சிறகடிக்கும் சிந்து

ஷங்கர் பார்த்தசாரதி
-
மகளிர் பேட்மிண்டன் ஒற்றையர் பிரிவில் இந்தியாவுக்கு
புதிய சகாப்தம் தொடங்கியிருக்கிறது.

இந்திய பேட்மிண்டனில் பட்டத்து ராணியாக வலம் வந்து
கொண்டிருந்த சாய்னா நெஹ்வாலிட மிருந்து மகுடத்தை
அபகரித்திருக்கிறார் இளவரசி பி.வி.சிந்து.

டெல்லியில் நடந்த இந்தியா ஓபன் சூப்பர் சீரீஸ் தொடர் சிந்துவை
அடுத்த லெவலுக்கு உயர்த்தியிருக்கிறது. கால் இறுதியில்
சாய்னாவை சந்திக்கப் போகிறார் என்றதுமே இந்திய ரசிகர்களிடம்
ஆவல், ஆர்வம், எதிர்பார்ப்பு என எல்லாமே எக்கச்சக்கமாக எகிறியது.
-

-
அந்த எதிர்பார்ப்புக்கு கொஞ்சமும் குறை வைக்காமல்
ஒரு விறுவிறு… பரபர… ஆட்டத்தை விருந்தாக்கினர்
இருவரும்.

முதல் செட்டை சிந்து 21 – 16 என சற்று எளிதாக வசப்படுத்தினாலும்,
2வது செட்டில் சாய்னா கடுமையாகப் போராடியதால் பார்முலா
1 ரேஸ் பார்ப்பது போலவே இருந்தது. டாப் கியரில் சீறிய சாய்னா
முந்திச் செல்ல, விடாப்பிடியாக சிந்து விரட்டிப் பிடிக்க…
ரசிகர்களின் ஆரவாரத்தில் ஸ்டேடியம் குலுங்கியது.

27 வயது, முழங்கால் மூட்டு காயத்தால் முழு உடல்தகுதியும்
இல்லை, ஆட்டத் திறனிலும் ஏதோ ஒரு தடுமாற்றம்…
எதிரே 21 வயது இளமைத் துடிப்புடன், களத்தில் மின்னல் வேகத்தில்
ஷாட்களை இடியென இறக்கும் சிந்து!

போராட்டத்தின் உச்சத்தில் சாய்னா ஸ்தம்பித்து நிற்க, 22 – 20 என சிந்து
ஓவர்டேக் செய்த அந்த கணத்தில் முடிசூட்டு விழா முடிந்துவிட்டது.

-
இனி இந்திய பேட்மிண்டனின் ஈடு இணையில்லா ராணி
சிந்துதான் என்பதற்கான அத்தாட்சி பத்திரத்தில்
ராஜ முத்திரை அழுத்தமாக குத்தப்பட்டிருக்கிறது.

செங்கோலைக் கையிலெடுத்தவரின் அடுத்தடுத்த போர்களில்
கொரியாவின் சுங் ஜி ஹியுன், ஸ்பெயினின் கரோலினா மரின்
சரணடைய, இந்தியா ஓபன் பட்டமும் சிந்துவின் சிரத்தை
சிரத்தையாய் அலங்கரித்தது.

இதில் கரோலினா மரினுடன் நடந்த பைனல் ரொம்பவே
ஸ்பெஷல். ரியோ ஒலிம்பிக் இறுதிப் போட்டியில் மரினிடம்
தோற்ற சிந்து நூலிழையில் தங்கப்பதக்கத்தை நழுவவிட்டிருந்தார்.

அப்போது இருவரும் நேருக்கு நேர் மோதியிருந்த போட்டிகளில்
5 – 2 என்ற கணக்கில் மரினின் கை ஓங்கியிருந்தது.
அதற்குப் பிறகு இருவரும் மோதிய இரண்டு சந்தர்ப்பங்களிலுமே
சிந்துவின் ஆதிக்கம் கொடிகட்டிப் பறந்தது.

ரியோ தோல்விக்கு ஏற்கனவே பழிதீர்த்துக் கொண்டிருந்தாலும்
, உள்ளூர் ரசிகர்களின் முன்னிலையில் மரினுக்கு எதிராக
ஹாட்ரிக் வெற்றியை பதிவு செய்து இந்திய ஓபன் தங்கப்பதக்கத்தை
முத்தமிட்ட சிந்துவின் முகத்தில் நம்பிக்கை ஒளி தெறித்தது.

ரியோ ஸ்பாட்லைட்டுக்குப் பிறகு அவரது ஆட்டத்தில் வியத்தகு
முன்னேற்றம். வியூகங்களில் பிரமிக்கத்தக்க மாற்றம்.

உயரத்தை சாதகமாக்கி வலைக்கு நெருக்கமாக சிந்து
விளையாடிய டிராப்ஷாட்கள், மரினை திக்குமுக்காட வைத்தன.
எதிராளியின் பலம், பலவீனத்தை நன்கு அலசி ஆய்ந்து அதற்கேற்ப
தனது அணுகுமுறையை மாற்றிக் கொண்டதில்,
சிந்துவின் சாதுரியம் ஆச்சரியப்படுத்தியது.

தரவரிசையிலும் சீறிப் பாய்ந்திருக்கும் அவர், மிக விரைவில்
நம்பர் 1 அந்தஸ்தையும் அபகரித்து தனது ஆட்சியை நிலைநாட்டி
சர்வதேச பேட்மிண்டனில் நீண்டகாலம் கோலோச்சுவார்
என்பதற்கான அத்தனை அடையாளங்களும் அப்பட்டமாகத்
தெரிகின்றன.
அட்வான்ஸ் வாழ்த்துகள் டியர்!
–

நன்றி- குங்குமம்