அரசு இன்ஜினியர் வீட்டில் அதிரடி சோதனை

பெங்களூரு: மைசூரு அரசு இன்ஜினியர் வீட்டில் ஊழல் தடுப்பு பிரிவு அதிகாரிகள் அதிரடி சோதனை நடத்திரூ.20 கோடி சொத்துகளின் ஆவணங்கள் கைப்பற்றினர்.   மைசூரு மாவட்டம் விஜயநகர் முதலாவது ஸ்டேஜை சேர்ந்தவர் ரங்கநாத் நாயக்.

இவர் கடந்த 20 ஆண்டுகளுக்கும் மேலாக ஊரக வளர்ச்சி துறையில் கண்காணிப்பு இன்ஜினியராக பணியாற்றி வருகிறார். இவர் கோடிக்கணக்கில் சொத்து சேர்த்து இருப்பதாக ஊழல்தடுப்பு பிரிவுக்கு புகார் வந்தது. அவரது வருமான வரி கணக்கு மற்றும் சொத்துகள் குறித்த விவரங்களை சேகரிக்கப்பட்டது.

அப்போது அதில் பல கோடி ரூபாய் மதிப்பிலான தங்கம், ரொக்கம், வாகனங்கள், வீடுகள், அடுக்குமாடி குடியிருப்பு மற்றும் உறவினர்களின் வங்கி கணக்கில் பணம் செலுத்தப்பட்டிருப்பது தெரியவந்தது.

இதற்காக அவர் எவ்விதமான வருமான வரியும் செலுத்தவில்லை என்று தெரியவந்தது. இதையடுத்து நேற்று காலை மாவட்ட ஊழல் தடுப்பு படை எஸ்.பி கவிதா தலைமையிலான அதிகாரிகள் ரங்கநாத்தின் வீட்டில் அதிரடி சோதனை நடத்தினர். அதிகாலை தொடங்கி இந்த சோதனை மதியம் வரை நடந்தது.

அப்போது அவரது வீட்டில் இருந்த தங்க நகைகள் மற்றும் ரொக்கப்பணம், ஆகியவை கிடைத்தது. இது தவிர சிக்கமகளூருவில் உள்ள பண்ணை வீடு, மைசூரில் உள்ள அவரது அலுவலகம், பெங்களூரு நாகர்பாவி சொகுசு பங்களா ஆகிய இடங்களில் அதிரடி சோதனை நடத்தப்பட்டது.

இங்கு வருமானத்திற்கு அதிகமாக சேர்த்து வைத்திருந்த சொத்துகளின் ஆவணங்கள் மற்றும் குடும்பத்தினர் பெயரில் வாங்கி வைத்திருந்த சொத்துகளின் பத்திரங்கள் கிடைத்ததாக கூறப்படுகிறது.

ஒட்டுமொத்தமாக 4 இடங்களிலும் நடந்த சோதனையில் ரூ.1 கோடிக்கும் அதிகமான தங்கம், ரூ.20 கோடி மதிப்பிலான அசையும் மற்றும் அசையா சொத்துகளின் ஆவணங்கள் கிடைத்ததாக தெரியவந்துள்ளது.
இது குறித்து தகவல்களை உறுதி செய்துள்ள மாவட்ட எஸ்.பி கவிதா, அரசு அதிகாரி ரங்கநாத் மீது ஊழல் தடுப்பு பிரிவின் கீழ் வழக்கு பதிவு செய்துள்ளார்.

மேலும் கைப்பற்றப்பட்ட ஆவணங்கள் அனைத்து முறையான விசாரணைக்கு பின்னர் நீதிமன்றத்தில் தாக்கல் செய்யப்படும் என்றும் அவர் தெரிவித்துள்ளார்
-
தினகரன்