நிலத்தடி நீரை எடுத்து விற்பதை கண்டித்து 12 டேங்கர் லாரிகள் சிறைபிடிப்பு

தாம்பரம்:
தாம்பரம் அடுத்த வேங்கைவாசல் ஊராட்சிக்கு உட்பட்ட
பகுதிகளில்10,000க்கும் மேற்பட்ட குடும்பங்கள் வசித்து
வருகின்றன.

இப்பகுதியில் விவசாய கிணறுகள் அதிகம் உள்ளதால்
தனியார் தண்ணீர் டேங்கர் லாரிகள் மூலம் பல நாட்களாக
தண்ணீரை எடுத்துச்சென்று பிற பகுதிகளில் விற்பனை
செய்யப்படுகிறது.

இதுகுறித்து, வருவாய்த்துறை அதிகாரிகளிடம் பொதுமக்கள்
பலமுறை புகார் அளித்தும் எந்த ஒரு நடவடிக்கையும்
எடுக்கப்படவில்லை. எனவே, பாதிக்கப்பட்ட பொதுமக்கள்
நூற்றுக்கும் மேற்பட்டோர் நேற்று மாலை அப்பகுதி திமுக
முன்னாள் வார்டு உறுப்பினர் மனோநிதி தலைமையில்
அப்பகுதியில் இருந்து தண்ணீர் உறிஞ்சி எடுத்து சென்ற
12 தண்ணீர் டேங்கர் லாரிகளை சிறைபிடித்து வேங்கைவாசல்
பிரதான சாலையில், சந்தோஷபுரம், நடுநிலைப்பள்ளி அருகே
காலி குடங்களுடன் அமர்ந்து மறியலில் ஈடுபட்டனர்.

இதன் காரணமாக, 45 நிமிடங்களுக்கு மேலாக போக்குவரத்து
பாதிக்கப்பட்டது.

தகவலறிந்த சேலையூர் இன்ஸ்பெக்டர் செல்லப்பா சம்பவ
இடத்திற்கு சென்று மறியலில் ஈடுபட்ட பொதுமக்களிடம்
பேச்சுவார்த்தை நடத்தினார். இனிமேல் இந்த பகுதியில் இருந்து
நிலத்தடி நீர் உறிஞ்சி எடுத்துச்செல்லாமல் இருக்க நடவடிக்கை
எடுப்பதாக உறுதி அளித்தார்.

இதை தொடர்ந்து அனைவரும் கலைந்துசென்றனர்.
மேலும் சிறைபிடித்த டேங்கர் லாரிகளில் இருந்த தண்ணீரை
அப்பகுதி மக்களுக்கு வழங்க காவல் ஆய்வாளர் கூறியதால்
தண்ணீர் விநியோகிக்கப்பட்டது.

கொடுங்கையூர்:கொடுங்கையூர் அருகே சேலைவாயல்,
பார்வதி நகர், சின்ன சேக்காடு, முத்தமிழ் நகர், எம்ஆர் நகர்
ஆகிய பகுதிகளில் 70 ஆயிரத்துக்கு மேற்பட்ட மக்கள்
வசிக்கின்றனர்.

கடந்த சில ஆண்டுகளுக்கு முன், மேற்கண்ட பகுதிகளில் சுமார்
10 அடி பள்ளம் தோண்டினால், தண்ணீர் தாராளமாக கிடைத்தது.
பின்னர் மக்கள் பெருக்கம், பயன்பாடு அதிகரிக்க நாளடைவில்
நீர்மட்டம் குறைந்துவிட்டது.

தற்போது, 100 அடி வரை தோண்டினாலும், தண்ணீர் கிடைப்பது
மிகவும் கஷ்டமான விஷயம் என்று அப்பகுதி மக்கள்
கூறுகின்றனர்.

மேலும், தமிழகம் முழுவதும் கடும் தண்ணீர் பஞ்சம் நிலவி
வருகிறது. குறிப்பாக வடசென்னையை பொறுத்தவரை காலி
குடங்களுடன் மக்கள் தெரு தெருவாக தண்ணீருக்காக அலைந்து
திரிவதை கண்கூடாக பார்க்க முடிகிறது.

கடந்த சில ஆண்டுகளுக்கு முன் இந்த பகுதியில் விவசாயம்
செழிப்பாக இருந்தது. மாந்தோப்பு, பலா தோப்பு, பூச்செடிகளின்
தோட்டங்கள் அதிகளவில் இருந்தன. தண்ணீர் தட்டுப்பாடு
ஏற்பட்ட பிறகு, இங்கிருந்த தோட்டங்களும், தோப்புகளும்
குடியிருப்பு பகுதிகளாக மாறிவிட்டன.

இப்போது, தண்ணீர் தட்டுப்பாடு நிலவி வருவதை பயன்படுத்தி,
தனியார் சிலர் ராட்சத மோட்டார் மூலம் நிலத்தடி நீரை உறிஞ்சி,
கேன்களில் நிரப்பி விற்பனை செய்து வருகின்றனர்.

இதுபோன்ற தனியார் நிறுவனங்கள் கொடுங்கையூர் பகுதியை
சுற்றி ஏராளமாக உள்ளன.

இங்கிருந்து தினமும் ஆயிரத்துக்கு மேற்பட்ட வாகனங்களில்
தலா வண்டிக்கு 100 கேன்கள் வீதம் என விற்பனை
செய்யப்படுகிறது. ஏற்கனவே தண்ணீர் பஞ்சம் தலைவிரித்தாடும்
வேளையில், நிலத்தடி நீரை உறிஞ்சி எடுப்பதால், மேலும்
தண்ணீர் கிடைக்காமல் மக்கள் தவிக்கின்றனர்.

இந்நிலையில், சேலைவாயல் ஊர் தலைவர் உமாபதி தலைமையில்
நிர்வாகிகள் மற்றும் பொதுமக்கள் சுமார் 50 பேர் நேற்று சென்னை
கலெக்டர் அலுவலகம் சென்றனர்.

அங்கு கலெக்டர் அன்புச்செல்வனை சந்தித்து, மேற்கண்ட பகுதிகளில்
அமைந்துள்ள தனியார் தண்ணீர் சுத்திகரிப்பு ஆலைகளை அகற்ற
வேண்டும். நிலத்தடி நீரை திருடி விற்பனை செய்வதை தடுக்க
வேண்டும் என மனு கொடுத்தனர்.

மனுவை பெற்றுக்கொண்ட கலெக்டர், சம்பந்தப்பட்ட துறை
அதிகாரிகளுக்கு பரிந்துரை செய்து, உரிய நடவடிக்கை எடுப்பதாக
உறுதியளித்தார். இதைதொடர்ந்து சென்னை மாநகர போலீஸ்
கமிஷனர் அலுவலகம் மற்றும் குடிநீர் வாரிய மேலாண் இயக்குனர்
அலுவலகத்திலும் புகார் மனு கொடுத்தனர்.
-
-------------------------------
தினகரன்