அரச குலப் பெண்கள் போர் செய்யும் நடுகல் தமிழகத்தில் முதன்முறையாகக் கண்டு பிடிப்பு

தேன்கனிக்கோட்டை அருகே சந்தனப் பள்ளியில்,
அரச குலப் பெண்கள் போர் செய்யும் வகையில்,
சித்தரிக்கப்பட்டுள்ள நடுகல், கண்டுபிடிக்கப்பட்டு உள்ளது.

கிருஷ்ணகிரி மாவட்டம், ஓசூர் அடுத்த தேன்கனிக்கோட்டை
அருகே உள்ள சந்தனப் பள்ளி கிராமத்தில், அறம் வரலாற்று
ஆய்வு மையத்தைச் சேர்ந்த குழுவினர், களஆய்வில்
ஈடுபட்டிருந்தனர்.

அப்போது அரச குலப் பெண்கள், மூன்று பேர், போர் செய்யும்
வகையில் சித்தரிக்கப்பட்டுள்ள நடுகல் கண்டுபிடிக்கப்பட்டது.

தமிழகத்தில் இதுவரை, மூன்று பெண்கள் போர் செய்வது
போன்ற நடுகல் கண்டுபிடிக்கப்படவில்லை. சந்தனப்பள்ளி,
கிராமத்தில்தான், முதன்முதலில் இந்த நடுகல் பதிவு
செய்யப்பட்டுள்ளதாக, அறம் கிருஷ்ணன் கூறினார்.

13ம் நூற்றாண்டு
–
அவர் மேலும் கூறியதாவது: சந்தனப்பள்ளி கிராமத்தில்
கண்டுபிடிக்கப்பட்டுள்ள நடுகல்லில் மூன்று அரச குலப்
பெண்கள், குதிரை மீது அமர்ந்து போர் செய்யும் வகையில்
சித்தரிக்கப்பட்டுள்ளது.

இது, 13 அல்லது 14ம் நூற்றாண்டைச் சேர்ந்த நடுகல்லாக
இருக்கலாம். மூன்று பெண்களின் வலது கையில் சிறிய
ஆயுதமும், இடது கரம் மேல் நோக்கி மடிந்த நிலையிலும்
உள்ளது.

வெண்கொற்றக்குடை
–
முதல் மற்றும் மூன்றாவது பெண் சிற்பங்களுக்கு மேல் குடை
பிடிக்கப்பட்டுள்ளது. இந்த இரு பெண்களும் அரசிக்கு அடுத்த
நிலையில் இருந்து போர் செய்வார்களாக இருந்திருக்க வேண்டும்.

நடுவில் உள்ள பெண் சிற்பம், அரசியாக இருக்க வேண்டும்.
ஏனெனில் அவரின் தலைக்கு மேல் மட்டும் வெண் கொற்றக் குடை
உள்ளது.

போரில், அரசி உட்பட மூன்று பெண்களும் இறந்திருக்க வேண்டும்.
அவர்களின் நினைவாக வைக்கப்பட்ட நடுகல்லாக இது இருக்கலாம்.

அதே நடுகல்லில், ஒரு போர் வீரர், வாள் மற்றும் கேடயத்துடன்
முன்வரிசையில் நிற்கிறார். அரசியின் பாதுகாப்புப் படை வீரராக
அவர் இருந்திருக்க வேண்டும். இச்சிற்பங்களின் மேற்புறத்தில்,
சிறு சிறு கோடுகள் நிறைய செதுக்கப்பட்டுள்ளதை பார்க்கும் போது,
போர் நடந்த இடம் போல் காட்சிப்படுத்தப் பட்டுள்ளதை உணர
முடிகிறது.

இரண்டாம் கம்பண்ணன்
–
மற்றொரு நடுகல்லில் இரு பெண்கள் குதிரை மேல்
அமர்ந்திருப்பது
போல் சித்தரிக்கப்பட்டு உள்ளது. இதைப் பார்க்கும் போது,
விஜய நகர பேரரசின், இரண்டாம் கம்பண்ணனின் மனைவி,
மதுரை விஜயத்தின் போது அரசனுடன் சென்று போரில்
ஈடுபட்டதாகவும், அதை விளக்கும் வகையில் இந்த நடுகல்
அமைந்திருக்கலாம் என்றும் தெரிகிறது.
–
——————————-

– டி. கோவிந்தராஜன்
கலைமகள்

மிக அரிய கண்டுபிடிப்பு !
சுவையான பல வரலாற்று தகவல்களை வெளிக்கொணரும் கண்டுபிடிப்பு .
விஜயநகர இளவரசன் குமார கம்பணன் கி.பி. 1370இல் மதுரைமீது படையெடுத்து மதுரை சுல்தான்களின் ஆட்சியை முடிவுக்குக் கொண்டுவந்தார்.
இந்நிகழ்வு மதுரா விஜயம் என அழைக்கப்படுகிறது. குமார கம்பணனின் இந்த வெற்றி குறித்து அவருடைய மனைவி கங்காதேவி ‘மதுரா விஜயம்’ என்னும் நூலை எழுதியுள்ளார்.
இதன் மூலம் அரசி கங்கா தேவி போருக்கு பின்னும் இருந்திருக்கிறார் என்பது தெளிவாகிறது .
இருந்தாலும் மூன்று பெண்கள் போரிடுவது மிக அரிய செய்தி
அன்புடன்
அண்ணாமலை சுகுமாரன்