பஞ்சாப் தேர்தல்: காங்கிரஸின் முதல்வர் வேட்பாளர் அமரீந்தர் சிங்: ராகுல் காந்தி அறிவிப்பு

-
பஞ்சாப் சட்டப் பேரவைத் தேர்தலுக்கான காங்கிரஸின் முதல்வர் பதவி வேட்பாளராக முன்னாள் முதல்வர் அமரீந்தர் சிங்கின் பெயரை அக்கட்சியின் துணைத் தலைவர் ராகுல் காந்தி அறிவித்துள்ளார்.

பஞ்சாப் சட்டப் பேரவையில் உள்ள 111 இடங்களுக்கும் வரும் பிப்ரவரி மாதம் 4-ஆம் தேதி ஒரே கட்டமாக தேர்தல் நடைபெறவுள்ளது. இதை முன்னிட்டு, மஜிதாவில் வெள்ளிக்கிழமை நடைபெற்ற பிரசாரக் கூட்டத்தில் கலந்து கொண்டு, காங்கிரஸ் வேட்பாளர்களை ஆதரித்து ராகுல் காந்தி பேசினார்.
அப்போது அவர் கூறியதாவது:

பஞ்சாபை இந்த மாநில மக்கள்தான் ஆள வேண்டும். பஞ்சாபின் முதல்வர், பஞ்சாபைச் சேர்ந்தவராகத்தான் இருத்தல் வேண்டும். அவர் இங்குதான் தற்போது அமர்ந்துள்ளார் (மேடையில் இருந்த முன்னாள் முதல்வர் அமரீந்தர் சிங்கை தெரிவித்தார்). காங்கிரஸ் கட்சியின் முதல்வர் பதவி வேட்பாளர் அமரீந்தர் சிங்கே ஆவார். அடுத்த முதல்வர் அவர்தான்.

கேஜரிவால், பிரதமர் மோடி மீது தாக்கு: பஞ்சாப் மாநிலத்துக்கு ரிமோட் கண்ட்ரோல் தேவையில்லை (தில்லி முதல்வரும், ஆம் ஆத்மி கட்சியின் தேசிய அமைப்பாளருமான அரவிந்த் கேஜரிவாலை சாடினார்). தில்லி, பஞ்சாப் மாநிலங்களுக்கு ஒரே நேரத்தில் முதல்வராக வேண்டும் என்று கேஜரிவால் விரும்புகிறார்.

பஞ்சாபை பாதல்கள் (முதல்வர் பிரகாஷ் சிங் பாதல், அவரது மகன் சுக்பீர் சிங் பாதலைக் குறிப்பிட்டார்) சீரழித்து விட்டனர். பிரதமர் மோடி, ஊழலுக்கு எதிராக போராடி வருவதாகத் தெரிவித்து வருகிறார்.

பஞ்சாபில் அகாலி தளம் கட்சியோடு கூட்டணியில் இருந்து கொண்டு இதை அவர் தெரிவிக்கிறார். அப்படியெனில், ஊழலுக்கு எதிராக அவரால் எப்படி நடவடிக்கை எடுக்க முடியும்?

பஞ்சாப் தேர்தலில் வெற்றி பெற்று, மாநிலத்தில் காங்கிரஸ் ஆட்சிக்கு வந்தால், போதைப் பொருள் நடமாட்டத்தை கட்டுப்படுத்த கடுமையான சட்டத்தைக் கொண்டு வருவோம். போதைப் பொருள் வியாபாரத்தில் தொடர்புடையவர்கள் அனைவரையும் கைது செய்து சிறைக்கு அனுப்புவோம் என்றார் ராகுல் காந்தி.
-
தினத்தந்தி