ஆலோசனை கூட்டம் முடியும் வரை கொசுக்கள் காத்திருக்காது மத்திய, மாநில அரசுக்கு ஐகோர்ட் கண்டனம்

புதுடெல்லி:
நோய் பரப்பும் கொசுக்களை ஒழிப்பது குறித்து ஆலோசனை
மட்டுமே நடத்தி வரும் மத்திய, மாநில அரசுகள், அதற்கான
நடவடிக்கைகளை மேற்கொள்ளாததை சுட்டிக்காட்டி,
‘ஆலோசனை கூட்டம் முடியும் வரை கொசுக்கள் காத்திருக்காது’
என டெல்லி உயர்நீதிமன்றம் கண்டனம் தெரிவித்துள்ளது.

டெங்கு, சிக்குன்குனியா பாதிப்பு தொடர்பாக டெல்லி உயர்
நீதிமன்றத்தில் 2 வழக்குகள் விசாரணைக்கு வந்தன. அதில்
ஒரு வழக்கு சட்டக் கல்லூரி மாணவர் கவுரி குரோவர் என்பவரால்
தொடரப்பட்டது. அவ்வழக்கில் டெங்குவால் பாதிக்கப்பட்ட
7 வயது சிறுவனுக்கு மருத்துவமனை சிகிச்சை அளிக்க மறுத்ததால்
அவன் இறந்ததோடு, அவனது பெற்றோர்களும் கடந்த 2015ம் ஆண்டு
மனமுடைந்து இறந்தனர்.

இவ்வழக்கில் மருத்துவமனை மீது நடவடிக்கை எடுக்க வேண்டும்
ன்று கூறப்பட்டிருந்தது. இதேபோல் ஏஏபி அரசு மற்றும் மாநகராட்சிகள்
டெங்கு உள்ளிட்ட நோய்களை கட்டுப்படுத்துவதில் விழுப்புணர்வுடன்
செயல்படவில்லை என்று மற்றொரு வழக்கை வக்கீல் அர்பித் பார்கவா
என்பவர் தாக்கல் செய்திருந்தார்.

இவ்விரு வழக்குகள் மீதான விசாரணை நேற்று முன்தினம் மீண்டும்
தலைமை நீதிபதி கீதா மித்தல்(பொறுப்பு) மற்றும் நீதிபதி ஹரி சங்கர்
ஆகியோர் அமர்வு முன் வந்தது. அப்போது நோய் பரப்பும் கொசுக்கள்
மூலம் இந்த ஆண்டு 90 பேர் சிக்குன்குனியா மற்றும் 36 பேர்
டெங்குவால் பாதிக்கப்பட்டுள்ளனர்.

காற்றின் ஈரப்பதம் அதிகரிப்பு மற்றும் மழைக்காலம் இன்னும் வராத
நிலையில் கொசுவினால் நோய் பாதிப்பு அதிகரித்து வருகிறது.
இதற்கு விளக்கமளிக்கும்படி கூறினர். ஆனால் டெல்லி அரசு,
மாநகராட்சி சார்பில் எந்த முன்னேற்ற நடவடிக்கைகளும்
தெரிவிக்கப்படவில்லை.

அப்போது கீழ்நிலை அதிகாரிகளின் மெத்தனப்போக்கை கண்டித்த
நீதிபதிகள், பின்னர் வழங்கிய உத்தரவில் கூறியதாவது: கொசுக்களை
ஒழிக்க கொசு மருந்து அடிப்பது, மக்களிடையே அதற்கான
விழிப்புணர்வுகளை ஏற்படுத்துவது, டெங்கு-சிக்குன்குனியா நோய்
பாதிப்பை தடுப்பதற்கான நடவடிக்கைகளை மேற்கொள்வது கீழ் நிலை
ஊழியர்களின் பணி.

இன்று தேசிய டெங்கு ஒழிப்பு தினம் (16-05-2017) என்று தெரிந்திருந்தும்,
மக்களிடையே விழிப்புணர்வு ஏற்படுத்துவது தொடர்பான எந்தவித
நிகழ்ச்சிகளும், விளம்பரங்களையும் சம்பந்தப்பட்ட நிர்வாகங்கள்
மேற்கொள்ளவில்லை.

மக்களிடையே நோய் மற்றும் அதற்கான மருந்துகள் குறித்த
விழிப்புணர்வை வழங்குவது அரசின் கடமையாகும்.

மக்களின் உயிருக்கு பாதிப்பு ஏற்பட்டால் அது எங்களுக்கு மிகுந்த
வேதனையாக இருக்கும். அந்தந்த துறை மேற்கொள்ள வேண்டிய
நடவடிக்கைகள் அனைத்தையும் தெளிவாக திட்டமிட்டு, வரைப்படம்
மூலம், பாதிப்பு அதிகம் உள்ள பகுதிகளில் விரைந்து நடவடிக்கை
எடுக்க அறிவுறுத்தியும் எந்தவித முன்னேற்றமும் இல்லை.

அதிகாரிகள் தங்களது கடமைகளை சரிவர செய்தால் நாங்கள்
இதைகுறித்து பேச வேண்டிய அவசியமுமில்லை என்றனர்.
கெஜ்ரிவால் தலைமையிலான டெல்லி அரசு, ஆளுநர் அனில்
பைஜாலுடன் இணைந்து, இப்பிரச்னைக்காக உயர்மட்ட ஆலோசனை
கூட்டங்களை நடத்தி வருவதாக நீதிமன்றத்தில் தெரிவிக்கப்பட்டது.

ஆலோசனை மட்டுமே நடத்தி வருவதால் எந்தவித பயனும் இல்லை
என்பதை சுட்டிக்காட்ட விரும்பிய நீதிபதிகள், ‘ஆலோசனை கூட்டம்
முடியும் வரை கொசுக்கள், காத்திருக்காது’ என்று கண்டனம்
தெரிவித்தனர். மேலும் கொசு பாதிப்பு அதிகம் உள்ள இடங்களின்
வரைப்படம் மற்றும் மேற்கொள்ளப்பட்ட தடுப்பு நடவடிக்கைகள்
குறித்து மாநகராட்சிகள் நிலவர அறிக்கையை தாக்கல் செய்ய
உத்தரவிட்டதோடு, வழக்கு விசாரணையை வருகிற 22ம்
தேதிக்கு ஒத்திவைத்தனர்.
-
-----------------------------
தினகரன்