திருப்பரங்குன்றம் முருகன் கோவிலில் தெப்பத்திருவிழா நடந்தது

-
திருப்பரங்குன்றம்,

தெப்பத்திருவிழா
திருப்பரங்குன்றம் முருகன் கோவிலில் தெப்பத்திருவிழா
கடந்த 27–ந் தேதி கொடியேற்றத்துடன் தொடங்கியது.
திருவிழாவையொட்டி கடந்த 10 நாட்களாக காலை மற்றும்
இரவு நேரங்களில் தெய்வானையுடன் சுப்பிரமணியசாமி
தினமும் ஒரு வாகனத்தில் எழுந்தருளி நகர்உலா வந்து
பக்தர்களுக்கு காட்சி தந்து அருள்பாலித்தார்.

நேற்று முன்தினம் தேரோட்டம் நடைபெற்றது. திருவிழாவின்
சிகர நிகழ்ச்சியாக நேற்று தெப்பஉற்சவம் நடைபெற்றது.

இதனையொட்டி காலை 9 மணியளவில் உற்சவர் சன்னதியில்
தெய்வானையுடன் சுப்பிரமணியசாமிக்கு சிறப்பு அபிஷேகமும்
தங்கம், பவளம், வைடூரியம் போன்ற அணிகலன்களாலும்
வண்ணமலர்களாலும் பட்டு வஸ்திரங்களாலும் விசே‌ஷ
அலங்காரமும் மகாதீப ஆராதனைகளும் நடைபெற்றன.

இதனையடுத்து மேளதாளங்கள் முழங்க முருகப்பெருமான்
தெய்வானையுடன் புறப்பட்டு சன்னதி தெரு வழியாக
ஜி.எஸ்.டி.ரோட்டில் உள்ள தெப்பக்குளத்திற்கு வந்தார்.

அங்கு 10.10 மணிக்கு அலங்கரிக்கப்பட்டு தயாராக இருந்த
தெப்பமிதவையில் எழுந்தருளினார். பக்தர்கள் திரளாக கூடி,
வெற்றிவேல் முருகனுக்கு அரோகரா, வீரவேல்முருகனுக்கு
அரோகரா என்று பக்திகோ‌ஷங்கள் எழுப்பி சாமி கும்பிட்டனர்.

மின்னொளி அலங்காரம்
மீண்டும் இரவு 7 மணியளவில் மின்னொளி அலங்காரத்தில்
தெப்பக்குளத்தில் தெய்வானையுடன் முருகப்பெருமான்
எழுந்தருளினார். அப்போதும் அங்கு ஏராளமான பக்தர்கள்
திரண்டிருந்தனர்.

அதனை தொடர்ந்து தெப்பக்குளத்தில் இருந்து தங்ககுதிரை
வாகனத்தில் முருகப்பெருமான் புறப்பட்டு நகரின் முக்கிய
ரதவீதிகளில் வலம் வந்தார். பின்னர் சொக்கநாதர் கோவில்
அருகே சூரசம்ஹாரலீலை நடந்தது.

வறட்சியால் நிலைதெப்பம்
கடும் வறட்சியால் ஆழ்துனை கிணறு மூலமாக மின்
மோட்டாரை பயன்படுத்தி தெப்பக்குளத்தில் தண்ணீர் விடப்
பட்டு இருந்தது. ஆனால் தெப்பக்குளத்தை சுற்றி மிதந்தபடி
வலம் வருவதற்கு ஏற்ப போதுமான தண்ணீர் நிரம்பவில்லை.

இதனால் நிலைதெப்பமாக நிகழ்ச்சி நடந்தது. இதே போல
கடந்த 3 ஆண்டுகளுக்கு முன்பு ஏற்பட்ட கடும் வறட்சியின்
போதும் தெப்பத்திருவிழா நிலை தெப்பமாக நடந்தது
குறிப்பிடத்தக்கது.
–
————————————
தினத்தந்தி