எஸ்.எம்.எஸ் : சூர்யகுமாரன்

**ayyasamy ram** · **ayyasamy ram** Fri 19 May 2017 - 19:10

-
மெல்லிய சப்தத்துடன் குறுஞ்செய்தி வந்திருப்பதை
செல்போன் அறிவித்ததும் எடுத்துப் பார்த்த சங்கர்
சிலிர்த்துப் போனான்.

அதே நம்பர். அதே செய்தி.

தினமும் காலையில்
ஒரு எஸ்.எம்.எஸ், இரவில் ஒரு எஸ்.எம்.எஸ் என்று
வரும் அதே எண்ணிலிருந்து வந்திருந்தது.

காலையில் ‘குட்மார்னிங். ஹேவ் எ குட் டே’ என்றும்,
இரவு பத்து மணிக்கு ‘குட்நைட். ஸ்வீட் ட்ரீம்ஸ்’
என்றும் தினம் தினம் இந்த எண்ணிலிருந்து எஸ்.எம்.எஸ்
வந்து மனதை வதைக்கிறது.

நிச்சயம் இது ஒரு பெண்ணிடமிருந்துதான் வருகிறது.
எந்தப் பயலும் இதுபோல ஒரு ஆணுக்கு வேலை
மெனக்கெட்டு அனுப்ப மாட்டான். யாராக இருக்கும்?

அந்த நம்பரை எப்போது அழைத்தாலும் பிசியாகவே
இருந்தது; அல்லது யாரும் எடுக்காமல் மணி ஒலித்துக்
கொண்டே இருந்தது. போனைக்கூட எடுக்க முடியாதபடி
அப்படி என்ன வேலை பார்ப்பாள் அவள்?

ஒருமுறை எடுத்தால் போதும்… அட்ரஸ் வாங்கி…
நேரில் பார்த்து… எப்படி இருப்பாள்?
நண்பர்களிடம்
சொல்லலாமா? பொறாமையில் கொதிப்பார்கள். வேண்டாம்
.

அடுத்த மாதத் துவக்கத்தில் அந்த எண்ணிடமிருந்து
வேறொரு செய்தி.

‘உங்களது ஒத்துழைப்பிற்கு நன்றி.

தினம் தினம் உங்களுக்கு நினைவூட்டும் வேல்யூ
ஆடட் சேவையை அளித்தமைக்காக மாதம்
ரூ.100 கட்டணம்’ என்று அவனது செல்போன் நிறுவனம்
அனுப்பியிருந்தது.
‘

‘மச்சி, எனக்கும் வந்திருக்குடா எஸ்.எம்.எஸ்’’

என்றார்கள் நண்பர்கள் பதற்றமாக.
–
————————————

–

குங்குமம்