யாருக்கு இந்த மகளிர் தின வாழ்த்து?:மாணிக் வீரமணி

-
மொதல்லா மகளிர் எல்லோருக்கும் மகளிர் தின வாழ்த்துக்கள்..
யாருக்கு இந்த மகளிர் தின வாழ்த்து????
என் குடும்பத்து மகளிர் சிலர்கிட்ட வாழ்த்து சொன்னேன்..அதுக்கு கிடைச்ச பதிலை நீங்களே பாருங்க மக்கா..

அம்மா- (யோவ்..என்ன பெத்த அம்மாய்யா) சரி சரி.. “நாங்க ராசு மாமாவுக்கு மிளகாப்பழம் பறிக்க கிளம்பிட்டோம்..நீ சாயங்காலம் பேசு”….

என் தங்கை- “பெறகு கூப்புடுப்பா…உன் மருமகன ஸ்கூலுக்கு கிளப்பி விடனும்..துணி அலசனும்..பாத்திரம் கழுவனும்..மதியத்துக்கு மேல கூப்புடு”…

சித்தி மகள்- “அண்ணே.. உன் மச்சான் கடைல இருந்து சாப்பாட்டுக்கு வர்ர நேரம் ஆச்சு..இன்னும் நான் சட்னி கூட அரைக்கல..ஒருமணி நேரம் கழிச்சு கூப்புடு”…

மாமா மகள் (கல்லூரி மாணவி)- “தேங்க்ஸ் மாமா..சேம் டூ யூ”…
(என்னது சேம் டூ யூ வா? பிபிஏ தான படிக்கிற? போ..போய் அதையே இன்னும் எட்டு வருசத்துக்கு படி.)..

அப்படின்னா நான் யாருக்கு வாழ்த்து சொன்னேன்? எதுக்காக சொன்னேன்???
மகளிர் தினம் என்பது கொண்டாடப்பட வேண்டிய தினம் அல்ல..ஆண்களுக்கு நிகரான கல்வி,சொத்துரிமை,எட்டு மனிநேர வேலை,வார ஓய்வு ஆகியற்றை போராடி பெண்கள் பெற்றதை நினைவுகூரும் தினமே இது…
ஆனா இன்னைக்கு???

நான் அஞ்சு மணிக்கு டிராக்டர் எடுத்துட்டு உழ போய்ட்டு மாலை 6 மணிக்கு வீடு திரும்புவது உழைப்பு என்றால் ,
நாலு மணிக்கே எழுந்து எனக்கு சாப்பாடு தயார் செய்து அனுப்பிவிட்டு,காட்டு வேலைக்கு போய் மாலை வீடு திரும்பி துணி அலசி,பாத்திரம் கழுவி,வீட்டை சுத்தப்படுத்தி,நான் வந்ததும் இரவு உணவை தயார் செய்து தந்து அரைகுறையாய் உண்டுவிட்டு நான் தூங்கிய பின்னரும் பாத்திரங்களை கழுவி கவுத்திவிட்டு பத்து மணிக்கு தூங்கச்செல்லும் என் தாயின் உழைப்பை என்ன பெயரில் அழைப்பது????

என் வாழ்வில் தொடர்புடைய அத்தனை.பெண்களும் என்னைவிட உழைப்பாளிகளாகவே இருக்கின்றனர்…
என் பெரியம்மா மணிவேல், அம்மத்தா,அப்பத்தா,அம்மா,என் தங்கை,அக்கா,சித்தி ,அத்தை என அனைவருமே….
இன்று சம உரிமை என்கிற பெயரில் பெரு நகரங்களிலும் இந்த கொடுமை விரும்பி ஏற்றுக்கொள்ளபடுவது வருந்தத்தக்க ஒன்று…

என் பள்ளித்தோழி ஒருவர் ஐடி துறையில் மாதம் இரண்டு லட்ச ரூபாய் சம்பளத்தில் வேலை செய்கிறார்.. காலை நான்கு மணியிலிருந்து இரவு 11மணி வரை அலுவலக வேலை,வீட்டு வேலை என இரண்டையும் சுமந்து திரிந்தார்…இத்தனைக்கும் அவரது கணவர் மாதம் எட்டு லட்சம் சம்பளம் வாங்குபவர்…

