ஏழை மக்களுக்கு சட்டஉதவி செய்ய வேண்டும்:வக்கீல்களுக்கு தலைமை நீதிபதி ஆலோசனை

சேலம்:

ஏழை மக்களுக்கு சட்ட உதவி செய்ய வேண்டும்.
அதற்கு ''வக்கீல்கள் தங்களை தயார் செய்து கொண்டு,
நீதிமன்றத்துக்கு வர வேண்டும்,'' என, உயர் நீதிமன்ற
தலைமை நீதிபதி இந்திரா பானர்ஜி கூறினார்.

சேலம் மாவட்ட ஒருங்கிணைந்த நீதிமன்ற வளாகத்தில்,
8.16 கோடி ரூபாயில், லா சேம்பருக்கான பூமி பூஜை நடந்தது.
அப்போது, சென்னை உயர் நீதிமன்ற தலைமை நீதிபதி,
இந்திரா பானர்ஜி பேசியதாவது:

ஜனநாயகத்தின் துாண்களில் ஒன்றாக விளங்கும் நீதித்துறை,
சமூகத்தின் முதுகெலும்பாக விளங்குகிறது. பொதுமக்களுக்கு
தரமான தீர்ப்புகள் மூலம், விரைவான நீதி கிடைக்க, வக்கீல்கள்,
நீதிபதிகள், நீதிமன்ற ஊழியர்கள் இணைந்து செயல்பட வேண்டும்.

வழக்குகள் அதிகமாக தேங்கும் நிலையில், நீதிமன்ற அணுகு
முறையில் மாற்றங்கள் தேவைப்படுகிறது. காலங்கள் மாற,
மாற நீதிமன்றங்களின் முக்கியத்துவம் அதிகரித்துக் கொண்டே
போகிறது. இப்போது, நேரம் வந்துவிட்டது; நாம் அனைவருக்கும்
மாற்றம் கொடுக்கும் நேரம் வந்துவிட்டது.

மக்களுக்காக தான், நாம் இருக்கிறோம்; வக்கீல்களிடம் சேவை
மனப்பான்மையுடன் கூடிய அணுகுமுறை வேண்டும்.

நீதி வழங்கும் முறை மேம்படுத்தப்பட வேண்டும். வக்கீல்கள்,
மாவட்ட சட்ட உதவி மையங்களுக்கு சென்று, சில மணி
நேரங்கள் ஏழை மக்களுக்கு ஒதுக்கி, உதவி செய்ய வேண்டும்.
அதில், வருவாய் கிடைக்காமல் போகலாம் அல்லது குறைந்த
வருவாய் கிடைக்கலாம்.

வேலை செய்கின்ற மன நிம்மதியை பெற முடியும்.
தீர்ப்புக்கள், நல்ல தீர்ப்பாக, துரிதமான, தரமான தீர்ப்பாக
அமைய வேண்டுமெனில், வக்கீல்கள் தங்களை தயார் செய்து
கொண்டு நீதிமன்றங்களுக்கு வரவேண்டும்.

பெண்கள், குழந்தைகள், மாற்றுத் திறனாளிகளின் பிரச்னைகளை
புரிந்து, அவர்களுக்கு நீதி கிடைக்க உதவி செய்ய வேண்டும்.
இவ்வாறு அவர் பேசினார்.
-
--------------------------------
தினமலர்