இங்கிலாந்தில் பதுங்கி இருக்கும் 23,000 தீவிரவாதிகள் உளவு அமைப்பு எச்சரிக்கை

லண்டன்:

இங்கிலாந்தில் மக்களோடு மக்களாக 23,000 தீவிரவாதிகள்
பதுங்கி இருப்பதாக அந்நாட்டு உளவு அமைப்பு எச்சரிக்கை
செய்துள்ளனர்.

இங்கிலாந்தின் மான்செஸ்டர் நகரில் கடந்த வாரம்
திங்கட்கிழமை நடந்த இசை நிகழ்ச்சியில் மனித குண்டு
வெடித்ததில் 22 பேர் பலியாயினர், 119 பேர் காயம்
அடைந்தனர். இந்த தாக்குதலில் சல்மான் அபேதி(22) என்ற
இளைஞர் ஈடுபட்டது தெரியவந்தது.

இவர் லிபியாவைச் சேர்ந்த முஸ்லிம். இங்கிலாந்தின்
மான்செஸ்டர் நகரில் பிறந்து வளர்ந்தவர். இங்கு பள்ளிப்
படிப்பை முடித்த சல்மான், இங்கிலாந்தின் சல்போர்டு
பல்கலைக்கழகத்தில் பிசினஸ் டிகிரியை படித்து பாதியில்
கைவிட்டவர்.

லிபியாவில் உள்ள அல்கொய்தா மற்றும் ஐ.எஸ்
தீவிரவாதிகளுடன் தொடர்பில் இருந்த சல்மான் அபேதி,
சிரியாவில் குண்டு தயாரிக்கும் பயிற்சியை முடித்துள்ளான்.

மான்செஸ்டர் நகரில் தாக்குதல் நடத்துவதற்கு சில நாட்களுக்கு
முன்புதான் இவன் லிபியாவில் இருந்து வந்துள்ளான்.

இவன் சூட்கேசில் கொண்டு வந்திருந்த குண்டை இசை கச்சேரி
கூட்டத்தில் வெடிக்கச் செய்து, தானும் உடல் சிதறி
பலியாகியுள்ளான்.

இந்த தாக்குதல் தொடர்பாக இங்கிலாந்தில் 14 இடங்களில்
அந்நாட்டு போலீசார் தீவிர சோதனை மற்றும் விசாரணை நடத்தி
வருகின்றனர். மேலும், தீவிரவாத நடவடிக்கையில் ஈடுபட்டதாக
11 பேர் போலீஸ் காவலில் உள்ளனர்.

இந்த நிலையில், இங்கிலாந்து உளவு அமைப்பு அதிர்ச்சிகரமான
தகவல் ஒன்றை வெளியிட்டுள்ளது. அதாவது, அந்த நாட்டில்
மக்களோடு மக்களாக தீவிரவாதிகள் என்ற சந்தேகத்துக்குரிய
23,000 பேர் வாழ்ந்து வருவதாக உளவுத்துறை எச்சரிக்கை
செய்துள்ளது.

இங்கிலாந்து போலீசார் மற்றும் புலனாய்வு அமைப்புகள் நடத்தி
வரும் 500 ஆப்ரேஷன்கள் அடிப்படையில் 3,000 பேர்
அபாயகரமானவர்கள் என்று குறிப்பிடப்பட்டுள்ளது. எஞ்சிய
20 ஆயிரம் பேர் ஆபத்தானவர்கள் என்று உளவுத்துறை முடிவு
செய்துள்ளது.

இதற்கிடையே, லண்டனில் உள்ள ஒல்டு விக் திரையரங்குக்கு
நேற்று முன்தினம் மதியம் வெடிகுண்டு மிரட்டல் வந்தது.
இதனையடுத்து, அந்த தியேட்டரில் படம் பார்த்து கொண்டிருந்த
பிரபல ஹாலிவுட் நடிகரும், ஸ்டார் வார்ஸ் நடிகருமான
ஜான் பாயேகா உள்பட நூற்றுக்கணக்கான மக்களை போலீசார்
உடனடியாக அங்கிருந்து பத்திரமாக வெளியேற்றினர்.

பின்னர் அது புரளி என தெரியவந்தது.
-
----------------------------------
தினகரன்