விளம்பரங்களில் ஜெயலலிதா படம் அரசு பதிலளிக்க ஐகோர்ட் உத்தரவு

by **ayyasamy ram** Tue Jul 04, 2017 9:16 am

சென்னை,

அரசு விளம்பரங்களில் ஜெயலலிதாவின் புகைப்படத்தை பயன்படுத்த
எதிர்ப்பு தெரிவித்து தொடரப்பட்ட மனுவுக்கு மூன்று வாரங்களில்
பதிலளிக்கும்படி தமிழக அரசுக்கு சென்னை உயர் நீதிமன்றம் உத்தரவிட்டுள்ளது.
-
தவறாக பயன்படுத்தக் கூடாது.
-
சென்னையை சேர்ந்த 'டிராபிக்' ராமசாமி தாக்கல் செய்த மனு:
-
அரசின் திட்டங்கள், சாதனைகள் குறித்து பத்திரிகைகளில்
விளம்பரங்கள் வெளியிடப்படுகின்றன. அதில் மறைந்த முதல்வர்
ஜெயலலிதாவின் புகைப்படம் இடம்பெறுகிறது. அ.தி.மு.க.,வினரைப்
பொறுத்தவரை சொந்த செலவில் அவர்கள் கட்சி தலைவியின்
புகைப்படத்தை போட்டு கொள்ளலாம்.

அதேபோல அதிகாரிகளும் சொந்த செலவில் ஜெயலலிதாவின்
புகைப்படத்தை பயன்படுத்தலாம். ஆனால் பொது மக்களின்
பணத்தை தவறாகபயன்படுத்தக் கூடாது.

குற்றவாளியின் படம்
-
சொத்து குவிப்பு வழக்கில் ஜெயலலிதாவின் குற்றம் பற்றி தெளிவாக
கூறப்பட்டுள்ளது. ஒரு வழக்கில் குற்றம் சாட்டப்பட்டவரின்
புகைப்படத்தை பயன்படுத்தி பொது மக்களின் பணத்தில் அரசு
விளம்பரங்கள் வெளியிடப்படுகின்றன.
-
இந்தியாவில் வேறு எந்த மாநிலத்திலும் ஒரு குற்றவாளியின்
புகைப்படத்தை அரசு விளம்பரங்களில் பயன்படுத்துவதில்லை.
அரசு அதிகாரிகளுக்கு இதுபற்றி தெரியும்என்றாலும் அரசியல்
வாதிகளின் நிர்ப்பந்தத்தால் இவ்வாறு செய்கின்றனர்.
இது ஒரு தவறான முன்னுதாரணமாகி விடும்.
-
எனவே துவக்கத்திலேயே தடுக்க வேண்டும். இதுகுறித்து அரசுக்கு
மனு அனுப்பினேன்; எந்த நடவடிக்கையும் இல்லை. என் மனு மீது
நடவடிக்கை எடுக்கவும் பொது மக்கள் பணத்தை தவறாக பயன்
படுத்துவதை தடுக்கவும் உத்தரவிட வேண்டும்.
இவ்வாறு மனுவில் கூறப்பட்டுள்ளது.
-
மனு, தலைமை நீதிபதி இந்திரா பானர்ஜி நீதிபதி எம்.சுந்தர் அடங்கிய
'முதல் பெஞ்ச்' முன் விசாரணைக்கு வந்தது. மனுவுக்கு மூன்று
வாரங்களில் அரசு பதிலளிக்கும்படியும் அதற்கு மனுதாரர் தரப்பில்
இரண்டு வாரங்களில் பதிலளிக்கவும் உத்தரவிட்டு விசாரணையை
ஆக., 28க்கு முதல் பெஞ்ச் தள்ளிவைத்தது.
-
-----------------------------------
தினமலர்