கோவை ஈஷா யோகா மையத்தில் ஆதி யோகி சிலை பிரதிஷ்டை: பிப்.24-ல் பிரதமர் வருகை

-
பிரதமர் நரேந்திர மோடி வரும் 24-ஆம் தேதி கோவை
வருகிறார். ஈஷா யோகா மையம் அமைந்துள்ள
வெள்ளியங்கிரி மலைப் பகுதியில் நிறுவப்பட்டுள்ள
112 அடி உயர “ஆதியோகி’ சிலை திறப்பு நிகழ்வில் அவர்
பங்கேற்கிறார்.

இதையொட்டி, பிரதமரின் சிறப்புப் பாதுகாப்புப் படை
(எஸ்பிஜி) அதிகாரிகள், விழா நடைபெறும் பகுதியில்
அண்மையில் ஆய்வு செய்தனர். இதைத் தொடர்ந்து, பிரதமரின்
வருகைக்கான தடையில்லா பாதுகாப்பு சோதனை அறிக்கையை
தில்லியில் உள்ள எஸ்பிஜி தலைமையகத்துக்கு அதன் அதிகாரிகள்
அனுப்பியுள்ளனர்.

கோவையில் ஜக்கி வாசுதேவை நிறுவனராகக் கொண்டுள்ள
ஈஷா யோகா மையத்தில், 112 அடி உயரம் கொண்ட சிவனின்
முகத்தோற்றத்துடன் கூடிய சிலை வடிவமைக்கப்பட்டுள்ளது.

சிவனின் முழுமையான முகத் தோற்றத்தைக் கொண்ட உலக
அளவில் மிகப்பெரிய சிலையாக இது கருதப்படுகிறது.
அமெரிக்காவின் தெற்கு டகோடா மலைப் பாறைகளில் உலகின்
முன்னோடித் தலைவர்களின் முகத் தோற்ற சிற்பங்கள் சுமார்
60 அடி உயரம் வரை நிறுவப்பட்டாலும் முழுமையான முக
அமைப்புடைய சிற்பமாக ஆதியோகி சிலை வெள்ளியங்கிரியில்
வடிவமைக்கப்பட்டுள்ளது.
–
மகா சிவராத்திரி நாளான பிப்ரவரி 24-ஆம் தேதி இந்த ஆதியோகி
சிலையை பிரதிஷ்டை செய்யும் நிகழ்வு நடைபெறுகிறது. இதில்
பிரதமர் நரேந்திர மோடி சிறப்பு விருந்தினராகக் கலந்து கொள்ள
ஒப்புக் கொண்டுள்ளார்.

மாநில முதல்வர்கள் வசுந்தரா ராஜே (ராஜஸ்தான்), சிவராஜ் சிங்
சௌஹான் (மத்திய பிரதேசம்), தேவேந்திர ஃபட்னவீஸ் (மகாராஷ்டிரம்)
ஆகியோரும் இந்நிகழ்வில் முக்கிய விருந்தினர்களாகக் கலந்து
கொள்ளவுள்ளனர்.

தமிழக சட்டப்பேரவையில் பெரும்பான்மை பலத்தை எடப்பாடி
பழனிசாமி சனிக்கிழமை (பிப்ரவரி 18) நிரூபித்தால் அவரையும்
இந்நிகழ்வில் பங்கேற்க அழைப்பு விடுக்க ஈஷா யோகா மைய
தலைமை திட்டமிட்டுள்ளதாகத் தெரிகிறது.

இந்நிலையில், பிரதமரின் வருகை உறுதிப்படுத்தப்பட்டுள்ளதால்,
தில்லியில் இருந்து பிப்ரவரி 24-ஆம் தேதி பிற்பகலில் பிரதமர்
மோடி புறப்பட்டு கோவைக்கு மாலையில் சென்றடைவதற்கான
பயண நிரல் தயாரிக்கப்பட்டுள்ளது.

கோவை சூலூர் விமானப் படை தளத்துக்கு தனி விமானத்தில்
செல்லும் பிரதமர், அங்கிருந்து ஹெலிகாப்டர் மூலம் வெள்ளியங்கிரி
மலைப் பகுதிக்கு செல்கிறார். அங்கிருந்து காரில் ஈஷா யோகா
மையத்தில் மாலை 6 மணிக்கு தொடங்கும் நிகழ்ச்சியில் பங்கேற்பார்
என்று அதிகாரிகள் தெரிவித்தனர்.

இந்நிகழ்ச்சியில் சுமார் இரண்டு லட்சம் பேர் வரை பங்கேற்பார்கள்
என எதிர்பார்க்கப்படுவதால்,கோவை முழுவதும் பலத்த பாதுகாப்பு
ஏற்பாடுகளை தமிழக காவல் துறை தீவிரமாக மேற்கொண்டுள்ளது.
–
———————————————-
தினமணி