லெவி கட்டண உயர்வால் உணவகங்கள் அவதி

அந்நிய தொழிலாளர்களுக்கான லெவி கட்டணம் ரிம 1,800-லிருந்து ரிம 3,600 ஆக உயர்த்தப்பட்டதால் பல உணவகங்கள் மூடப்படலாம்.

அந்த வகையில் பொருளாதார ஊக்குவிப்புத் திட்டம் உணவகங்களுக்கு ஊக்கமளிப்பதாக இல்லை. அதுவும் பொருளாதாரம் மந்தமடைது வருமானம் 30-திலிருந்து 40 விழுக்காடு வரை குறைந்து போயுள்ள நிலையில் லெவி கட்டணம் உயர்வு வந்துள்ளது.

லெவி கட்டண உயர்த்தப்பட்டதன் காரணமாக தோட்டத்துறையில் பணிபுரியும் அந்நிய தொழிலாளர்கள் உணவகங்களை நோக்கி வரக்கூடும். ஏனென்றால் தோட்டத்துறையில் வேலை செய்வோருக்கான லெவி கட்டணம் ரிம 400 தான்.

உள்நாட்டவர், உணவகங்களில் வேலை செய்ய விரும்புவதில்லை. அது அழுக்குப் பிடித்த வேலை என்றும் ஆபத்தான வேலை என்றும் அவர்கள் கருதுவதாக உணவக உரிமையாளர்கள் கருதுகின்றனர்.

லெவி கட்டண உயர்வைக் கருத்தில் கொள்ளும்போது, ஒவ்வொரு நாளும் ஒரு தொழிலாளருக்கு சம்பளத்துக்கென ரிம 30 ஒதுக்குவதுடன் லெவிக்காக ரிம 12 ஒதுக்க வேண்டியிருக்கும்.

லெவி கட்டணமான ரிம 3,600- உடன் மருத்துவச் செலவுக்கான ரிம 200, விசா கட்டணம் (ரிம 160), காப்புறுதி (ரிம 100) ஆகியவற்றையும் சேர்த்தால் மலேசியாவில் ஆண்டுதோறும் ஒரு வெளிநாட்டுத் தொழிலாளரை வேலைக்கு அமர்த்த ரிம 4,000 செலவிட வேண்டியுள்ளது.

உணவகங்கள் மூடப்பட்டால், மரத்தளவாடப் பொருள் விற்பனையாளர்கள், காய்கறி விற்பனையாளர்கள், பால் விநியோகம் செய்வோர், இறைச்சி வியாபாரிகள், போக்குவரத்து ஊழியர்கள் போன்றோரும் பாதிக்கப்படுவர் என்று இந்திய உணவக உரிமையாளர் சங்கத் தலைவர் ஆர்.ராமலிங்கம் பிள்ளை தெரிவித்தார்.

“அது தொடர் விளைவை ஏற்படுத்தி மலேசியர் பலரது வாழ்க்கையையும் பாதிக்கும்.

“நாடு பொருளாதார மந்தத்தை நோக்கிச் சென்றுகொண்டிருக்கும் வேளையில் லெவி கட்டணத்தை இரட்டிப்பாக்கும் திட்டத்தை அரசாங்கம் கைவிட வேண்டும்”, என்றவர் கேட்டுக்கொண்டார்.

லெவி கட்டண உயர்வும் மற்ற செலவினங்களும் நடைமுறைச் செலவை அதிகரித்து வாழ்க்கைச் செலவினங்களை உயர்த்தி விடும் என்று மலேசிய முஸ்லிம் உணவக உரிமையாளர் சங்க தலைவர் ஜமருல்கான் காடிர் கூறினார்.

“தோட்டத்துறை வேலை பெர்மிட் ரிம 400 தான் என்பதால் அதனை வைத்துள்ள அந்நிய தொழிலாளர்கள் இங்கு வருவார்கள். லெவி கட்டணம் அதிகம் என்பதால் சட்டத்துக்குப் புறம்பாக வேலை செய்யும் அந்நிய தொழிலாளர் எண்ணிக்கை அதிகரிக்கும்”, என்று ஜமருல்கான் கூறினார்.

ராமலிங்கமும், ஜமருல்கானும் மற்ற உணவக உரிமையாளர் சங்கத்தினரும், அரசாங்கம் அதிகரிக்கப்பட்ட லெவி கட்டணத்தை ரத்துச் செய்து உணவகங்களுக்கு கூடுதல் ஊக்கிவிப்புகளை வழங்க வேண்டும் என்று கேட்டுக்கொண்டனர். அது, சமுதாயத்துடன் நீக்கமற இணைந்துள்ள உணவகங்கள் நாட்டின் சுற்றுலா துறைக்கு ஊக்கமளிக்கும் வகையில் பணியாற்ற உதவும் என்றவர்கள் குறிப்பிட்டனர்.

மலேசியாஇன்று