அல்லாஹ்வுக்காக வாழுங்கள்

**சிவா** · **சிவா** Sat Feb 21, 2009 11:26 am

எவன் ஒருவன் அல்லாஹ்வுக்காக நேசம் கொண்டும், அல்லாஹ்வுக்காக கோபம் கொண்டும், அல்லாஹ்வுக்காக தருமம் செய்தும் தீமைகளை தள்ளுகின்றானோ அவன் தன் ஈமானை முழுமையாக்கிக் கொண்டான் எனப் போதிக்கிறது இஸ்லாம். ஆம் நம் வாழ்வின் ஒவ்வொரு செயலையும் அல்லாஹ்வுக்கே அர்ப்பணிக்க வேண்டும். இதை விளக்கும் ஒரு கதையைப் பார்ப்போம்.

தன் நண்பனை சந்திக்க ஒருவன் செல்லும் சமயம் வானவர்களில் ஒருவரை அல்லாஹ் அவனிடம் அனுப்புகிறார். வானவர் அவரைப் பார்த்து, எங்கு செல்கின்றீர்? என்று வினவினார். அதற்கு அவர், என் நண்பனை சந்திக்கச் செல்கிறேன் என்றார். தொடர்ந்து வானவர் அவரிடம், உதவி பெறுவதற்காகவா? எனக்கேட்டார். அதற்கு அம்மனிதர் இல்லை என்று பதிலளித்தார்.

பின் அவர் உமக்குச் சொந்தக்காரரா? எனவானவர் கேட்க அதற்கும் அம்மனிதர் இல்லை என்றே பதிலளித்தார். இறுதியாக வானவர், பின் எதற்காகச் செல்கின்றீர்? என்று அம்மனிதரிடம் வினவ, நண்பனைக் காணச்சென்ற அம்மனிதரோ பின்வருமாறு பதிலளித்தார்.

அல்லாஹ்வுக்காக நான் அவர் மீது நேசம் கொள்கிறேன், அதற்காகத்தான் அவரை சந்திக்கச் செல்கின்றேன் என்றார். உடன் அவரிடம் வானவர் கூறினார். அந்த நண்பர் மீது நீர் நேசம் கொள்வதால் அல்லாஹ் உம்மீது சொர்க்கத்தை நிச்சயித்து விட்டான். உம்மிடம் இந்த சுபச்சேதியை சொல்லி வரும்படி அல்லாஹ் எனக்கு கட்டளையிட்டான் (நூல்: முஸ்லீம்) நாமும் நம் வாழ்வை வல்ல அல்லாஹ்வுக்காகவே அர்ப்பணித்து வாழ்வோம்.