மகளிர் ஆணையத்தில் யாருமில்ல: பிரச்னைய யார் கிட்ட சொல்ல?

-

மார்ச் மாதத்துக்கு பல ஆண்டுகளாக மகளிர் வண்ணம்
பூசப்படுகிறது. மார்ச் 8 உலக மகளிர் தினம் பல தளங்களிலும்
கொண்டாடப்படுகிறது. இந்தாண்டு மார்ச் 8ம் தேதியை
பல வித வேதனைகளோடும், அவமானங்களோடும்
பெண்ணினம் வரவேற்க காத்திருக்கிறது.

ஹாசினி, நந்தினி, ரித்திகா ஆகியோரின் வன்புணர்வுக் கதறல்
செவிகளில் அடங்கவில்லை. இன்னும் காதுக்கு வராத கயமைகள்
எத்தனையோ….

பெண்கள் சந்திக்கும் பிரச்னைகளுக்கு ஆதாரவாக செயல்பட
வேண்டிய அமைப்புகள் தமிழகத்தில் இயங்காமல் ஸ்தம்பித்துப்
போயுள்ளது.

பெண்கள் பிரச்னைகள் குறித்து வரும் புகார்களைக் கேட்டு
அது தொடர்பாக நடவடிக்கை எடுக்க, பரிந்துரை செய்ய மாநில
மகளிர் ஆணையம் அமைக்கப்பட்டுள்ளது.

அந்த அமைப்பின் தலைவராக 90 வயதை எட்டிய விசாலாட்சி
நெடுஞ்செழியன் மகளிர் ஆணைய தலைவர் பொறுப்பில்
இருந்தார். அவரை அடுத்து அந்த நாற்காலி இன்று வரை
காலியாகவே உள்ளது.

இந்த அமைப்பின் வேலை என்ன தெரியுமா?
–
தமிழ்நாடு மகளிர் ஆணையம் 1993ம் ஆண்டு அமைக்கப்பட்டு
பெண்களுக்கு எதிராக நடக்கும் குற்றம் தொடர்பாக விசாரிப்பது
இதன் தலையாய வேலை. இதற்காக மகளிர் ஆணையத் தலைவர்
மற்றும் 9 உறுப்பினர்கள் நியமிக்கப்பட்டுள்ளனர்.
–
பெண்களின் உரிமை பாதுகாப்போடு பெண்களுக்கு சமத்துவம்
பெற்றுத் தருவதும் இதன் முக்கிய நோக்கம். குடும்பத்திலும்,
சமுதாயத்திலும் எதிர்கொள்ளும் பிரச்னைகளில் இருந்து
பெண்களை பாதுகாப்பதற்கு தேவையான அதிகாரங்களைப்
பெற்ற சட்ட ரீதியான அமைப்பாகும்.
–
பெண்களின் தனிப்பட்ட பிரச்னைகளைக் கண்டறிந்து அது
தொடர்பான ஆய்வுகளை மேற்கொள்ள வேண்டும். பெண்கள்
சம்பந்தப்பட்ட சட்டங்கள் பற்றி மக்களிடம் விழப்புணர்வை
ஏற்படுத்தவும் பல்வேறு நடவடிக்கைகளில் இறங்க வேண்டும்.
தலையே இல்லாத அமைப்பில்
இதுவெல்லாம் நடக்கிறதா என்று கேட்காதீர்கள்? எப்படி நடக்கும்.
–
இந்த ஆணையத்தின் இணையதளத்தில் பெண்கள் தங்களது
பிரச்னைகள் குறித்து கேள்வி எழுப்பியுள்ளனர். இதற்கு அருகில்
இருக்கும் மகளிர் காவல் நிலையத்தை அணுகி உதவி பெறவும்
என விளக்கம் அளிக்கப்பட்டுள்ளது.

சுதேசி பெண்கள் பாதுகாப்பு சங்கத்தை சேர்ந்த கலைச்செல்வி
இவ்வாறு பதிவிட்டுள்ளார், ‘‘எத்தனை ஆணையம் இருந்தாலும்
இதுவரை பெண்களுக்கான இட ஒதுக்கீட்டை அமல்படுத்த
முடியவில்லையே. பெண்களின் மீதான பாலியல் வன்முறைக்கு
உடனடி தீர்வு காண வழியில்லையே. என்று தணியும் பெண் சு
தந்திர தாகம்’’ என்று தனது ஏமாற்றத்தை பதிவு செய்துள்ளார்.