ஓய்வில்லாமல் சுழன்று திரிந்த அவளுக்கு 27 வயதிலேயே சுகர்,பிபி,கொலஸ்ட்ரால் என நோய்களின் கதம்ப மாலை கழுத்தில் விழுந்து விட்டது..”சீக்கிரம் செட்டிலாகிடனும்டா” என்று இரண்டு ஆண்டுகள் முன்னர் சொன்னவள் இப்போது “இதுனால குழந்தை பெத்துக்குறதுல பிரச்சினை வரும்னு சொல்றாங்க..என்ன செய்ரதுன்னே தெரியல” என உடைந்து அழுகிறாள்…

அவளைப்போலவே பல ஆயிரம் தோழிகள் இறுமாப்புக்காக தங்களின் சுயத்தை இழந்து விட்டு நிற்கின்றனர் சுயமரியாதையை காப்பாற்றுகிறோம் என்கிற பெயரில்….

“பெண்ணியம் என்பது யாதெனில் ஆயிரம் ஆண்கள் இருக்கும் சபையில் அவள் நுழைந்தால் ,”பொம்பளப்புள்ள் வருது வாய மூடுங்கடா” என குரல் வர வேண்டும்” என்றார் நண்பர் ஒருவர்…

இதில் எனக்கு முழுமையான உடன்பாடு இல்லையென்றாலும் ஒருவகையில் இதுவும் சரியே…

பெண்களின் உரிமையை ஆண்கள் எவரும் பறிப்பதில்லை..
மகளை கராத்தே வகுப்புக்கு அனுப்ப தகப்பன் எத்தனிக்கையில் “பொட்டச்சிக்கு எதுக்கு அதெல்லாம்?” என பொங்குவது தாய்தான்….

எதுக்கெடுத்தாலும் மருமகளை நொட்டை சொல்வது மாமியாரே அன்றி மாமனார் அல்ல…

விதிவிலக்குகள் விதியில் சேர்த்தியில்லை…

பெற்ற தாயை,உடன்பிறந்த சகோதரியை, காதலியை,கட்டிய மனைவியை ஆபாசமாக படமெடுத்து இணையத்தில் உலவ விடும் அயோக்கிய ஆண்களும் சேர்ந்ததுதான் இந்த பூமி….

ஒரு பெண்ணுக்கான பாதுகாப்பு வெளியில் இருந்து கிடைப்பதில்லை..அவளிடம் இருந்துதான் கிடைக்க முடியும்..
கண்ணியமான உடை,கறாரான பேச்சு,சாதுர்யமான துணிச்சல் ஆகியவைதான் அவளின் ஆயுதங்கள் என்பது என் கருத்து….
“ஏண்டி ஆம்பள மாதிரி நடந்த்துக்குற?” என ஒரு பெண்ணிடம்
கேட்டால் அவள் கோபப்படுவதில்லை..

ஆனால் ” ஏண்டா பொம்பள மாதிரி நடந்துக்குற?” என ஒரு ஆணிடம் கேட்டால் நடக்கும் கதையே வேறு…
இதுதான் யதார்த்தம்…

சரி..ஆரம்பிச்ச இடத்துக்கே வருவோம்…
இன்னைக்கு மகளிர் தினமாம்ல..
எந்த மகளிருக்கு???
-
பொதுவா சொல்லி வைப்போம் பாஸ்… இல்லாட்டி
ஆணாதிக்க வெறியன் லிஸ்ட்ல சேர்த்துருவாய்ங்க….
-
என் குடும்பத்து பெண்களுக்கு என்றைக்குமே மகளிர் தினமே…
ஏனெனில் அவர்களை நாங்கள் என்றுமே பெண்களாகவே மதிக்கிறோம்..போற்றுகிறோம்..
மறுபடி ஒருக்கா சொல்லுங்க தல…
-
பெண்களாய் பிறந்த அனைவருக்கும் ” உலக மகளிர் தின நல்வாழ்த்துகள் “…..
நன்றி…