இறங்கும்போது பத்திரம் !

by **M.Jagadeesan** Sun Mar 05, 2017 7:31 am

வாழ்க்கையின் உச்சத்தைத் தொடுவதற்குக் கடினமான உழைப்பு வேண்டும் . உச்சத்தைத் தொடுவது எவ்வளவு கடினமோ , அவ்வளவு கடினம் , அந்த உச்சத்தை நிலை நிறுத்திக் கொள்வதாகும் .

வாழ்க்கை என்பது ஒரு வண்டிச் சக்கரம் போல . கீழது மேலா , மேலது கீழா என்று சுழன்றுகொண்டே இருக்கும் . வறியவன் ஒருவன் செல்வந்தன் ஆவதும் , செல்வந்தன் ஒருவன் வறியவன் ஆவதும் இயற்கையின் நியதி .

வாழ்க்கையின் உச்சத்தைத் தொட்டவர்களுக்கு வறுமை வந்தால் மிகவும் எச்சரிக்கையாக இருக்கவேண்டும் . உச்சத்தைத் தொட்டபோது எந்தெந்த குணங்கள் இருந்ததோ , அந்த குணங்களை வறுமை வந்தபோதும் விடாமல் காக்கவேண்டும் . இதைத்தான் " வறுமையில் செம்மை " என்று கூறுவார்கள் .

பெருக்கத்து வேண்டும் பணிதல் சிறிய
சுருக்கத்து வேண்டும் உயர்வு .

என்பது ஐயனின் வாக்கு .

வறுமை வந்துவிட்டதே என்று தகாத செயல்களில் ஈடுபடக்கூடாது . பொய் சொல்லுதல் , திருடுதல் , பிறரை வஞ்சித்துப் பொருள் ஈட்டுதல் போன்ற செயல்களில் ஈடுபடக்கூடாது .

வாழ்க்கையில் ஏறும்போது எவ்வளவு பத்திரம் தேவையோ , அதைப்போல பலமடங்கு பத்திரம் வாழ்க்கையில் இறக்கம் கண்டபோதும் தேவை என்பதை மனதில் கொள்ளவேண்டும்