தடைகளை தகர்த்து ஜெயலலிதா வழியில் பணிகளை தொடருவேன் தொண்டர்கள் மத்தியில் ஜெ.தீபா பேச்சு

by **ayyasamy ram** Sat Feb 04, 2017 5:20 pm

மறைந்த முதல்–அமைச்சர் ஜெயலலிதாவின் அண்ணன்
மகள் ஜெ.தீபா ஜெயலலிதாவின் பிறந்தநாளான
24–ந்தேதி அரசியல் கட்சி தொடங்குவது குறித்து அதிகார
பூர்வமாக அறிவிக்க இருக்கிறார்.

இதற்காக அவர் தன்னுடைய ஆதரவாளர்களிடம் தீவிரமாக
ஆலோசனை நடத்தி வருகிறார்.

முன்னாள் எம்.எல்.ஏ.க்கள், தொண்டர்கள் என தமிழகம்
முழுவதிலும் இருந்து தினமும் ஏராளமானோர் சென்னை
தியாகராயநகரில் உள்ள ஜெ.தீபா வீட்டுக்கு ஆதரவு
தெரிவிக்க வருகிறார்கள்.

வீட்டின் முன்பு திரண்டு கோ‌ஷம் எழுப்பும் அவர்கள்
மத்தியில் ஜெ.தீபாவும் உற்சாகமாக பேசி வருகிறார்.

குவியும் தொண்டர்கள்

கட்சி தொடங்குவதற்கான பணியில் மும்முரமாக
இறங்கியுள்ளதால் வாரத்திற்கு 2 நாட்கள் மட்டும்
(சனி மற்றும் ஞாயிற்றுக்கிழமை) தொண்டர்கள்
மத்தியில் அவர் பேசி வருகிறார்.

தஞ்சாவூர், கோவை, திருப்பூர், சிவகங்கை, காஞ்சீபுரம்,
சென்னை, திருவள்ளூர், மதுரை, நெல்லை, தூத்துக்குடி,
சேலம் உள்ளிட்ட பல்வேறு மாவட்டங்களில் இருந்து
ஜெ.தீபா வீட்டின் முன்பு நேற்று பெண்கள் உள்பட
தொண்டர்கள் ஏராளமானோர் குவிந்தனர்.

அவர்கள் மத்தியில் ஜெ.தீபா பேசியதாவது:–

ஜெயலலிதா வழியில் ஆர்.கே.நகரில் இருந்து என்னுடைய நற்பணிகளை தொடங்கியிருக்கிறேன். தமிழக மக்களுக்காக தொடர்ந்து என்னுடைய நற்பணிகளை செய்ய காத்திருக்கிறேன். அனைவரின் விருப்பத்திற்காக என்னை நற்பணிகளில் ஈடுபடுத்திக் கொள்கிறேன். மக்கள் பணி செய்வதற்கு எத்தனை தடைகள் வந்தாலும் அதனை தகர்த்து எறிவேன்.

தடைகளை தகர்த்து...
-
நான் ஏற்கனவே கூறியதுபோல தமிழகமும், தமிழக மக்களும் என் இரு கண்கள். அனைவரிடமும் கருத்துகளை கேட்டறிந்து பின்னர் தான் இந்த பணிகளை நான் தொடங்கியிருக்கிறேன். தடைகளை தகர்த்து எறிந்து ஜெயலலிதா வழியில் என்னுடைய பணிகளை தொடருவேன். யார் இருக்க வேண்டும், யார் இருக்க வேண்டாம் என்பதை மக்களே முடிவு செய்வார்கள்.

இது மக்களின் பொறுப்பு. ஜெயலலிதா வழியில் உங்களுக்காக பணிகளை செய்வேன். இது என்னுடைய முடிவு. இதில் எந்தவித மாற்றமும் இருக்காது. ஜெயலலிதா வழியில் பெயரும், புகழும் ஓங்கச் செய்வோம். போயஸ் கார்டன் வீட்டுக்காக நான் இல்லை. மக்களுக்காகவே நான் இருக்கிறேன். இவ்வாறு அவர் பேசினார்.
-
தினத்தந்தி