உன்னை நீதான் செதுக்க வேண்டும்

ச. சந்திரசேகரன் · 16/09/2012

உன்னை நீதான் செதுக்க வேண்டும்
உரிய நேரம் ஒதுக்க வேண்டும்
தன்னைத் தானே தீட்டும் போது
தரமாய் தீட்டும் தைரியம் வேண்டும்

கண்ணை நீதான் திறக்க வேண்டும்
காட்சிகள் யாவும் சிறக்க வேண்டும்
சொன்ன சொல்லை காக்கும் நல்ல
செவ்வாய் தன்னை செதுக்க வேண்டும்

பொன்மொழி கேட்கும் பொறுமை கொண்ட
பொறுத்த மான செவிகள் வேண்டும்
தன்மொழி தன்னை தரணியில் சேர்க்கும்
தரமிகு தலைவன் செதுக்க வேண்டும்

மண்ணைத் தோண்டி வைரம் தேடும்
மகிமை மிக்க கரங்கள் வேண்டும்
விண்ணைத் தாண்டி விண்மீன் அடையும்
வீரியம் கொண்ட கால்கள் வேண்டும்

எண்ணம் என்றும் ஏற்றம் கொண்ட
எளிய மனிதனை செதுக்க வேண்டும்
விண்ணை நீதான் தொட்ட போதும்
விழிகள் இரண்டிலும் ஈரம் வேண்டும்

ச. சந்திரசேகரன்