திருவண்ணாமலையில் இன்று மகா தீபம் ஏற்றப்படுகிறது

by இளவரசன் Tue Dec 01, 2009 10:01 am

திருவண்ணாமலையில் கார்த்திகை தீப திருவிழாவின் உச்ச நிகழ்ச்சியான மகாதீபம், 2,668 அடி உயர மலை உச்சியில் இன்று மாலை 6 மணிக்கு ஏற்றப்படுகிறது.

பஞ்ச பூதங்களில் அக்னி தலமாக விளங்கும் திருவண்ணாமலை அருணாசலேஸ்வரர் கோ‌யிலில் ஒவ்வொரு ஆண்டும் 10 நாட்கள் கார்த்திகை தீப திருவிழா அமோகமாக கொண்டாடப்படுகிறது. இங்கு மலையே சிவனாக வணங்கப்படுகிறது.

தான் என்ற அகந்தையை அழிக்க சிவபெருமான் திருவண்ணாமலையில் அக்னி மலையாக தோன்றியதால் கார்த்திகை தீபத்தன்று திருவண்ணாமலையில் மலை உச்சியில் மகா தீபம் ஏற்றப்படுகிறது. இந்த ஆண்டுக்கான கார்த்திகை தீப திருவிழா கடந்த 22ஆ‌ம் தேதி கொடியேற்றத்துடன் தொடங்கியது.

10 நாள் திருவிழாவின் இறுதிநாளான இன்று திருவண்ணாமலையில் மகாதீபம் ஏற்றப்படுகிறது. 2,668 மலை உச்சியில் மகாதீபம் ஏற்றுவதற்காக தயார் நிலையில் வைத்து இருந்த மகாதீப கொப்பரையை நேற்று காலை மலை உச்சிக்கு கொண்டு சென்றனர்.

தீபம் ஏற்ற பயன்படுத்தப்படும் 1,500 மீட்டர் திரி, 3,500 கிலோ நெய் ஆகியவை கோவிலில் வைத்து பூஜை செய்யப்பட்டு மலை உச்சிக்கு இன்று கொண்டு செல்லப்படுகிறது.

இந்த மகாதீப விழாவுக்காக இன்று அதிகாலையிலேயே கோ‌யில் நடை திறக்கப்ப‌ட்டது. முதல் நிகழ்ச்சியாக பஞ்சமூர்த்திகளுக்கு சிறப்பு அபிஷேகம், அலங்காரம் மற்றும் தீபாராதனை நட‌ந்தது.

அதிகாலை 4 மணிக்கு கோ‌யிலில் பரணி தீபம் ஏ‌ற்ப‌ட்டது. மாலை 6 மணிக்கு மலை உச்சியில் மகா தீபமும் ஏற்றப்படுகிறது. முன்னதாக பஞ்சமூர்த்திகள் பலிபீடம் அருகே அழைத்து வரப்படுவார்கள். பின்னர் கோ‌யிலில் இருந்து அர்த்தநாரீஸ்வரர் ஆடியபடியே பலி பீடத்தின் அருகே வருவார்.

அர்த்தநாரீஸ்வரர் வந்ததும் பலி பீடம் அருகே அகண்ட தீபம் ஏற்றப்படும். அதே நேரத்தில் மலை உச்சியிலும் மகா தீபம் ஏற்றப்படும். தீபம் ஏற்றியதும் கோ‌யிலிலும், கிரிவலப் பாதையிலும் இருக்கும் பக்தர்கள் 'அண்ணாமலைக்கு அரோகரா` என்றும் 'நமச்சிவாய, நமச்சிவாய' என்றும் பக்தி கோஷத்துடன் மலையின் உச்சியில் எரியும் மகாதீபத்தை பார்த்து வணங்குவார்கள்.

அதே நேரத்தில் மலை உச்சியில் மகா தீபம் ஏற்றிய பிறகே திருவண்ணாமலை, சுற்றுப்புற கிராமங்களில் உள்ள பக்தர்கள் தங்கள் வீடுகளிலும், கடைகளிலும் அகல்விளக்கு ஏற்றுவார்கள். இதனால் திருவண்ணாமலை நகரமே தீப ஒளியில் ஜொலிக்கும். வாணவேடிக்கைகளும் மணி கணக்கில் நடக்கும். மகாதீபத்தை காண லட்சக்கணக்கான பக்தர்கள் திருவண்ணாமலையில் வந்து குவிந்துள்ளனர்.

தீப விழாவில் 15 லட்சம் பக்தர்கள் கூடுவார்கள் என்பதால் பாதுகாப்பு பலப்படுத்தப்பட்டுள்ளது. மேலும் தீவிரவாதிகள் அச்சுறுத்தல் இருப்பதால் திருவண்ணாமலையில் வரலாறு காணாத அளவில் பாதுகாப்பு போடப்பட்டுள்ளது. 3 டி.ஐ.ஜி., 8 காவ‌ல்துறை க‌ண்கா‌ணி‌ப்பாள‌ர்கள் தலைமையில் 8,600 காவல‌ர்க‌ள் பாதுகாப்பு பணியில் ஈடுபடுத்தப்ப‌ட்டு‌ள்ளன‌ர்.

Thanks:Webdunia