இதற்கு மகளிர் ஆணையத்திடம் பதில் எதுவும் இல்லையோ?

புரட்சிகர விடியல் பெண்கள் மையத்தின் மாநில
ஒருங்கிணைப்பாளர் மற்றும் வழக்கறிஞர் தமயந்தியிடம் இது
குறித்து பேசினோம், ‘‘மாநில மகளிர் மகளிர் தமயந்திஆணையம்,
மனித உரிமை ஆணையம் இவை புகார்கள் வந்தால்
பரிந்துரைக்கும் பணியை மட்டுமே செய்கின்றன. இவை
சம்பந்தப்பட்ட பிரச்னைக்கு அந்தந்த ஊரில் உள்ள மகளிர் காவல்
நிலையங்களை அணுகச் செய்கின்றன.

அங்கு ஒரு எப்.ஐ.ஆர் கூடப் போட முடியாது. இரண்டு பக்கமும்
கட்டப்பஞ்சாயத்து பேசி அனுப்பி விடுகின்றனர். பெண்களுக்காக
என்று அரசு ஏற்படுத்தியுள்ள அமைப்புகள் எல்லாமே இப்படித்தான்
உள்ளது. பெண்களுக்கு நம்பிக்கை அளிக்காத, பெண்கள்
பிரச்னைகளுக்கு தீர்வு காணாத மகளிர் ஆணையமோ, மகளிர்
காவல் நிலையமோ இங்கு எதற்கு?

அப்படியான அமைப்புகளுக்கு செயல்படாதவர்கள் தலைவர்களாக
நியமிக்கப்படுகின்றனர். தமிழ்நாட்டில் மகளிர் ஆணையத்தின்
தலைவர் நாற்காலி காலியாக உள்ளது. தமிழகத்தில் பெண்களுக்கு
எதிரான பிரச்னைகளோ நாளுக்கு நாள் அதிகரித்தே வருகிறது.

பெண்கள் தங்களது பிரச்னைகளுக்காக தாங்களே போராட
வேண்டிய நிலைக்கு தள்ளப்பட்டுள்ளனர். தமிழகத்தில் வாடி
வாசலுக்காகவும், நெடுவாசலுக்காகவும் இளைஞர்கள் களத்தில்
இறங்கி போராடுகின்றனர். பாராட்டப்பட வேண்டிய விஷயம் தான்.

ஆனால் அவர்களின் சக மனுஷிகளான பெண்கள் பாலியல்
வன்கொடுமைக்கு உள்ளாக்கப்பட்டு எரித்து கொல்லப்படுகின்றனர்.
தமிழகத்தில் பெண்கள் எந்த உரிமையோ, பாதுகாப்போ இல்லாமல்
உள்ளனர். இது தீர்க்கப்பட வேண்டிய பிரச்னையாக இவர்களுக்கு
தெரியவில்லையா?

பெண்ணை எப்போதும் போகப் பொருளாகவும், உடமையாகவும்
பயன்படுத்திக் கொண்டே இருக்கப் போகிறார்களா? பெண்களுக்கு
எதிராக நடக்கும் கொடுமைகளுக்கு எதிராக யாரும் கேள்வி எழுப்பப்
போவதில்லையா?

போராட ஆளே இல்லையா? அப்புறம் எதற்கு மகளிர் தினம்.
மார்ச் 8ம் தேதி கணவரிடம் அனுமதி பெற்று மகளிர் தின விழாவுக்கு
சென்று கோலப்போட்டியிலும், சமையல் போட்டியிலும் கலந்து
கொண்டு ஒரு சோப்பு டப்பாவை பரிசாக வாங்கி வருவதற்குத் தானா
மகளிர் தினம்?’’ என்று கேள்விகளால் துளைக்கிறார் தமயந்தி.
–
—————————————
யாழ் ஸ்ரீதேவி
-விகடன்