேற்கவுள்ள ராம்நாத் கோவிந்த் ஜனாதிபதி மாளிகையின் முன் பகுதியில் உள்ள
மைதானத்துக்கு ராணுவ செயலர் உள்ளிட்டோரால் அழைத்து வரப்படுவார். இதன்பின் ராம்நாத் கோவிந்தும்,
முந்தைய ஜனாதிபதி பிரணாப் முகர்ஜியும் பாரம்பரிய பாதுகாப்பு வாகனங்கள் புடை சூழ காரில் பார்லிமென்டிற்கு
அழைத்துச் செல்லப்படுவர். பார்லிமென்டில் இருவரையும் லோக்சபா சபாநாயகர், ராஜ்யசபா தலைவராக உள்ள
துணை ஜனாதிபதி ஆகியோர் வரவேற்பர்.

இதையடுத்து அவர்கள் பார்லிமென்டின் மைய மண்டபத்துக்கு பாதுகாப்பாக அழைத்துச் செல்லப்படுவர்.
நாட்டின் புதிய ஜனாதிபதியாக ராம்நாத் கோவிந்திற்கு தலைமை நீதிபதி ஜே.எஸ்.கேஹர் பதவிப் பிரமாணம்
செய்து வைப்பார்.

கேஹர் இல்லாதபட்சத்தில் சுப்ரீம் கோர்ட்டின் மூத்த நீதிபதி முன்னிலையில் ராம்நாத் கோவிந்த் பதவியேற்பார்.

பதவிப் பிரமாண நிகழ்ச்சி முடிந்ததும் ஜனாதிபதியின் பாதுகாவலர்கள் ராம்நாத் கோவிந்தை ஜனாதிபதி
மாளிகைக்கு அழைத்துச் செல்வர். அதன்பின் ஜனாதிபதி பதவியில் இருந்து ஓய்வு பெற்ற பிரணாப் முகர்ஜி
ஜனாதிபதி மாளிகையை ராம்நாத் கோவிந்திற்கு சுற்றிக் காட்டுவார்.

அதை தொடர்ந்து டில்லி ராஜாஜி மார்க் பகுதியில் உள்ள புதிய இல்லத்திற்கு பிரணாப் முகர்ஜியை அழைத்துச்
சென்று ராம்நாத் கோவிந்த் வழியனுப்பி வைப்பார்.

நன்றி தினமலர்

ரமணியன்