அமெரிக்காவில் சுட்டுக்கொல்லப்பட்ட ஸ்ரீநிவாஸ் நினைவாக பிரார்த்தனை கூட்டம்: நூற்றுக்கணக்கானோர் திரண்டனர்

-
ஹூஸ்டன் : அமெரிக்காவில் பாரில் சுட்டுக்கொல்லப்பட்ட இந்தியர் ஸ்ரீநிவாஸ் நினைவாக பேரணி மற்றும் பிரார்த்தனை கூட்டம் நடந்தது. இதில் நூற்றுக்கணக்கானோர் திரண்டனர். அமெரிக்காவின் கன்சாஸ் நகரில் ஐதராபாத்தை சேர்ந்த ஸ்ரீநிவாஸ் குச்சிபோட்லா இன்ஜினியராக பணிபுரிந்து வந்தார்.

32 வயதான அவர் தனது நண்பர் அலோக் மடசனி என்பவருடன் கன்சாஸ் நகரில் உள்ள பாருக்கு கடந்த புதன்கிழமை சென்றுள்ளார். இருவரும் மது அருந்திக்கொண்டிருந்தனர். அப்போது அங்கே வந்த ஆஸ்டின் பகுதியைச் சேர்ந்த அமெரிக்க கடற்படை முன்னாள் வீரர் ஆடம் புரின்டன் என்பவர் இஸ்லாமியர்கள் என நினைத்து ஸ்ரீநிவாஸ், அலோக் மடசனி ஆகியோர் மீது துப்பாக்கியால் சுட்டார். இதை தடுக்க கிரில்லாட் என்ற அமெரிக்கர் முயன்றார். இதில் அவரும் காயம் அடைந்தார்.

இதையடுத்து ஸ்ரீநிவாஸ் குச்சிபோட்லா மற்றும் அவரது நண்பர் அலோக், அமெரிக்கர் இயான் கிரில்லாட் ஆகியோர் மருத்துவமனையில் சேர்க்ப்பட்டனர். இந்நிலையில் ஸ்ரீநிவாஸ் சிகிச்சைப் பலனின்றி உயிரிழந்தார். மற்ற இரண்டு பேரும் சிகிச்சைக்குப் பின் தற்போது வீடு திரும்பியுள்ளனர். இந்த சம்பவம் அமெரிக்காவில் பெரும் பரபரப்பை ஏற்படுத்தியது. குறிப்பாக அமெரிக்கவாழ் இந்தியர்கள் மத்தியில் அச்சத்தை ஏற்படுத்தியுள்ளது. இதற்கிடையே, சுட்டுக் கொல்லப்பட்ட ஸ்ரீநிவாஸ் நினைவாக பேரணி மற்றும் பிரார்த்தனை கூட்டம் கன்சாஸ் நகரில் நடந்தது. நூற்றுக்கணக்கானோர் திரண்ட இந்த பேரணியில் துப்பாக்கிச்சூட்டில் காயம் அடைந்த அலோக் ஊன்றுகோலுடன் பங்கேற்றார். இயான் கிரில்லாட்டின் சகோதரிகளும் பங்கேற்றனர்.

பேரணியில் பங்கேற்றவர்கள் படங்கள், பேனர்கள் ஏந்தியபடி, “நாங்கள் அமைதியை விரும்புகிறோம், ஒற்றுமையே பலம், பிளவுசக்தியை வீழ்த்துவோம்” என்பது உள்பட பல்வேறு கோஷங்களை எழுப்பினர். இந்த பேரணியில் மாகாண துணை கவர்னர் ஜெப் கூலியர், எம்பி கெவின் யோடர், ஓலாதி மேயர் மைக் கோப்லேன்ட், ஓலாதி காவல்துறை தலைவர் ஸ்டீவன் மென்கி மற்றும் முக்கிய அதிகாரிகள் பங்கேற்றனர். பலர் மெழுகுவர்த்தி ஏந்தியபடி பேரணியில் பங்கேற்றனர். பேரணி முடிந்த பிறகு இந்து கோயில் மற்றும் பல்வேறு மத வழிபாட்டு தலங்களில் பிரார்த்தனை நடந்தது.

நண்பர்கள் உருக்கம்

பேரணி மற்றும் பிரார்த்தனைக்கு பிறகு நடந்த இரங்கல் கூட்டத்தில் ஸ்ரீநிவாஸ் நண்பர் அலோக் பேசியதாவது: எனக்கும், ஸ்ரீநிவாசுக்கும் இடையே 9 ஆண்டு நட்பு. ஸ்ரீநிவாசை போல் முழுமையான அன்பு, அக்கறை, உதவி செய்யும் மனப்பான்மை கொண்ட ஒரு நல்ல மனிதனை நீங்கள் சந்தித்து இருக்க முடியாது. அவரிடம் இருந்து ஒரு வெறுப்பு வார்த்தை அல்லது வதந்தி அல்லது கவனக்குறைவான விமர்சனம் கூட வந்ததில்லை. அனைவருக்கும் நல்லது நினைக்கும் மனம் கொண்டவர். அனைவர் நலத்திலும் அக்கறை கொண்டவர். இவ்வாறு அவர் பேசினார். அதேபோல் மற்ற நண்பர்களும் கருத்து தெரிவித்தனர்.

ரூ6.70 கோடி நிதி திரண்டது

ஸ்ரீநிவாஸ் குடும்பத்திற்கு நிவாரணம் திரட்ட மூன்று ஆன்லைன் அக்கவுண்ட் மூலம் அமெரிக்காவில் நிதி திரட்டப்பட்டது. பல்வேறு அமைப்பினர் மற்றும் தனிப்பட்ட நபர்கள் மூலம் இதுவரை ரூ.6.70 கோடிக்கு மேல் நிதி திரண்டுள்ளது.
-
தினகரன்

பாவம் ஸ்ரீனிவாஸ்..........................அவரின் இழப்பை அவரின் குடும்பம் தாங்கிக்கொள்ள பெருமாள் தான் அனுக்கிரஹம் செய்யவேண்டும்.............