கிரிமினல் வழக்குகள் இருப்பதால் 3 எம்.எல்.ஏ.க்கள் நியமனம் செல்லாது: நாராயணசாமி

புதுச்சேரி,

நியமன எம்.எல்.ஏ.க்களாக பா.ஜ.க.வைச் சேர்ந்த சாமிநாதன்,
சங்கர், செல்வகணபதி ஆகியோர் நியமிக்கப்பட்டு இருப்பது
குறித்து முதல்-அமைச்சர் நாராயணசாமியிடம் நிருபர்கள்
கருத்துகேட்டனர். அதற்கு பதில் அளித்து அவர் கூறியதாவது:-

மத்திய அரசு மாநில அரசின் பரிந்துரையில்லாமலேயே
3 நியமன எம்.எல்.ஏ.க்களை நியமித்துள்ளது. அவர்களுக்கு
கவர்னர் கிரண்பெடி ரகசியமாக பதவிப்பிரமாணம் செய்து
வைத்துள்ளார்.

நியமன சட்டமன்ற உறுப்பினராக பதவியேற்றுள்ள சாமிநாதன்
கடந்த சட்டமன்ற தேர்தலில் போட்டியிட்டு டெபாசிட் இழந்தவர்.
சாமிநாதன், செல்வகணபதி ஆகியோர் மீது கிரிமினல்
வழக்குகளும் உள்ளன.

ஜனாதிபதியிடம் புகார்

கிரிமினல் வழக்கு உள்ளவர்களை சட்டமன்ற உறுப்பினர்களாக
நியமிக்கக்கூடாது. இந்த நியமனம் செல்லாது. சபாநாயகர்
இருக்கும்போது கவர்னர் பதவிப்பிரமாணம் செய்து வைக்கலாமா?
என்பன போன்று பல கேள்விகள் இந்த விஷயத்தில் எழுந்துள்ளன.

இதுதொடர்பாக கோர்ட்டில் வழக்கும் உள்ளது. கோர்ட்டிலும்
இந்த தகவலை தெரிவித்துள்ளோம்.

கவர்னர் கிரண்பெடியின் நடவடிக்கை தொடர்பாக நான் பலமுறை
மத்திய அரசிடம் புகார் கூறியுள்ளேன். இப்போது இந்த விஷயத்திலும்
அவர் எடுத்துள்ள நடவடிக்கை குறித்து ஜனாதிபதியிடம் புகார்
செய்வேன். இவ்வாறு அவர் கூறினார்.

கவர்னர் விளக்கம்

மத்திய அரசால் அறிவிக்கப்பட்ட நியமன எம்.எல்.ஏ.க்களுக்கு கவர்னர்
கிரண்பெடி இரவோடு இரவாக பதவிப்பிரமாணம் செய்துவைத்த
நடவடிக்கை சபாநாயகரின் உரிமையை பறிக்கும் விதமாக உள்ளதாக
விமர்சனங்கள் எழுந்தன.

இதற்கு பதிலளிக்கும் விதமாக கவர்னர் கிரண்பெடி
சமூக வலைதளங்களில் வெளியிட்டுள்ள பதிவில் கூறியிருப்பதாவது:-

புதுவை சட்டமன்றத்துக்கு 3 நியமன எம்.எல்.ஏ.க்களை நியமிக்க மத்திய
அரசுக்கு அதிகாரம் உள்ளது. இது யூனியன் பிரதேசங்களுக்கான சட்ட
விதிமுறையில் கூறப்பட்டுள்ளது.

இதன்படி மத்திய உள்துறை 3 பேரின் பெயர்களை புதுச்சேரி அரசுக்கு
அனுப்பியது. அவர்களுக்கு பதவிப்பிரமாணம் செய்துவைக்க நிர்வாகியால்
(கவர்னர்) முடியும். யூனியன் பிரதேச சட்ட விதிகளின்படி அவர்களுக்கு
பதவிப்பிரமாணம் செய்துவைக்கப்பட்டது.

இவ்வாறு அந்த பதிவில் கவர்னர் கிரண்பெடி தெரிவித்துள்ளார்.
-
------------------------------
தினத்தந்தி

மேற்கு வங்காளத்திலும் , புதுச்சேரியிலும் கவர்னர்கள் அத்துமீறிச் செயல்படுகிறார்கள் .பாஜகவின் பிரதிநிதிகளாக செயல்படுகிறார்கள் .தமிழ்நாட்டுக்கு முழுநேர கவர்னரை நியமனம் செய்ய அஞ்சுகிறார்கள் . தங்கள் சொல்படி தமிழக அமைச்சர்கள் ஆடவேண்டும் என்று டெல்லி விரும்புகிறது .
ஜனநாயத்துக்கு விரோதமான போக்கைக் கவர்னர்கள் கடைபிடிப்பது நல்லதல்ல , அவர்கள் நியமனம் செய்யப்பட்டவர்கள் ; மக்களால் தேர்ந்தெடுக்கப்பட்டவர்கள் அல்ல என்பதை மறந்துவிடக்கூடாது .