மத்திய கூட்டுறவு வங்கி கிளைகளில் விரைவில் ஏடிஎம் சேவை துவக்கம்

திருவொற்றியூர்:
மாதவரம் பால்பண்ணையில் உள்ள விவசாய கூட்டுறவு
பணியாளர்கள் சங்க பயிற்சி நிலையத்தில் மாவட்ட, மத்திய
கூட்டுறவு வங்கி பணியாளர்கள், தொடக்க வேளாண்மை
கூட்டுறவு கடன் சங்க பணியாளர்களுக்கான பயிற்சி வகுப்பு
தொடக்க விழா நேற்று நடந்தது.

கூட்டுறவு, உணவு மற்றும் நுகர்வோர் பாதுகாப்பு துறை
முதன்மை செயலாளர் பிரதீப் யாதவ் தலைமை வகித்தார்.
பயிற்சி நிலைய முதல்வர் ெஜயஸ்ரீ வரவேற்றார்.

தமிழ்நாடு மாநில தலைமை கூட்டுறவு வங்கி தலைவர்
இளங்கோவன் முன்னிலை வகித்தார். தமிழக கூட்டுறவுத்துறை
அமைச்சர் செல்லூர் ராஜு கலந்து கொண்டு, பயிற்சி வகுப்பை
துவக்கி வைத்தார். பின்னர், அவர் பேசியதாவது: கடந்த 1905ம்
ஆண்டு 25 ஆயிரம் மூலதனத்தில் கூட்டுறவு வங்கி
ஆரம்பிக்கப்பட்டு, பல்வேறு பரிணாம வளர்ச்சிக்கு பின், தமிழக
அரசு பங்குதாரரான பின், தற்போது அதன் மூலதனம்
312 கோடியாக உயர்ந்துள்ளது.

இதில் நடைமுறை மூலதனம் 2 லட்சத்தில் இருந்து
16.58 கோடியாக உயர்ந்தது.

இந்த கூட்டுறவு வங்கிகள் சிறப்பாக செயல்பட்டதன் மூலம்
83.53 கோடி லாபம் ஈட்டியுள்ளது. பொதுத்துறை மற்றும் தனியார்
துறை வங்கிகளோடு போட்டிப் போடும் அளவுக்கு கூட்டுறவு
வங்கிகள் கணினி மூலம் சேவை செய்து வருகிறது.

இந்த கூட்டுறவு வங்கிகளின் எந்த கிளை மூலமும்
வாடிக்கையாளர்கள் பண பரிவர்த்தனை செய்ய முடியும். விரைவில்
9 மத்திய கூட்டுறவு வங்கி கிளைகளிலும் ஏடிஎம் சேவை
துவங்கப்படும். வாடிக்கையாளர்களுக்கு ஏடிஎம் கார்டு, ரூபே அட்டை
விரைவில் வழங்கப்பட உள்ளது.

கூட்டுறவு வங்கிகளில்தான் அரசின் நலத்திட்டங்கள் அனைத்தும்
கிராமப்புற பகுதிகளுக்கும் விவசாயிகளுக்கும் சென்றடையும்.
தற்போது துவங்கப்பட்டு உள்ள பணியாளர்களுக்கான பயிற்சி
மூலம் கிராமப் பொருளாதாரம் முன்னேற வழிவகை செய்யப்படும்.
இவ்வாறு செல்லூர் ராஜு பேசினார்.
-
---------------------------
தினகரன்

சூப்பர் !