முதல் பார்வை: போகன் - இணைந்த கைகளின் மேஜிக்!

தனி நபரின் தணியாத பணத்தாசையும், அதனால் வரும்
சிக்கல்களும், அதற்கான விளைவுகளுமே 'போகன்'.
-
மன்னர் பரம்பரையைச் சேர்ந்த அரவிந்த்சாமி எப்போதும்
அரசனைப் போல ஆடம்பரமாக வாழவே ஆசைப்படுகிறார்.
அதற்காக பணத்தைக் கொள்ளையடிக்கிறார்.
-
அப்படி ஒரு கொள்ளை சம்பவத்தின்போது போலீஸ் அதிகாரி
ஜெயம்ரவியின் அப்பா நரேன் கைதாகிறார். இதிலிருந்து
தந்தையை ஜெயம்ரவி எப்படிக் காப்பாற்றுகிறார், குற்றவாளியை
கண்டுபிடித்தாரா, அவருக்கு சரியான பாடம் புகட்டினாரா என்று
வேகம் எடுக்கிறது திரைக்கதை.
-
'ரோமியோ ஜூலியட்' படத்துக்குப் பிறகு கமர்ஷியல் ஆக்‌ஷன்
படத்தை இயக்கிய விதத்தில் இயக்குநர் லட்சுமண் கவனம்
ஈர்க்கிறார்.
-
அரவிந்த்சாமியும், ஜெயம் ரவியும் படத்தை மொத்தமாக தங்கள்
தோள்களில் தாங்கி நிறுத்துகிறார்கள். அரவிந்த்சாமியின் குரல்,
உடல்மொழி, சொடுக்கு போடும் ஸ்டைல், கூர்மையான பார்வை,
 போகிற போக்கில் எளிய மக்களின் மொழியில் பேசுவது என
எந்த அலட்டலும் இல்லாமல் ஸ்கோர் செய்கிறார்.
-
காருக்குள் அமர்ந்துகொண்டு தமிழ்ப் பாடல்களுக்கு டான்ஸ்
ஆடுவதாக கைகளை அசைக்கும்போது அரவிந்தசாமிக்கு அப்ளாஸ்
அள்ளுகிறது
-
ஜெயம் ரவி பொறுப்பான போலீஸ் அதிகாரியாகவும், சிக்கல் மிகுந்த
சூழலைக் கையாளும் வேறு நபராகவும் இருவித பரிமாணங்களை
சிறப்பாக செய்திருக்கிறார். ரொமான்ஸ், பாசம், கோபம், ஆதங்கம்,
சமயோசிதம் எல எல்லாவற்றிலும் தன் முத்திரையைப் பதிக்கிறார்.
-
அரவிந்த்சாமிக்கு ஈடாக தன்னை நிலைநிறுத்திக் கொள்வதிலும்,
திரையில் ஆக்கிரமிப்பு செய்வதிலும் ஜெயம் ரவி கம்பீரம்.
-
ஹன்சிகாவின் நடிப்பு துருத்தாமல், உறுத்தாமல் ரசிக்க வைக்கிறது.
சின்ன சின்ன நுட்பமான அசைவுகளிலும் அவரின் மெனக்கெடல்
தெரிகிறது. பின்னணிக் குரலும் சரியாகப் பொருந்துகிறது.
-
பொன்வண்ணன், 'ஆடுகளம்' நரேன், நாசர், அக்‌ஷரா,
நாகேந்திர பிரசாத், வருண் ஆகியோர் பொருத்தமான பாத்திர
வார்ப்புகள்.
-
சவுந்தர்ராஜனின் கேமரா படத்தின் செழுமைக்கு முழு ஒத்துழைப்பு
அளித்துள்ளது. இமான் இசையில் வாராய் நீ வாராய், கூடுவிட்டு கூடு
பாயும், செந்தூரா பாடல்கள் ரசனை. டமாலு பாடலைக் கொஞ்சம்
குறைத்திருக்கலாம். பின்னணியிலும் இமான் இன்னிசை
அளித்திருக்கிறார்.
-
அரவிந்த்சாமி கொள்ளை அடிக்கும் விதம், கனவுப் பாடல் முடிந்ததும்
அதற்கு அரவிந்த்சாமி அளிக்கும் கமென்ட், ஒரு கட்டத்தில் இப்படியே
இருந்துவிடுவதாக அரவிந்த்சாமியிடம் ஜெயம்ரவி சொல்வது என
இயக்குநரின் புத்திசாலித்தனம் படத்தில் தெரிகிறது.
-
பொன்வண்ணன், நாசர், அக்‌ஷரா என்று ஒவ்வொருவராக அடுத்தடுத்து
கொலை செய்யப்படுவதை போலீஸ் கண்டுபிடிக்காதா? டெல்லியில்
இருந்த நரேன் சென்னை வந்து சிக்குவது எப்படி? ஹன்சிகா கமிஷனர்
அலுவலகத்துக்குள் திடீரென எப்படி வந்தார்?
-
எல்லோரிடமும் நடந்ததைச் சொல்லி தன்னை நிரூபிக்க முயற்சி
செய்யும் ஜெயம் ரவி, ஹன்சிகாவிடம் மட்டும் அப்படிச் செய்யாமல்
வெறுமனே பேசிக் கொண்டிருப்பது ஏன்? அந்த ஆன்மா வித்தை எப்படி
தொலைதூரத்திலிருந்தும் செயல்பட முடிகிறது போன்ற சில கேள்விகள்
எழுகின்றன.
-
இவற்றைத் தவிர்த்துப் பார்த்தால் 'போகன்' படம் அரவிந்த்சாமி,
ஜெயம்ரவியின் இணைந்த கைகளால் மேஜிக் நிகழ்த்துகிறது.
-
----------------------------------
தி இந்து