அடுத்த தேர்தலுக்கு தயாராகிறதா தமிழகம் ?

" சசிகலா முதல்வராகக் கூடாது " என்ற வெகுஜன எதிர்ப்பு மனநிலையை ஓபிஎஸ், தனக்கு சாதகமாகப் பயன்படுத்திக் கொள்கிறார். எப்படியும் இனி முதல்வராக முடியாது என்ற நிலையில் சசிகலாவையும் முதல்வராக விடக்கூடாது என்பது தான் ஓபிஎஸ் ன் தற்போதைய மனநிலை. இதற்கு பின்னால் திமுக இருக்கிறதா ? , பாஜக இருக்கிறதா ? தெரியவில்லை.

ஓபிஎஸ் , இதுவரை காரிய சித்தனாகவே நடந்து கொண்டிருக்கிறார். ஓபிஎஸ் ன் தற்போதைய நிலைப்பாட்டிற்கும் பின்னாலும் காரியம் சாதித்தலே இருக்கிறது. இது தெரியாமல் தான் போன வாரம் அவரை மிக்சர் என்றார்கள். இப்போது ஹீரோ என்கிறார்கள். இன்னும் எவ்வளவு காலத்திற்கு தான் பிம்பத்தை உருவாக்கி வழிபடப் போகிறார்களோ !?

சசிகலாவை எதிர்க்க யாருமேயில்லையா ? என ஒட்டு மொத்த தமிழகமே எதிர்பார்த்து காத்திருந்தது. சரியான நேரத்தில் அந்த எதிர்பார்பை ஓபிஎஸ் பூர்த்தி செய்கிறார். அவவளவு தான்.

இவ்வளவிற்கு பிறகும் பெரும்பான்மையுடன் சசிகலா முதல்வராகவும் வாய்ப்பிருப்பதை மறுக்க முடியாது. ஆனாலும் அடுத்து தேர்தல் நடைபெறவே அதிகம் வாய்ப்பிருப்பதாகத் தெரிகிறது.

ஒரு முதல்வரை விடவும் ஒரு சட்டமன்ற உறுப்பினரால் தான் ஒரு தொகுதி மக்களுக்கு அதிகம் செய்ய முடியும் என்று எப்போது உணரப் போகிறோம்.ஒவ்வொரு முறையும் முதல்வர் வேட்பாளரை வைத்தே தொகுதி வேட்பாளரும் தேர்ந்தெடுக்கப்படுகிறார். சாலை அமைத்தல் , குடிநீர் வசதி , மின் விளக்கு அமைத்தல் உள்ளிட்ட அடிப்படை வசதிகள் கூட பல ஆண்டுகள் ஆகியும் நமது தொகுதிகளில் கிட்டப்பில் தான் கிடக்கின்றன. புதிய வேலைவாய்ப்புகள் உருவாக்கப்படவில்லை. வறட்சியை சமாளிக்க எந்தத் திட்டமும் இல்லை. விவசாயம் , விவசாயிகள் பற்றி பேச்சேயில்லை. அப்புறம் எதற்கு ஒவ்வொரு தொகுதிக்கும் சட்டமன்ற உறுப்பினர் ? முதல்வர் வேட்பாளரை தங்கள் விருப்பபடி தேர்ந்தெடுப்பது மட்டும் தான் சட்டமன்ற உறுப்பினர்களின் கடமையா ?

வஞ்சகம் , துரோகம் , சூழ்ச்சி இவை தானா அரசியல் ? அதிகாரத்தைக் கைபற்ற என்ன வேண்டுமானாலும் செய்யலாமா ?

பணம் பத்தும் செய்யும் .
ரமணியன்