நியூசிலாந்து மண்ணில் சாதனை

ஹாமில்டன், மார்ச் 12: டோனி தலைமையிலான இந்திய அணி, நியூசிலாந்து மண்ணில் முதல் முறையாக ஒருநாள் தொடரைக் கைப்பற்றி (3&0) சாதனை படைத்தது. ஹாமில்டனில் நேற்று நடந்த 4வது ஒருநாள் போட்டியில் இந்தியா 84 ரன் வித்தியாசத்தில் (டி/எல் விதி) வென்றது.

அதிவேக சதம் விளாசிய இந்திய வீரர்களின் பட்டியலில், தொடக்க வீரர் சேவாக் (60 பந்து) முதலிடம் பிடித்தார்.இந்தியா & நியூசிலாந்து அணிகளிடையே 5 போட்டிகள் கொண்ட ஒருநாள் போட்டித் தொடர் நடந்து வருகிறது.

மூன்று போட்டிகளின் முடிவில் இந்தியா 2&0 என முன்னிலை வகிக்க, 4வது போட்டி ஹாமில்டன் செடான் பார்க் மைதானத்தில் நேற்று நடந்தது. இந்திய அணியில் சச்சினுக்கு பதிலாக ரோகித், முனாப் பட்டேலுக்கு பதிலாக இஷாந்த் இடம் பெற்றனர்.

டாசில் வென்ற நியூசிலாந்து முதலில் பேட் செய்தது. தொடக்க வீரர்கள் மெக்கல்லம், ரைடர் இருவரும் பொறுப்புடன் விளையாடி அரைசதம் அடித்தனர். இந்த ஜோடி முதல் விக்கெட்டுக்கு 19.1 ஓவரில் 102 ரன் சேர்த்தது.

ரைடர் 46, டெய்லர் 5, மெக்கல்லம் 77 (95 பந்து, 7 பவுண்டரி, 2 சிக்சர்), குப்தில் 25, ஆல்ரவுண்டர் ஓரம் 1 ரன் எடுத்து ஆட்டமிழந்தனர்.
நியூசிலாந்து 47 ஓவரில் 5 விக்கெட் இழப்புக்கு 270 ரன் குவித்தது.

மெக்லாஷன் 56, எலியட் 35 ரன்னுடன் ஆட்டமிழக்காமல் இருந்தனர். அடிக்கடி மழை குறுக்கிட்டதால் 47 ஓவருடன் நியூசி. இன்னிங்ஸ் முடிந்தது. இந்திய பந்துவீச்சில் இஷாந்த் 2, ஜாகீர், யுவராஜ், யூசுப் தலா ஒரு விக்கெட் வீழ்த்தினர்.

இதையடுத்து, இந்திய அணி 47 ஓவரில் 281 ரன் (டி/எல்) எடுத்தால் வெற்றி என இலக்கு நிர்ணயிக்கப்பட்டது. சேவாக் & கம்பீர் ஜோடி இன்னிங்சை தொடங்கியது.

சேவாக் வழக்கம்போல எடுத்த உடனேயே டாப் கியருக்கு எகிற, பந்து பவுண்டரிக்கும் சிக்சருக்கும் பறந்தது. அவரது ஆக்ரோஷமான ஆட்டத்தை சமாளிக்க முடியாமல் நியூசி. பந்துவீச்சாளர்கள் குழம்பினர்.

சேவாக் 31 பந்தில் அரைசதம் (8 பவுண்டரி, 1 சிக்சர்) கடந்தார். ஒருபக்கம் மழை மிரட்டல் தொடர்ந்தாலும், சேவாக் & கம்பீர் ஜோடியின் ரன் மழையில், இந்திய அணியின் ஸ்கோர் வெள்ளமாய் பெருக்கெடுத்தது.

வெறும் 11.3 ஓவரிலேயே 100 ரன்களை எட்டியது. கொஞ்சம் கூட இரக்கம் காட்டாமல் நியூசி. பந்துவீச்சை அநாயாசமாக அடித்து நொறுக்கிய சேவாக், இமாலய சிக்சருடன் ஒருநாள் போட்டிகளில் தனது 11வது சதத்தை பூர்த்தி செய்தார்.

அதிவேக சதம் வரிசையில் இது 7வது இடத்தை பிடித்தது.இந்தியா விக்கெட் இழப்பின்றி 169 ரன் எடுத்த நிலையில், (19.2 ஓவர்) மழை காரணமாக ஆட்டம் தடைபட்டது. இதையடுத்து 36 ஓவரில் 220 ரன் எடுத்தால் வெற்றி என இலக்கு மாற்றியமைக்கப்பட்டது.

மழை நின்றதும் ஆட்டத்தை தொடர்ந்த இந்திய அணி, 23.3 ஓவரில் விக்கெட் இழப்பின்றி 201 ரன் எடுத்த நிலையில் மீண்டும் மழை கொட்டத் தொடங்கியது.

ஆட்டம் தொடர வாய்ப்பில்லாததால், டக்வொர்த் லூயிஸ் விதிப்படி இந்திய அணி 84 ரன் வித்தியாசத்தில் வென்றதாக நடுவர்கள் அறிவித்தனர்.

சேவாக் 125 (74 பந்து, 14 பவுண்டரி, 6 சிக்சர்), கம்பீர் 63 (67 பந்து, 6 பவுண்டரி, 15வது அரைசதம்) ரன்னுடன் ஆட்டமிழக்காமல் இருந்தனர்.

இந்த வெற்றியுடன் 3&0 என முன்னிலை பெற்ற இந்திய அணி, நியூசி. மண்ணில் முதல் முறையாக ஒருநாள் தொடரைக் கைப்பற்றி சாதனை படைத்தது.

அதிரடியாக சதம் விளாசிய சேவாக் ஆட்டநாயகன் விருது பெற்றார். கடைசி ஒருநாள் போட்டி, ஆக்லாந்து ஈடன் பார்க் மைதானத்தில் நாளை மறுநாள் நடக்கிறது.

வாழ்த்துக்கள்