மதுக்கடை 'பார்' சூறை: திருப்பூரில் 195 பேர் கைது

திருப்பூர்:
திருப்பூரில், 'குடி'மகன்களின் தொல்லையை பொறுக்க
முடியாமல், வெகுண்டெழுந்த பொதுமக்கள், மதுக்கடை,
'பார்' வளாகத்தை சூறையாடினர். இது தொடர்பாக,
195 பேர் கைது செய்யப்பட்டுள்ளனர்.

திருப்பூர், முதலிபாளையம், 'சிட்கோ' பஸ் ஸ்டாப் அருகே
உள்ள, 'பார்' மற்றும் டாஸ்மாக் மதுக்கடையை அகற்ற
வலியுறுத்தி, அப்பகுதியினர் போராடி வருகின்றனர்.

காங்கயம் ரோடு பகுதியில் இருந்த, மூன்று மதுக்கடைகள்
மூடப்பட்டதால், 'சிட்கோ' அருகேயுள்ள, இந்த கடையில்
கூட்டம் அலைமோதியது. 'மதுக்கடையை அகற்ற கோரி,
ஆர்ப்பாட்டம் நடத்தப்படும்' என, நேற்று
அறிவிக்கப்பட்டிருந்தது.

மதுக்கடை முன் போலீசார், 'பேரிகார்டு' அரண் அமைத்திருந்தனர்.
காலை, 10:00 மணிக்கு, ஆர்ப்பாட்டத்துக்கு வந்த, 300க்கும்
அதிகமானோர், காசிபாளையம் ரோட்டில், மறியலில் ஈடுபட்டனர்.

பேச்சு நடத்த யாரும் வராததால், 11:00 மணிக்கு மதுக்கடை,
'பார்' வளாகத்தை சூறையாடினர். பூட்டியிருந்த கேட்டை உடைத்து
உள்ளே சென்றவர்கள், பெயர் பலகையைக் கழற்றி வீசினர்.

சமையல் அறையில் இருந்த பொருட்களை அடித்து நொறுக்கினர்;
தள்ளுவண்டிகளை கவிழ்த்தனர். வளாகத்தில் அடுக்கி வைத்திருந்த,
குளிர்பான பாட்டில்களை, பெட்டியுடன் எடுத்து தரையில் போட்டு
உடைத்தனர். இருக்கைகள், 'பிளாஸ்டிக்' டேபிள்களை அடித்து
நொறுக்கினர்.

மதுக்கூடத்தின் மேற்கூரையை தாக்கி சேதப்படுத்தினர்.
கூடுதல் எஸ்.பி., ஸ்டாலின் வந்து பேச்சு நடத்தியும், போராட்டம்
ஓயவில்லை.

மதியம், 12:30 மணிக்கு அங்கு வந்த, டாஸ்மாக் மாவட்ட துணை
மேலாளர் குணசேகரன், ''மாவட்ட நிர்வாகத்துடன் பேசி, மூன்று
மாதத்துக்குள் கடை, வேறு இடத்துக்கு மாற்றப்படும்,'' என்றார்.

எனினும், 'மூன்று மாத அவகாசம் தர முடியாது; 15 நாட்களுக்குள்
கடையை மாற்ற வேண்டும்; அதுவரை திறக்கக்கூடாது' என,
பொதுமக்கள் திட்டவட்டமாக கூறி, போராட்டத்தை தொடர்ந்தனர்.
பகல், 1:05 மணிக்கு, சம்பவ இடத்தை, எஸ்.பி., உமா
பார்வையிட்டார்.

தொடர்ந்து, மறியலில் ஈடுபட்ட, 110 ஆண்கள்; 85 பெண்கள் என,
195 பேர் கைது செய்யப்பட்டனர்.

பொதுமக்களின், இரண்டு மணி நேர மறியல் முடிவுக்கு வந்தபோது,
'டாஸ்மாக்' மாவட்ட மேலாளர் ராஜன் வந்தார். 'மூன்று மாதங்களில்
மதுக்கடையை இடம் மாற்ற நடவடிக்கை எடுக்கப்படும்' என்றார்.

நிருபர்களிடம் மா வட்ட மேலாளர் ராஜன் கூறுகையில்,
''நெடுஞ்சாலைகளில் இருந்த மதுக்கடைகள் அகற்றப்பட்டுள்ளன.
நீண்ட காலமாக, இங்கு மதுக்கடை இயங்கி வருகிறது.
''அருகில் நெடுஞ்சாலையும் இல்லை. எனவே, இந்த மதுக்கடையை
மாற்ற வாய்ப்பு இல்லை. மாவட்ட நிர்வாகம் பரிந்துரைத்து,
அரசு உத்தரவிட்டால் மட்டுமே, கடையை மாற்ற முடியும்,''
என்றார்.
-
-----------------------------------
தினமலர்