களைகட்டிய அட்ஷய திருதியை ரூ.1,275 கோடிக்கு தங்கம் விற்பனை

அட்ஷய திருதியை முன்னிட்டு, தமிழகத்தில், இரு தினங்களில், 1,275 கோடி ரூபாய் மதிப்புள்ள, 4,250 கிலோ தங்க நகைகள் விற்பனையாகி உள்ளன.

நாட்டில், தங்கம் பயன்பாட்டில், தமிழகம் முன்னணியில் உள்ளது. அட்ஷய திருதியை மற்றும், தீபாவளி போன்ற சுப தினங்களில், தங்கம் விற்பனை வழக்கத்தை விட, அதிகம் இருக்கும். நேற்று முன்தினம் துவங்கிய அட்ஷய திருதியை, நேற்று, முடிவடைந்தது. அட்சய திருதியை முன்னிட்டு, தங்க நகைகள் வாங்க, மக்கள் ஆர்வம் காட்டினர்.

தமிழகத்தில், நேற்று முன்தினம், 1,750 கிலோ; நேற்று, ஒரே நாளில் மட்டும், 2,500 கிலோ என, இரண்டு நாட்களில், ௪,௨௫௦ கிலோ தங்க நகைகள் விற்பனையாகின. தற்போது, ஒரு கிலோ தங்கத்தின் விலை, 30 லட்சம் ரூபாயாக உள்ளது.

இதனால், இரு தினங்களில், 1,275 கோடி ரூபாய்க்கு நகைகள் விற்பனையானதாக கணக்கிடப்பட்டுள்ளது.

வட சென்னையில் அதிக கூட்டம் ஏன்?

சென்னை ஆர்.கே.நகரில் சென்ற ஏப்., 12ல் இடைத்தேர்தல் நடக்க இருந்தது. இதற்காக அ.தி.மு.க., சசிகலா அணி வேட்பாளர் தினகரன் தரப்பு ஒரு ஓட்டுக்கு 4,000 ரூபாய் தி.மு.க., ௨,௦௦௦ ரூபாய் வரை பண பட்டுவாடா செய்ததாக புகார் எழுந்தது.

இதனால் தேர்தல் ரத்து செய்யப்பட்டது. பணம் பெற்ற வாக்காளர்கள் அதை கொண்டு அட்ஷய திருதியைக்கு நகை வாங்கியதாகவும் இதனால் பிராட்வே மற்றும் வடசென்னை பகுதியில் இருந்த நகை கடைகளில் கூட்டம் அலைமோதியதாகவும் கூறப்பட்டது.

இது குறித்து, சென்னை தங்கம் மற்றும் வைர நகை வியாபாரிகள் சங்க தலைவர், ஜெயந்திலால் சலானி கூறுகையில், ''அட்ஷய திருதியை உடன், வார விடுமுறையும் வந்ததால், ஏராளமானோர், தங்க ஆபரணங்கள் வாங்க வந்தனர்; நடப்பு அட்ஷய திருதியைக்கு, தங்கம் விற்பனை சிறப்பாக இருந்தது,'' என்றார்.

தினமலர்

வாவ் !.என்ன விலை விற்றாலும் இப்படி மொய்க்கிறார்களே !