சூரிய மின் உற்பத்தியை 40 ஆயிரம் மெகாவாட் ஆக உயர்த்த திட்டம் மத்திய மந்திரிசபை ஒப்புதல்

-
சூரிய ஒளி மின்சார உற்பத்தியை 40 ஆயிரம் மெகாவாட் ஆக உயர்த்தும் திட்டத்துக்கு மத்திய மந்திரிசபை ஒப்புதல் அளித்து உள்ளது.
பிப்ரவரி 23, 04:38 AM
புதுடெல்லி,

சூரிய ஒளி மின்சார உற்பத்தியை 40 ஆயிரம் மெகாவாட் ஆக
உயர்த்தும் திட்டத்துக்கு மத்திய மந்திரிசபை ஒப்புதல் அளித்து
உள்ளது.

மந்திரிசபை கூட்டம்
பொருளாதார விவகாரங்களுக்கான மத்திய மந்திரிசபை
கூட்டம் நேற்று டெல்லியில் நடந்தது. பிரதமர் நரேந்திர மோடி
தலைமையில் நடந்த இந்த கூட்டத்தில் பல்வேறு மின்
திட்டங்களுக்கு ஒப்புதல் வழங்கப்பட்டது.

இந்த கூட்டத்தில் எடுக்கப்பட்ட முடிவுகள் குறித்து மத்திய
புதுப்பிக்கத்தக்க எரிசக்தி மற்றும் மின்சாரத்துறை மந்திரி
பியூஷ் கோயல் பின்னர் செய்தியாளர்களிடம் பேசினார்.
அப்போது அவர் கூறியதாவது:–

சூரிய ஒளி மின் உற்பத்தி
சோலார் எனப்படும் சூரிய ஒளி மின் உற்பத்தியை அதிகரிக்க
வேண்டும் என பிரதமர் நரேந்திர மோடி வலியுறுத்தி வருகிறார்.
தேசிய ஜனநாயக கூட்டணி அரசு பதவியேற்ற போது
200 மெகாவாட் ஆக இருந்த நாட்டின் சோலார் மின் உற்பத்தி
திறனை 20 ஆயிரம் மெகாவாட் ஆக உயர்த்த முதலில் நடவடிக்கை
எடுக்கப்பட்டது.

அதன்படி 20 ஆயிரம் மெகாவாட் திறன் வாய்ந்த குறைந்தபட்சம்
25 சோலார் பூங்காக்களை அமைக்க கடந்த 2014–ம் ஆண்டு
திட்டமிடப்பட்டது. இதில் தற்போது வரை 34 சோலார் பூங்காக்களின்
கட்டுமான நிலைகள் பல்வேறு கட்டங்களில் உள்ளன.

மேலும் அரசு அலுவலகங்களின் கூரைகள், விமான நிலையம்,
கிரிக்கெட் மைதானங்களிலும் சோலார் தகடுகள் அமைக்க மத்திய
அரசு ஊக்குவித்து வருகிறது.

சோலார் பூங்காக்கள்
இந்த 20 ஆயிரம் மெகாவாட் சோலார் மின் உற்பத்தி திறனை
40 ஆயிரம் மெகாவாட் ஆக உயர்த்துவதற்கு இன்றைய (நேற்று)
மந்திரி சபை கூட்டத்தில் ஒப்புதல் அளிக்கப்பட்டது. இதற்காக
தலா 500 மெகாவாட் திறன் வாய்ந்த 50 சோலார் பூங்காக்கள்
நாட்டின் பல்வேறு பகுதிகளில் அமைக்கப்படும். அத்துடன் மெகா
சோலார் மின் திட்டங்களும் செயல்படுத்தப்படும்.

மத்திய அரசின் ரூ.8,100 கோடி நிதி உதவியுடன் அமைக்கப்படும்
இந்த சோலார் பூங்காக்கள் மற்றும் மெகா திட்டங்கள் அனைத்தும்
2019–20–ம் ஆண்டுக்குள் நிறுவப்படும். இந்த திட்டங்கள் மூலம்
ஆண்டுக்கு 6 ஆயிரத்து 400 கோடி யூனிட் மின்சாரம் தயாரிக்கப்படும்.
இதனால் ஆண்டுக்கு 5½ கோடி டன் கார்பன் டை ஆக்சைடு
கட்டுப்படுத்தப்படும்.

வேலைவாய்ப்புகள்
இதன் மூலம் சுற்றுச்சூழல் பாதுகாக்கப்படுவதுடன், சோலார் மற்றும்
அது தொடர்பான துறைகளில் நேரடியாகவும், மறைமுகமாகவும்
வேலைவாய்ப்புகளும் உருவாகும். தரிசு நிலங்களில் இந்த சோலார்
பூங்காக்கள் அமைக்கப்படுவதால் சுற்றுப்புற பகுதிகள் வளர்ச்சி
பெறும்.

மாநிலங்கள் மற்றும் யூனியன் பிரதேச அரசுகளுடன் இணைந்து
செயல்படுத்தப்படும் இந்த சோலார் திட்டத்தை இந்திய சோலார்
மின்சக்தி கழகம் நிர்வகிக்கும். இந்த சோலார் பூங்காக்களுக்கான
இடத்தை அடையாளம் காண்பதுடன், சோலார் தகடுகளை
அமைக்கவும், பராமரிக்கவும் ஒரு உற்பத்தியாளரை தேர்வு செய்தும்
மத்திய அரசுக்கு அனுப்ப வேண்டியது மாநில அரசுகளின் கடமை
ஆகும்.

நேபாள நீர்மின் திட்டம்
இதைப்போல நேபாளத்தின் சங்குவசபா மாவட்டத்தில் பாயும்
அருண் ஆற்றில் ரூ.5,700.72 கோடியில் கட்ட திட்டமிட்டுள்ள அருண்–3
நீர்மின் திட்டத்துக்கும் (900 மெகாவாட்) மத்திய மந்திரிசபை ஒப்புதல்
அளித்தது. இந்த திட்டத்துக்கு செப்டம்பர் மாதத்துக்குள் நிதி ஒதுக்கீடு
செய்யப்படும். பின்னர் 5 ஆண்டுக்குள் இந்த திட்டம் செயல்படுத்தப்படும்.

மத்திய அரசின் எஸ்.ஜே.வி.என். நிறுவனம் மூலம் செயல்படுத்தப்பட
உள்ள இந்த திட்டத்தின் மூலம் தயாரிக்கப்படும் மின்சாரத்தில்
21.9 சதவீதம் நேபாளத்துக்கு இலவசமாக வழங்கப்படுவதுடன், மீதமுள்ள
மின்சாரம் இந்தியாவுக்கும் கிடைக்கும். இந்த மின்சார உற்பத்தி
ஒப்பந்த காலம் 30 ஆண்டுகள் என்பது குறிப்பிடத்தக்கது.

இவ்வாறு மத்திய மந்திரி பியூஷ் கோயல் கூறினார்.
-
----------------------------------------------
தினத்தந்தி

மின்சாரம் எடுக்க மோடி நண்பர் குழுமம் முன்னாள் வந்து, மின் கட்டண கொள்ளை செய்யாமல் இருந்தால் நல்லது. தேனி மாவட்டம் சூரிய ஒளி மின்சாரம் 4.50 ரூபாய் விலை (பிஜேபி நண்பர் கூட்டணி), கமிஷன் வாங்கிய கூடங்குளம் அணு உலை (காங்கிரஸ் கூட்டணி) மின்சாரம் 1.௦௦ ரூபாய் விலை. மோடி ஆட்சி அசத்தல் காட்சிகள் தொடர்கின்றன.