ஏப்.,25ல் பந்த்:அனைத்து கட்சி கூட்டத்தில் தீர்மானம்

சென்னை:
விவசாயிகளின் கோரிக்கையை நிறைவேற்ற வலியுறுத்தி வரும்
ஏப்ரல் 25ல் முழு அடைப்பு போராட்டம் நடத்துவது என
தி.மு.க., தலைமையில் நடந்த அனைத்து கட்சி கூட்டத்தில்
தீர்மானிக்கப்பட்டது.

சென்னை அண்ணா அறிவாலயத்தில் ஸ்டாலின் தலைமையில்
நடந்த கூட்டத்தில், காங்., தலைவர் திருநாவுக்கரசர், மார்க்சிஸ்ட்
கம்யூனிஸ்ட் கட்சியின் மாநில செயலர் ஜி.ராமகிருஷ்ணன்,
இந்திய கம்யூனிஸ்ட் மாநில செயலர் முத்தரசன், விடுதலை
சிறுத்தை கட்சியை சேர்ந்த திருமாவளவன் உள்ளிட்ட தலைவர்கள்
கலந்து கொண்டனர்.

இந்த கூட்டத்தில், விவசாயிகள் கோரிக்கை, குடிநீர் பிரச்சனை ,
மீத்தேன், ஹை ட்ரோ கார்பன் திட்டம் , மதுவிலக்கு உள்ளிட்ட
பிரச்னைகள் குறித்து விவாதிக்கப்பட்டன. கூட்டத்தின் முடிவில்
15 தீர்மானங்கள் நிறைவேற்றப்பட்டன. விவசாயிகள் பிரச்னையை
தீர்க்க வலியுறுத்தி வரும் ஏப்., 25ம் தேதி பொது வேலை நிறுத்த
போராட்டம் நடத்துவது என தீர்மானிக்கப்பட்டது.

ஸ்டாலின் பேட்டி :

கூட்டம் முடிந்ததும் நிருபர்களிடம் ஸ்டாலின் பேசுகையில்:
விவசாயிகள் தற்கொலையை தமிழக அரசு தடுக்கவில்லை.
தற்கொலையை தடுக்க நடவடிக்கை தேவை. விவசாயிகள்
தற்கொலைக்கு இரங்கல் தெரிவித்து தீர்மானம் நிறைவேற்றப்பட்டது.

குடிநீர் பிரச்னைகளை தீர்க்க போர்க்கால நடவடிக்கை தேவை.
அனைத்து கட்சி பிரதிநிதிகளுடன் பிரதமரை சந்திக்க முடிவு
செய்துள்ளோம். விவசாய பிரச்னைக்காக சிறப்பு சட்டசபை தொடர்
கூட்டம் கூட்டப்பட வேண்டும்.

கரும்பு, நெல் ஆகியவற்றிற்கு உரிய விலை நிர்ணயம் செய்யப்பட
வேண்டும். விவசாயிகள் பிரச்னைகள் வலியுறுத்தி வரும் 25 ம்
தேதி பொது வேலை நிறுத்தம் அறிவித்துள்ளோம்.

இதற்கு தொழிலாளர்கள், மாணவர்கள், இளைஞர்கள் மற்றும் அனைத்து
தரப்பினரும் ஆதரவு தர வேண்டும். இவ்வாறு அவர் கூறினார்.
-
----------------------------------
தினமலர்